Read Biatah Bidayuh 2 KRONIKEL 29 Bible Online

2 KRONIKEL 29 - Biatah Bidayuh bible

2 KRONIKEL 29

¹Hezekiah jadi raja Judah kan umbur-i 25 sawa, ka ayŭh mritah di Jerusalem sitian 29 sawa. Sindŭ-i inŭh Abijah, anak Zechariah.

²Tunda suto danding babuk-i Raja David, ayŭh ndai kayuh adi pimunos asŭng TUHAN.

³Sibungas buran ripas Hezekiah jadi raja, ayŭh pari kuka tiban tiban Ramin TUHAN ka bada-i dog nyurat.

⁴Ayŭh bada tikuruk ndi tibaran imam ngga daya Levi di badag tura ka timor Ramin TUHAN

⁵ka minyu ngga ngara diginŭ. Ayŭh nang, “Angān daya Levi an nyikudus adŭp ngan ka pibisig Ramin TUHAN, adi Tapa tayung-babuk ngan. Taran sopŭrŭg kayuh adi nyembar Ramin TUHAN.

⁶Tayung-babuk ta dŭh tŭtŭd di TUHAN adi Tapa ta ka ndai kayuh adi dŭh pimunos asŭng-I. Ngara dŭh piduri tarun yŭn pinyirŭŭ-I.

⁷Ngara tŭŭp tiban tiban Ramin TUHAN, tandah prita pura, ka dŭh badang kimanyan puan kah jugan sadis badang darŭm ramin-I adi Tapa Israel.

⁸Sabab anŭ TUHAN mbŭh baji di Judah ngga Jerusalem, ka kayuh adi-I mbŭh ndai di tunduh ngara mbŭh bada sopŭrŭg daya gŭgŭh ka taru.

⁹Bara babuk ta dog siŭ darŭm biperang, ka sawŭn ngga anak ta dog taban ngga bu jadi daya-takap.

¹⁰“Aku mbŭh ndai pikir ku raan ndai ndi simanya ngga TUHAN, adi Tapa Israel, isa Ayŭh dŭh tia baji ngga ata.

¹¹Bara anak ku, dŭh taran masā. Angān inŭh adi TUHAN mbŭh mien bada badang kimanyan yŭn-I ka nguru bara daya nyambah adŭp-I.”

¹²Ati inŭh bara daya Levi adi agi diginŭ: So manak Kohath, Mahath anak Amasai ngga Joel anak Azariah. So manak Merari, Kish anak Abdi ngga Azariah anak Jehallelel. So manak Gershon, Joah anak Zimnah ngga Eden anak Joah. So manak Elizaphan, Shimri ngga Jeuel. So manak Asaph, Zechariah ngga Mattaniah. So manak Heman, Jehuel ngga Shimei. So manak Jeduthun, Shemaiah ngga Uzziel.

¹⁵Ngara nguruk dingan ngara adi samah daya Levi, ka sopŭrŭg ngara bada adŭp ngara bisig nanyam ka adat. Komŭnŭ, nimun adi mbŭh raja pesan di ngara, ngara piguru bada Ramin TUHAN bisig nanyam ka adat, nanyam ka Ukum-adat TUHAN.[35]

¹⁶Bara imam di ka darŭm Ramin TUHAN ka pibisig-i, ka ngara taban ruah ka badag sopŭrŭg kayuh adi kais nanyam ka adat. So nŭ bara daya Levi taban sopŭrŭg-i ka sapa kupo di ka Rubān Kidron.

¹⁷Kraja anŭ piguru so andu adi ndi darŭm sibungas buran, ka andu adi mai ngara ngamas sopŭrŭg-i, samŭn birit-mŭrŭt Ramin TUHAN. Komŭnŭ ngara nyiraja mai andu dinge, ndŭg andu adi simŭng nŭm darŭm buran, sidia Ramin TUHAN yŭn simayang.

¹⁸Bara daya Levi nggen ripot ati ka Raja Hezekiah: “Kieh muko pimanu adat pibisig yŭn Ramin TUHAN, samŭn mija-sambah yŭn sadis badang, mija yŭn ruti kudus, ka sopŭrŭg pingakas-i.

¹⁹Kieh gŭh mbŭh taban pari sopŭrŭg pingakas adi Raja Ahaz tambit darŭm sawa anŭ adi ngga-i dŭh tŭtŭd di Tapa, ka kieh mbŭh pari nyikudus-i. Sopŭrŭg-i di jawin mija-sambah TUHAN.”

²⁰Ngga sirikas-i Raja Hezekiah bada tikuruk bara daya bās di kupo, ka samah ngara ayŭh di ka Ramin TUHAN.

²¹Ndu sadis ngga taran dosa rawang raja ngga dosa bara daya Judah ka ngga pibisig Ramin TUHAN, ngara tambit ju dari sapi, ju biri, ju anak biri, ka ju kambing. Raja kidaan di bara imam, adi sesang Aaron, bada jugan dāng ndu sadis di tunduh mija-sambah.

²²Bara imam siŭ sapi diŭ, komŭnŭ biri, ka komŭnŭ anak biri, ka masik deya barang sadis di tunduh mija-sambah.

²³Sikasŭn-i ngara taban kambing anŭ ka raja ngga ka bara daya, adi na tangan ngara di tunduh dāng anŭ.

²⁴Komŭnŭ bara imam siŭ kambing anŭ ka ren deya-i di tunduh mija-sambah ndu sadis taran dosa yŭn sopŭrŭg daya, amai raja mbŭh pesan bada sadis badang ngga sadis taran dosa dog ndai yŭn sopŭrŭg daya Israel.

²⁵Raja tunda atur adi TUHAN mbŭh nggen di Raja David so baba Gad, nabi raja, ka so baba nabi Nathan; ayŭh nggen tarun yŭn di bara daya Levi di darŭm Ramin TUHAN, ngga kachapi ka sigager,

²⁶pingakas musik mun anŭ adi Raja David mbŭh pakai. Bara imam gŭh mijog diginŭ ngga trompet.

²⁷Hezekiah nggen ukum bada sadis badang dog jugan; ka darŭm anŭ dog piguru, bara daya biragu nang ragu puji ka TUHAN, ka bara pimain musik piguru mambak trompet ngga sopŭrŭg pingakas adi bŭkŭn.

²⁸Barang naan adi agi diginŭ sua simayang, ka adi biragu ngga ragu ragu adi bŭkŭn pijuu ndŭg ka sopŭrŭg sadis abo dog badang.

²⁹Komŭnŭ Raja Hezekiah ngga sopŭrŭg daya sidikang ka nyambah Tapa.

³⁰Raja ngga bara pinguru bangsa kidaan di daya Levi bada biragu ka TUHAN ragu puji adi dog nuris David ka adi dog nuris Asaph adi nabi. Jadi barang naan biragu ngga pawŭn buang ngara sidikang ka nyambah Tapa.

³¹Hezekiah nang di sopŭrŭg daya, “Madin angān mbŭh bisig nanyam ka adat, taban meh sadis ndu sadis trima kaseh ka TUHAN.” Ngara ndai nimun dog bada, ka kada so ngara so ka pinyiraan adŭp ngara taban dāng an ngara nyadis ndu sadis badang.

³²Ngara taban 70 dari sapi, 100 biri, ka 200 anak biri ndu sadis badang ka TUHAN.

³³Ngara taban gŭh 600 dari sapi ka 3,000 biri ndu sadis adi daya man.

³⁴Amai bara imam dŭh sukup bagŭ re tukang siŭ sopŭrŭg dāng anŭ, bara daya Levi turung ngara ndŭg ka kraja anŭ mbŭh kamas. Di tika anŭ bagŭ imam mbŭh bada adŭp ngara bisig nanyam ka adat. (Bara daya Levi rabis tŭtŭd so bara imam darŭm bada adŭp ngara bisig nanyam ka adat.)

³⁵Ngga nambah kraja jugan sadis adi mŭrŭng dog badang, bara imam dapu tanggong badang ramak adi dog jugan so sadis adi daya man, ka ren wain adi dog jugan ngga sadis badang. Jadi simayang di Ramin TUHAN dog piguru dinge.

³⁶Raja Hezekiah ngga bara daya mbŭh gaŭn, sabab Tapa mbŭh turung ngara ndai sopŭrŭg kayuh anŭ ngga rikas.