Read Biatah Bidayuh 2 KRONIKEL 25 Bible Online

2 KRONIKEL 25 - Biatah Bidayuh bible

2 KRONIKEL 25

¹Amaziah jadi raja kan umbur-i 25 sawa, ka ayŭh mritah di Jerusalem sitian 29 sawa. Sindŭ-i inŭh Jehoaddin so Jerusalem.

²Ayŭh ndai kayuh adi pimunos asŭng TUHAN, pak dŭh ngga siabo asŭng-i.

³Kan pinyipritah-i mbŭh sukup tagap, ayŭh siŭ sopŭrŭg pinurung adi ko siŭ sama-i.

⁴ Pak ayŭh dŭh siŭ anak anak ngara, amai tunda kayuh adi TUHAN muko pesan di Ukum-adat Moses: “Pimas dŭh siŭn dog siŭ sabab sarah adi anak ngara mbŭh ndai, ka anak dŭh siŭn dog siŭ sabab sarah adi pimas ngara mbŭh ndai; daya siŭn dog nggen ukum kabŭs amai sarah adi adŭp ngara mbŭh ndai.”

⁵Raja Amaziah ngatur sopŭrŭg daya so tibaran-asar Judah ngga Benjamin bada jadi bara tibaran tibaran soldadu, nanyam ka manak adŭp ngara, ka tijuan pingubak yŭn barang tibaran adi biyŭn siribu naan soldadu ka barang tibaran adi biyŭn siratus naan soldadu. Anŭ inŭh samŭn sopŭrŭg daya adi mbŭh duwŭh puru sawa ngga adi tuuh so anŭ, 300,000 naan sopŭrŭg ngara. Ngara inŭh sinadan adi dog mien, sidia yŭn biperang, sukup pandai pakai jarok ngga pinangin.

⁶Ngga nambah anŭ, ayŭh ngupah 100,000 naan soldadu so Israel ngga sindŭk 3,400 kilogram pirak.

⁷Pak ndi naan nabi di ka yŭn raja ka nang di ayŭh, “Dŭhnyah taban bara soldadu Israel ati ngga adŭp mu. TUHAN mating ngga ngara ati adi so Pritah Utara.

⁸Kuu pikir ngara re bada kuu rabis bake[32] darŭm perang, pak TUHAN inŭh adi biyŭn kuasa nggen pimanang puan kah bada daya dog ngarah, ka Ayŭh re bada pinganyu mu ngarah kuu.”

⁹Amaziah siken nabi anŭ, “Pak simuki meh ngga sopŭrŭg pirak adi aku muko nggen ngga ngupah ngara?” Nabi anŭ nam, “TUHAN bisa nggen pari ka kuu rabis so anŭ!”

¹⁰Jadi Amaziah bada bara soldadu anŭ mari. Ngara mari, buang raru baji di daya Judah.

¹¹Amaziah bada adŭp-i birani ka nguru bara tibaran soldadu-i ka Ruban Garo. Diginŭ ngara bisaad ka siŭ 10,000 naan soldadu daya Edom

¹²ka nakap 10,000 naan adi bŭkŭn. Ngara taban bara daya-takap ka tibung jenjang di kupo Sela ka buan ngara, ka sopŭrŭg ngara kabŭs nyatŭk batuh di sigŭn jenjang.

¹³Atan anŭ bara soldadu daya Israel, adi Amaziah dŭh bada tunda adŭp-i di biperang, nyerang kupo kupo Judah di asah Samaria ngga Beth Horon, siŭ 3,000 naan daya, ka taban ngga bu mua kiang kayuh sirapas.

¹⁴Kan Amaziah mari muko ngarah daya Edom, ayŭh taban mari tibudo tibudo ngara, pijog-i, nyambah-i, ka badang kimanyan yŭn-i.

¹⁵Anŭ bada TUHAN baji, jadi Ayŭh pait ndi naan nabi ka Amaziah. Nabi anŭ nang, “Mani kuu nyambah tapa daya tami adi ngaŭn dŭh tungang nyiramat daya adŭp-i so kuasa mu?”

¹⁶Diŭ so nabi anŭ kubo piminyu-i, Amaziah nang, “So sinde kieh bada kuu jadi tukang pitayan yŭn raja? Dŭh tia minyu, kambŭi dŭh aku bada kuu dog siŭ!” Nabi anŭ ko minyu, pak sibayuh anŭ ayŭh muko nang, “Madin aku puan nang Tapa mbŭh raan siŭ kuu sabab sopŭrŭg pingandai mu ati, buang kuu mbŭh nyibireu pinganang ku.”

¹⁷Raja Amaziah so Judah ngga bara adi tukang pitayan-i bipekat rawan Israel. Ayŭh pait pinganang ka Jehoash adi raja Israel, adi anak Jehoahaz ka sukuh Jehu, natang ayŭh yŭn biperang.[33]

¹⁸Jehoash pait pinyinam-i ka Amaziah: “Agi ndi sidah, tŭngŭn reja di Darŭd Lebanon pait pinganang ka tŭngŭn sedar: ‘Nyibandar anak dayung mu banan ngga anak dari ku.’ Pak dāng tarun murah ka bidigang di tŭngŭn reja anŭ.

¹⁹Amaziah, kuu mingangŭn adŭp mu mbŭh ngarah daya Edom, pak aku pitayan kuu bada rŭŭ di arŭn mu. Mani sah ndai pito adi re taban pinyirusag di adŭp mu ka di daya mu?”

²⁰Pak Amaziah abah dingah. Anŭ inŭh pinyiraan Tapa isa Amaziah dog ngarah, sabab ayŭh mbŭh nyambah tibudo daya Edom.

²¹Jadi Jehoash raja Israel matak biperang rawan Amaziah raja Judah. Ngara bidapŭd di Beth Shemesh di Judah,

²²bara tibaran soldadu Judah dog ngarah, ka ngara bu ka ramin adŭp-i.

²³Jehoash nakap Amaziah ka taban ayŭh ka Jerusalem. Diginŭ ayŭh nyirubuh sindung kupo so Tiban Ephraim ndŭg Tiban Sikuh, juan-i sindŭk 200 mita.

²⁴Ayŭh sirapas ka taban bu ka Samaria sopŭrŭg mas ngga pirak adi di Ramin TUHAN, pingakas adi dog jaga sesang sesang Obed Edom, samŭn rata istana. Ayŭh taban gŭh kudu kudu naan daya ndu daya-tubos.

²⁵Amaziah raja Judah udip simŭng rimŭh sawa tui dŭ so Jehoash adi raja Israel.

²⁶Sopŭrŭg pingandai Amaziah so sibungas ndŭg ka pinŭbŭn pinyipritah-i agi dog nuris darŭm Surat Dundan bara Raja Judah ngga Israel.

²⁷So tika adi ngga ayŭh rawan TUHAN, daya bipekat rawan ayŭh di Jerusalem. Pinŭbŭn-i ayŭh bu ka kupo Lachish, pak pinganyu-i tunda ayŭh kamanŭ ka siŭ ayŭh.

²⁸Tadang-i dog taban di tunduh kuda ka Jerusalem, ka ayŭh dog kubur di kubur raja di Kupo David.