Read Biatah Bidayuh 2 KRONIKEL 26 Bible Online

2 KRONIKEL 26 - Biatah Bidayuh bible

2 KRONIKEL 26

¹Sopŭrŭg daya Judah mien Uzziah adi simŭng nŭm sawa umbur-i, anak Amaziah, bada gati sama-i jadi raja.

²(Anŭ mbŭh ripas pinyikabŭs Amaziah, Uzziah pari sirapas Elath ka pari pijog kupo anŭ.)

³Uzziah jadi raja kan umbur-i mbŭh simŭng nŭm sawa, ka ayŭh mritah di Jerusalem sitian 52 sawa. Sindŭ-i inŭh Jecoliah so Jerusalem.

⁴Tunda suto danding sama-i, ayŭh ndai kayuh adi pimunos asŭng TUHAN.

⁵Sitŭkŭd Zechariah, adi tukang pitayan ayŭh di adat, babŭ udip, ayŭh tŭtŭd bituan di TUHAN, ka Tapa nyiberkat ayŭh.

⁶Uzziah matak biperang rawan daya Philistine. Ayŭh nyirubuh sindung kuta kupo kupo Gath, Jamnia, ngga Ashdod, ka pijog kupo bikuta sindŭk Ashdod ka di tarun bŭkŭn di tarun tana daya Philistine.

⁷Tapa turung ayŭh ngarah daya Philistine, daya Arab adi rŭŭ di Gurbaal, ka daya Meun.

⁸Daya Ammon bayar takŭd ka Uzziah, ka ayŭh jadi raru bikuasa ka timagah jeh ndŭg Egypt.

⁹Uzziah pijog tawā di Tiban Sikuh ngga nagap kuta Jerusalem, di Tiban Rubān, ka di yŭn sindung biruit.

¹⁰Ayŭh pijog gŭh tawā tawā kuta di sapa tarun tana rais ka kareh bagŭ prigi, sabab ayŭh biyŭn bagŭ dāng kudip di sigŭn sigŭn sandah tura ka barat ka di tarun tarun tana rabak. Sabab ayŭh rindu biteya, ayŭh ngatat daya ndai teya anggor di rais tarun tana sandah ka ngŭmŭh tana adi damŭn.

¹¹Ayŭh biyŭn tibaran bara soldadu adi raru bagŭ adi mbŭh sidia yŭn biperang. Kiang ngara agi dog nuris tukang pinuris-i Jeiel ngga Maaseiah di ribo kuasa Hananiah, adi ndi naan pinurung raja.

¹²Bara tibaran soldadu anŭ dog nguru 2,600 naan pingubak.

¹³Di ribo ngara agi 307,500 naan soldadu adi mbŭh sukup pandai birawan rawan pinganyu raja.

¹⁴Uzziah sidia yŭn bara tibaran soldadu: pinangin, jarok, tupi basi, piraka perang, bawŭh ngga reja-panah, ka dudu batuh yŭn sitamŭng.

¹⁵Di Jerusalem bara adi tukang ndai sinyata ndai pingakas ngga nimbak reja-panah ka ngga nyitamŭng tibande batuh so tawā ngga sikuh sindung kupo. Ayŭh mbŭh timagah di barang yŭn, ka ayŭh jadi raru bikuasa sabab Tapa turung ayŭh.

¹⁶Pak kan Raja Uzziah bitambah bake, ayŭh bitambah sambuh, ka anŭ inŭh adi bada ayŭh rabu. Ayŭh dŭh tunda pesan TUHAN adi Tapa-i kan ayŭh mŭrŭt ka darŭm Ramin TUHAN ka badang kimanyan di tunduh mija-sambah kimanyan.

¹⁷Azariah adi imam, dog tunda 80 naan imam adi birani, tunda raja

¹⁸ an bitan ayŭh. Ngara nang, “Uzziah! Kuu dŭh biyŭn hak badang kimanyan yŭn TUHAN. Kaŭs bara imam adi so asar Aaron adi mbŭh dog garar adŭ bisa. Ruah so yŭn kudus ati. Kuu mbŭh ndai sarah di TUHAN Tapa, ka kuu mbŭh dŭh tia biyŭn berkat-I.”

¹⁹Uzziah mijog diginŭ di Ramin TUHAN sindŭk mija-sambah kimanyan ka digŭng kayuh adi ngga badang kimanyan. Ayŭh baji di bara imam anŭ, ka andam kurit adi bisā timbur di arŭ-i.

²⁰Azariah ngga imam imam adi bŭkŭn tingga arŭ raja buang susah, ka komŭnŭ takan ayŭh ruah so Ramin TUHAN. Ayŭh rikas ruah, sabab TUHAN mbŭh ngukum ayŭh.

²¹Sitŭkŭd umbur-i pimudip Raja Uzziah mbŭh kais nanyam ka adat sabab andam-i anŭ. Dŭh tungang mŭrŭt Ramin TUHAN dinge, ayŭh rŭŭ di ramin adŭp-i, rŭŭ so sopŭrŭg kraja-i, sitadŭn anak-i Jotham mritah rais.

²²Nabi Isaiah anak Amoz nuris sopŭrŭg kayuh bŭkŭn adi Raja Uzziah mbŭh ndai di jaman pinyipritah-i.

²³ Uzziah kabŭs ka dog kubur di tana kubur raja, pak sabab andam-i ayŭh dŭh dog kubur di anŭ adi tah yŭn kubur raja. Anak-i Jotham gati ayŭh jadi raja.