Read Biatah Bidayuh 2 KRONIKEL 23 Bible Online

2 KRONIKEL 23 - Biatah Bidayuh bible

2 KRONIKEL 23

¹Ripas kajŭn nŭm sawa Jehoiada adi imam ndai pikir-i nang kayuh patut dog ndai. Ayŭh ndai ndi janji ngga rimŭh naan pingubak soldadu: Azariah anak Jeroham, Ishmael anak Jehohanan, Azariah anak Obed, Maaseiah anak Adaiah, ka Elishaphat anak Zichri.

²Ngara di ka sopŭrŭg kupo di Judah ka taban pari ka Jerusalem bara daya Levi ngga sopŭrŭg pingubak manak.

³ Sopŭrŭg ngara tikuruk di Ramin TUHAN, ka diginŭ ngara ndai simanya ngga Joash, adi anak raja. Jehoiada nang di ngara, “Siati inŭh anak raja! Ayŭh patut jadi raja madin, nimun adi mbŭh TUHAN bijanji pasar bara sesang David.

⁴Ati inŭh kayuh adi re ata ndai. Kan bara imam ngga bara daya Levi mbŭh mandŭg re ndai kraja ngara di andu Sabbath, ndi so taruh utung so ngara re jaga tiban Ramin TUHAN,

⁵utung anŭ ndi re jaga istana raja, ka adi bŭkŭn re jaga di Tiban Pimŭnŭs. Sopŭrŭg daya re tikuruk di badag Ramin TUHAN.

⁶Mating daya siŭn mŭrŭt Ramin TUHAN adŭ-i bara imam ngga daya daya Levi adi kraja. Ngara siŭn mŭrŭt amai ngara mbŭh dog garar, pak adi bŭkŭn dŭh siŭn dŭh tunda atur TUHAN ka rŭŭ di sapa.

⁷Bara daya Levi siŭn mijog maning raja ka jaga ayŭh, buang digŭng pedang ngara adi mbŭh dog nyitak, ka tunda kamaki maki raja panu. Asi asi adi suba mŭrŭt Ramin TUHAN dŭh siŭn dŭh dog siŭ.”

⁸Daya Levi ngga daya Judah ndai nimun ka pingatur Jehoiada. Ngara adi dŭh nyiraja di andu Sabbath anŭ dog bitan, ngga sabab anŭ pingubak pingubak biyŭn sopŭrŭg ngara, adi mandŭg di nyiraja ngga adi dŭh nyiraja.

⁹Jehoiada nggen di pingubak pingubak anŭ dudu jarok ngga pinangin adi Raja David dapu dawŭ-i ka adi mbŭh dog nyikŭn di Ramin TUHAN.

¹⁰Ayŭh bada ngara jaga, ngga pedang ngara dog nyitak, maning jawin Ramin TUHAN, grindung raja.

¹¹Komŭnŭ Jehoiada taban Joash ruah, na makota di ubak-i, ka nggen di ayŭh ndi surat ukum-adat pasar pinyipritah raja. Ka ayŭh meh dog garar jadi raja. Jehoiada adi imam ngga anak anak dari-i nginyo Joash, ka barang naan daya nyirais nang, “Siramat ambu umbur ka tuan raja!”

¹²Athaliah dingah bara daya tarā yŭn raja, jadi ayŭh rikas di ka Ramin TUHAN, di yŭn bara daya bagŭ mbŭh tikuruk.

¹³Diginŭ ayŭh kiris raja bauh di tiban mŭrŭt Ramin TUHAN, mijog sindŭk tiang bās adi dog sidia yŭn raja ka dog kirurung pingubak pingubak soldadu ngga daya adi tukang mambak trompet. Sopŭrŭg daya nyirais ngga gaŭn buang mambak trompet, ka bara pimain musik Ramin TUHAN ngga pingakas musik ngara nguru rami anŭ. Rani anŭ nyiratak jipo-i darŭm susah ka nyirais nang, “Pingandai ngan ati rawan pritah!”

¹⁴Jehoiada dŭh raan Athaliah dog siŭ di badag Ramin TUHAN, jadi ayŭh bagan pingubak pingubak soldadu ka nang, “Taban ayŭh ruah so asah baris bara adi tukang jaga, ka siŭ tadŭ tadŭ daya adi suba an nyiramat ayŭh.”

¹⁵Ngara nakap ayŭh, taban ayŭh ka istana, ka diginŭ di Tiban Kuda ngara siŭ ayŭh.

¹⁶Jehoiada adi imam bada Raja Joash ngga sopŭrŭg daya samah ngga ayŭh ndai simanya nang adŭp ngara re jadi daya TUHAN.

¹⁷Komŭnŭ sopŭrŭg ngara di ka bari-sambah Baal ka nyirubuh-i. Ngara pirandŭk mija mija-sambah ka tibudo tibudo diginŭ ka siŭ Mattan, adi imam Baal, di jawin mija mija-sambah.

¹⁸Jehoiada bada bara imam ka daya daya Levi nguasa kraja darŭm Ramin TUHAN. Ngara an pimanu kraja adi dog nggen Raja David di ngara, ka tukang badang sadis adi dog jugan ka TUHAN nanyam Ukum-adat Moses. Ngara gŭh tukang nguasa musik ka atur gawai.

¹⁹Jehoiada gŭh bada bara adi tukang jaga tiban Ramin TUHAN kijaman daya adi kais nanyam ka adat mŭrŭt.

²⁰Pingubak pingubak soldadu, daya daya adi bās, bara daya pritah ka sopŭrŭg daya adi bŭkŭn sua ngga Jehoiada baris taban raja so Ramin TUHAN di ka istana. Ngara mŭrŭt so tiban baga, ka raja di ka guru di takta-i.

²¹Sopŭrŭg daya gaŭn, ka kupo mbŭh pajam amai Athaliah mbŭh dog siŭ.