Read Biatah Bidayuh 2 KRONIKEL 22 Bible Online

2 KRONIKEL 22 - Biatah Bidayuh bible

2 KRONIKEL 22

¹Kada daya Arab mbŭh nyerang ka siŭ sopŭrŭg anak dari Raja Jehoram adŭ-i Ahaziah, adi anak sibusu-i. Jadi madin daya Jerusalem bada Ahaziah gati sama-i jadi raja.

²Ahaziah jadi raja kan umbur-i 22 sawa,[29] ka mritah di Jerusalem sitian ndi sawa. Ahaziah gŭh tunda suto rawang Raja Ahab, amai sindŭ-i Athaliah -- anak dayung Raja Ahab ka sukuh Omri raja Israel -- nggen di ayŭh ajar adi bada ayŭh arap.

⁴Ayŭh bidosa rawan TUHAN, sabab ripas sama-i kabŭs kada so rawang Raja Ahab jadi tukang pitayan yŭn-i; ngara inŭh adi pirabu ayŭh.

⁵Tunda ajar ngara, ayŭh sua ngga Joram adi raja Israel biperang rawan Hazael adi raja Syria. Bara tibaran soldadu anŭ biperang di Ramoth di Gilead, ka Joram biragan di tika bisaad anŭ.

⁶Ayŭh pari ka kupo Jezreel di nguri adŭp-i, ka Ahaziah di kamanŭ di munan ayŭh.

⁷Tapa bada tika anŭ adi ngga Ahaziah munan Joram jadi tika pinyirabu Ahaziah. Atan Ahaziah diginŭ, ayŭh ngga Joram dog natang ndi naan daya dŭn Jehu anak Nimshi, adi TUHAN mbŭh mien bada nyirubuh taris asar pinyipritah Ahab.

⁸Darŭm Jehu matak di ndai kraja adi Tapa mbŭh bada ayŭh ndai di tunduh taris asar pinyipritah anŭ, ayŭh bidapŭd ngga ndi tibaran pinguru daya Judah ngga anak anak jurud Ahaziah adi ko matak samah Ahaziah. Jehu siŭ sopŭrŭg ngara.

⁹Ahaziah dog jiroh, ka ayŭh dog dapŭd bisukan di Samaria. Ngara taban ayŭh ka Jehu ka siŭ ayŭh. Pak ngara kubur ayŭh ngga nakit amai stabi di babai-i Raja Jehoshaphat, adi muko situngang tungang-i bituan di TUHAN. Mating tia so rawang Ahaziah re dapŭd gati ayŭh jadi raja Judah.

¹⁰Kan Athaliah adi sindŭ Raja Ahaziah puan pasar pinyikabŭs anak-i, ayŭh nggen ukum bada sopŭrŭg adi so rawang Raja Judah dog siŭ.

¹¹Ahaziah biyŭn ndi naan jurud tiri dayung, Jehosheba, adi mbŭh banŭh ndi naan imam adi dŭn Jehoiada. Ayŭh bisukan nyiramat ndi naan anak dari Ahaziah, Joash, taban ayŭh bu so dupan anak anak dari raja adi bŭkŭn adi re dog siŭ ka sukan ayŭh ngga ndi naan pinyude darŭm birit bŭŭs Ramin TUHAN. Darŭm-i dog sukan simŭnŭ, Jehosheba nyiramat ayŭh so dog siŭ di tangan Athaliah.

¹²Sitŭkŭd nŭm sawa ayŭh rŭŭ diginŭ darŭm bisukan, sitadŭn Athaliah adi rani Judah mritah.