Read Biatah Bidayuh 2 KRONIKEL 31 Bible Online

2 KRONIKEL 31 - Biatah Bidayuh bible

2 KRONIKEL 31

¹Ripas gawai, sopŭrŭg daya Israel di ka barang kupo di Judah ka mapar uros uros batuh pirapu', ka pitumbang tandā tandā pinatŭng tapa Asherah, ka pirabur mija mija-sambah ka tarun tarun yŭn bisambah adat karŭm. Ngara ndai simŭnŭ di barang yŭn di Judah, ka di tarun tana Benjamin, Ephraim, ka Manasseh; komŭnŭ sopŭrŭg ngara mari.

²Raja Hezekiah ngatur pari bara imam ngga bara daya Levi nanyam ka utung utung kraja ngara. Anŭ samŭn jugan sadis badang ngga sadis bidingan, mbit utung kraja simayang di Ramin TUHAN, ka nggen puji ngga trima kaseh di barang yŭn darŭm Ramin TUHAN.

³ So kaban dāng kudip ngga kaban biri-i ayŭh nggen dāng yŭn sadis badang di andu Sabbath, di tika Gawai Anak Buran, ka di tika gawai gawai adi bŭkŭn adi dog miratak Ukum-adat TUHAN.

⁴ Ngga nambah anŭ, raja bada daya Jerusalem taban pinganggen adi tah tung bara imam ngga daya Levi, isa ngara dapŭd nggen sopŭrŭg masā ngara nanyam adi mbŭh dog miratak Ukum-adat TUHAN.

⁵Kan pinganang mbŭh dog nggen, bara daya Israel taban pinganggen gandom adi siabo kana, wain, inyo kanā, ju banyis, ka kayuh kayuh adi bŭkŭn so teya, ka ngara gŭh taban ndi utung so-simŭng so[37] barang masam kayuh adi ngara biyŭn.

⁶Sopŭrŭg daya adi rŭŭ di kupo kupo di Judah taban ndi utung-so-simŭng so sapi sapi ngga biri ngara, ka ngara taban gŭh bagŭ pinganggen, adi ngara jugan ka TUHAN adi Tapa ngara.

⁷Pinganggen piguru mandŭg darŭm buran taruh ka bitambah bitugung pat buran ripas anŭ.

⁸Kan Raja Hezekiah ngga bara pinurung-i kiris munki masam bagŭ kayuh adi mbŭh dog nggen, ngara muji TUHAN ka muji daya-I Israel.

⁹Raja minyu di bara imam ka di bara daya Levi pasar pinganggen anŭ,

¹⁰ka Azariah adi Imam Bās, adi sesang Zadok, nang di ayŭh, “So daya mbŭh piguru nggen pinganggen ngara ka Ramin TUHAN, kayuh man mbŭh sukup ka adi dŭm gŭh mbŭh raru bagŭ. Ata mbŭh biyŭn sopŭrŭg ati sabab TUHAN mbŭh nyiberkat daya-I.”

¹¹So ka pinyibada raja ngara sidia birit birit pinyirikŭn di tarun yŭn Ramin TUHAN

¹²ka nyikŭn sopŭrŭg pinganggen samŭn anŭ adi ndi utung-so-simŭng darŭm-i. Ngara bada ndi naan daya Levi dŭn Conaniah jadi tukang nguasa ka bada jurud-i Shimei tukang turung ayŭh.

¹³Simŭng naan daya Levi dog tijuan bada nyiraja di ribo ngara: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, ngga Benaiah. Sopŭrŭg anŭ dog ngatur so kuasa Raja Hezekiah ngga Azariah adi Imam Bās.

¹⁴Kore anak Imnah, adi daya Levi adi pingubak daya adi tukang jaga di Tiban Timor Ramin TUHAN, inŭh tukang kambat pinganggen adi dog jugan ka TUHAN ka adi tukang kutung-i.

¹⁵Di kupo kupo bŭkŭn di yŭn imam imam rŭŭ, ayŭh dog turung daya Levi adi bŭkŭn: Eden, Miniamin, Jeshua, Shemaiah, Amariah, ka Shecaniah. Ngara kutung pinguman bada brinyam di barang naan dingan ngara adi samah daya Levi nanyam ka kraja ngara,

¹⁶dŭh nanyam ka manak. Ngara nggen utung di sopŭrŭg dari adi 30[38] sawa umbur-i ngga adi tuuh so anŭ adi biyŭn kraja barang andu di Ramin TUHAN nanyam ka utung kraja ngara.

¹⁷Bara imam dog nggen kraja ngara nanyam ka manak, ka daya Levi adi duwŭh puru sawa ngga adi tuuh so anŭ dog nggen kraja ngara nanyam ka tibaran.

¹⁸Dŭn ngara dog pibŭrŭt samah ngga dŭn sawŭn ngara, anak ngara, ka samŭn adi bŭkŭn adi bisangan di ngara, sabab ngara an sidia di tadŭ nga yŭn dog bada ndai kraja kudus ngara.

¹⁹Di dupan bara imam adi rŭŭ di kupo kupo adi dog pirutung ka sesang Aaron, puan kah di tarun tana kupai maning kupo kupo anŭ, agi daya adi dapu tanggong kutung pinguman di sopŭrŭg dari di rawang imam samŭn di barang naan adi ko dog pibŭrŭt dŭn-i di manak Levi.

²⁰Di ndi tarun tana Judah, Raja Hezekiah ndai kayuh adi pimunos asŭng TUHAN adi Tapa-i.

²¹Ayŭh mujur, sabab sopŭrŭg kayuh adi-i ndai di Ramin TUHAN bait adi nanyam ka Ukum-adat, ayŭh ndai ngga siabo asŭng ka ngga rindu di Tapa-i.