Read Biatah Bidayuh 2 KRONIKEL 30 Bible Online

2 KRONIKEL 30 - Biatah Bidayuh bible

2 KRONIKEL 30

¹ Bara daya gi-bŭn dapŭd sita Gawai Paska di tipuh adi batur, darŭm sibungas buran, sabab dŭh biyŭn sukup imam adi bisig nanyam ka adat ka dŭh bagŭ daya tikuruk di Jerusalem. Jadi Raja Hezekiah, bara pinurung-i, ngga bara daya di Jerusalem situju an sita-i darŭm buran adi duwŭh, ka raja pait pinganang ka sopŭrŭg daya Israel ngga Judah. Ayŭh pait gŭh surat ka tibaran tibaran-asar Ephraim ngga Manasseh, mite ngara mandŭg ka Ramin TUHAN di Jerusalem di sita gawai Paska ngga stabi di TUHAN, adi Tapa Israel.

⁴Raja ngga bara daya mbŭh munos asŭng di pingatur ngara,

⁵jadi ngara bagan sopŭrŭg daya Israel, so Dan di utara ndŭg Beersheba di siratan, bada sua mandŭg ka Jerusalem ka sita gawai Paska nanyam ka Ukum-adat, ngga bara daya rabis bagŭ so adi mbŭh.

⁶Bara pinyisung matak so ka pinyibada raja ngga bara pinurung-i ka ndi tarun tana Judah ngga Israel ngga pinganang bagan: “Daya Israel, angān mbŭh siramat so serang daya Assyria. Pari meh madin ka TUHAN, adi Tapa Abraham, Isaac, ka Jacob, ka Ayŭh re pari ka angān.

⁷Dŭhnyah mun tayung-babuk ka bara dingan ngan adi sama daya Israel adi dŭh tŭtŭd di TUHAN adi Tapa ngara. Nimun adi mbŭh angān kiris, Ayŭh bandar bandar ngukum ngara.

⁸Dŭhnyah karas tangek mun ngara, pak nundok di TUHAN. Mandŭg ka Ramin TUHAN di Jerusalem, adi TUHAN Tapa ngan mbŭh bada adu adu kudus, ka nyambah Ayŭh isa Ayŭh dŭh tia baji di angān.

⁹Kambŭi angān pari ka TUHAN, ngara adi mbŭh tambit madis ngan jadi daya-takap re masi di ngara ka bada ngara mari. TUHAN adi Tapa ngan inŭh mandis ka masi, ka kambŭi angān pari ka Ayŭh, Ayŭh re trima angān.”

¹⁰Bara pinyisung anŭ matak ka barang kupo di tarun tana tibaran tibaran-asar Ephraim ngga Manasseh, ka jeh ka utara ndŭg tibaran-asar Zebulun, pak daya tawŭh ngara ka napat ngara.

¹¹Pak agi gŭh kada so tibaran-asar Asher, Manasseh, ngga Zebulun adi raan mandŭg ka Jerusalem.

¹²Kuasa Tapa taŭn agi gŭh di Judah ka nyindi bara daya darŭm ngara raan tunda pinyiraan-I darŭm ngara nurut pinganang raja ngga bara pinurung-i.

¹³Raru bagŭ daya tikuruk di Jerusalem darŭm buran adi duwŭh an sita Gawai Ruti dŭh-Biragi.

¹⁴Ngara kadi sopŭrŭg mija-sambah adi muko dog pakai di Jerusalem ngga jugan sadis ka badang kimanyan ka taran-i ka rubān Kidron.

¹⁵Ka ngga andu adi simŭng pat darŭm buran anŭ, ngara siŭ anak biri yŭn sadis Paska. Bara imam ngga daya Levi adi dŭh bisig nanyam ka adat mbŭh raru mangŭh ka rasu pibisig adŭp ngara siŭn ngara dapŭd jugan sadis badang di Ramin TUHAN.

¹⁶Ngara tambit tarun yŭn ngara di Ramin TUHAN nanyam ka atur di Ukum-adat Moses, urun Tapa. Bara daya Levi nggen deya sadis ka bara imam, adi masik-i di tunduh mija-sambah.

¹⁷Sabab bagŭ daya bayuh bisig nanyam ka adat, ngara dŭh dapŭd siŭ anak biri Paska. Sabab anŭ daya Levi siŭ-i yŭn ngara, ka jugan-i ka TUHAN.

¹⁸Nambah ka anŭ, bagŭ ngara adi mandŭg so tibaran tibaran-asar Ephraim, Manasseh, Issachar, ngga Zebulun gibayuh pibisig adŭp ngara nanyam ka adat, jadi ngara sita Paska anŭ dŭh ngga sukup batur-i. Raja Hezekiah bidua yŭn ngara sakati:

¹⁹“O TUHAN, Tapa tayung-babuk ami, ngga pinyikana Mai apun ngara adi nyambah Kaam ngga siabo atin ngara, sunggu ngara dŭh bisig nanyam ka adat.”

²⁰TUHAN nam dua Hezekiah; Ayŭh apun ngara anŭ ka dŭh ngukum ngara.

²¹Ju andu bara daya adi tikuruk di Jerusalem sita Gawai Ruti dŭh-Biragi ngga sukup pawŭn, ka barang andu daya Levi muji TUHAN ngga situngang tungang ngara.[36]

²²Hezekiah muji bara daya Levi amai pandai nguru simayang nyambah TUHAN. Ripas ju andu adi ngga ngara jugan sadis ngga muji TUHAN, adi Tapa tayung-babuk ngara,

²³ngara ndai pikir an pijuu gawai anŭ ju andu dinge. Jadi ngara bigawai ngga sukup pawŭn.

²⁴Raja Hezekiah nggen 1,000 pŭrŭng dari sapi ngga 7,000 pŭrŭng biri bada daya siŭ ka man, ka bara pinurung-i nggen di ngara siribu dinge dari sapi ka 10,000 pŭrŭng biri. Raru bagŭ imam pimanu adat pibisig di tunduh adŭp ngara.

²⁵Jadi sopŭrŭg daya pawŭn -- daya Judah, bara imam, bara daya Levi, daya adi mandŭg so utara, ngga bara daya tami adi rŭŭ tatap di Israel ngga di Judah.

²⁶Kupo Jerusalem mbŭh sukup pawŭn, sabab so jaman Raja Solomon anak David, gi-bŭn kayuh mun anŭ dog ndai.

²⁷Bara imam ngga bara daya Levi mite TUHAN nyiberkat bara daya. So yŭn pinyirŭŭ-I di shorga Tapa dingah dua ngara ka trima-i.