Read Biatah Bidayuh 2 KRONIKEL 24 Bible Online

2 KRONIKEL 24 - Biatah Bidayuh bible

2 KRONIKEL 24

¹Joash jadi raja Judah kan umbur-i ju sawa, ka ayŭh mritah di Jerusalem sitian 40 sawa. Sindŭ-i inŭh Zibiah so kupo Beersheba.

²Ayŭh ndai kayuh adi pimunos asŭng TUHAN sitŭkŭd Jehoiada adi imam babŭ udip.

³Jehoiada mien duwŭh naan dayung bada jadi sawŭn Raja Joash, ka ngara biranak yŭn-i anak anak dari ngga anak anak dayung.

⁴Ripas ayŭh mbŭh mua tian-i jadi raja, ayŭh ndai pikir an nyurat Ramin TUHAN.

⁵Ayŭh nggen ukum bada bara imam ngga daya daya Levi di ka kupo kupo di Judah ka nguruk sadang kiang duit so bara daya ngga nyurat Ramin TUHAN barang sawa. Ayŭh bada ngara bigaut, pak daya Levi nyikite,

⁶ jadi ayŭh bagan Jehoiada, adi pinguru ngara, ka siken, “Mani kuu dŭh bada bara daya Levi sun so Judah ngga Jerusalem suke adi Moses, adi urun TUHAN, mite bara daya[30] bayar ngga sita Bari TUHAN?”

⁷(Bara pinunda Athaliah, dayung adi ginaka anŭ, mbŭh pirusak Ramin TUHAN ka mbŭh pakai bagŭ kayuh kudus ngga nyambah Baal.)

⁸Raja nggen ukum bada daya Levi ndai ndi kutak ngga nguruk pinganggen ka na-i di tiban Ramin TUHAN.

⁹Ngara pait pinganang ka ndi tarun tana Jerusalem ngga Judah bada barang naan daya taban suke ka TUHAN, nimun adi ko Moses pesan, adi urun Tapa, di tarun tana-pajam.

¹⁰Anŭ pimunos asŭng bara daya ngga pingubak pingubak ngara, ka ngara taban duit suke ngara ka ngisi kutak anŭ.

¹¹Barang andu daya Levi taban kutak anŭ ka pinurung raja adi nguasa-i. Kan-i mbŭh puno, tukang pinuris yŭn raja ngga pingarun Imam Bās piruah duit anŭ ka pari kutak anŭ ka tarun yŭn adŭp-i. Ka ngara meh mbŭh sun mua kiang duit.

¹²Raja ngga Jehoiada nggen duit anŭ ka ngara adi nguasa kraja nyurat Ramin TUHAN, ka ngara ngupah tukang batuh, tukang kayuh, ka tukang basi bada ndai kraja nyurat anŭ.

¹³Sopŭrŭg ngara bandar nyiraja ka bada Ramin TUHAN pari mun dawŭ-i, pidanah buang tagap.

¹⁴Kan kraja nyurat anŭ mbŭh abo, mas ngga pirak adi dŭm dog nggen di raja ngga Jehoiada, adi pakai-i ngga ndai makuk ka pingakas pingakas adi bŭkŭn yŭn Ramin TUHAN. Sitadŭn Jehoiada babŭ udip, sadis ari dog jugan di Ramin TUHAN.

¹⁵Kan ayŭh mbŭh raru minyamba ayŭh kabŭs darŭm umbur-i mbŭh 130 sawa.

¹⁶Ngara kubur ayŭh di kubur raja di kupo David ngga nganang kraja pingandai-i yŭn daya Israel, yŭn Tapa, ka yŭn Ramin TUHAN.

¹⁷Pak kan Jehoiada mbŭh kabŭs, bara pinguru Judah mujuk Raja Joash bada dingah pinganang adŭp ngara.

¹⁸Ka daya mbŭh dŭh tia nyambah di Ramin TUHAN, adi Tapa tayung-babuk ngara, ka piguru nyambah tibudo ngga gayŭn tapa Asherah. Sarah ngara adi piguru dosa anŭ bada Tapa baji di Judah ngga Jerusalem.

¹⁹TUHAN pait nabi nabi bada bakan ngara da pari ka adŭp-I, pak bara daya abah dingah.

²⁰ Ka roh Tapa nguasa Zechariah anak Jehoiada adi imam. Ayŭh mijog di tarun yŭn daya bagŭ tungang kiris ayŭh ka nang, “TUHAN Tapa siken mani angān nyibireu pinyipesan-I ka mbŭh taban pinyirusag ka adŭp ngan! Angān tagan Ayŭh, jadi Ayŭh mbŭh tagan angān!”

²¹Raja Joash sua bipekat rawan Zechariah, ka so bada raja bara daya manjan Zechariah ngga batuh ndŭg kabŭs di badag Ramin TUHAN.

²²Raja mbŭh kambŭt pingandai bās Jehoiada, adi sama Zechariah, mbŭh ndai yŭn-i, ka ayŭh bada Zechariah dog siŭ! Darŭm Zechariah mbŭh re patŭd asŭng-i, ayŭh nang, “Isa-i TUHAN kiris pingandai mu ka ngukum kuu!”

²³Di tipuh jaya sawa anŭ, daya Syria nyerang Judah ngga Jerusalem, siŭ sopŭrŭg pinguru, ka tambit raru bagŭ kayuh sirapas ka Damascus.

²⁴Bara tibaran soldadu Syria nisŭ, pak TUHAN bada ngara ngarah bara tibaran soldadu Judah adi bagŭ dŭ sabab ngara mbŭh tagan Ayŭh, adi TUHAN Tapa tayung-babuk ngara. Simŭnŭ inŭh Raja Joash dog ukum.

²⁵Ayŭh mbŭh bana biragan, ka kan pinganyu mbŭh bu, duwŭh naan so pinurung-i bipekat rawan ayŭh ka siŭ ayŭh di ambok-i ngga maras ayŭh adi mbŭh siŭ anak[31] imam Jehoiada. Ayŭh dog kubur di Kupo David, pak dŭh di kubur raja.

²⁶(Ngara adi bipekat rawan ayŭh inŭh Zabad anak Shimeath adi dayung daya Ammon, ka Jehozabad anak Shimrith adi dayung daya Moab.)

²⁷Dundan pasar anak anak Joash, pinganang-binabi adi dog nang pasar ayŭh, ka pasar munki ayŭh nyurat Ramin TUHAN, agi dog nuris darŭm Surat Pinyiripot pasar Surat Dundan Bara Raja. Anak-i Amaziah gati ayŭh jadi raja.