Read Biatah Bidayuh 2 KRONIKEL 32 Bible Online

2 KRONIKEL 32 - Biatah Bidayuh bible

2 KRONIKEL 32

¹Ripas pingandai pingandai anŭ, adi ngga Raja Hezekiah bituan di TUHAN ngga tŭtŭd, Sennacherib adi raja-empaya Assyria, nyerang Judah. Ayŭh nyikapung kupo kupo adi bikuta ka nggen ukum bada bara tibaran soldadu-i nyirubuh ka mŭrŭt sindung kupo.

²Kan Hezekiah kiris Sennacherib mbŭh re nyerang gŭh Jerusalem,

³ayŭh ngga bara pinurung-i matŭd pikir an matŭd aran piin di sapa kupo, isa daya Assyria dŭh biyŭn piin kan ngara mbŭh sindŭk Jerusalem. Bara pinurung anŭ taban bara bara daya ruah ka nabat rubang rubang piin, isa piin mating aman so rubang rubang piin anŭ.

⁵Raja nyurat sindung kuta, pijog tawā dieh, ngga bada-i rabis tagap, ka ndai sindung di tura ka sapa-i. Ngga nambah anŭ, ayŭh nyurat sindung adi dog pijog di tarun yŭn tana dog ngisi di tura ka timor parad Jerusalem adi amba. Ayŭh gŭh bada bagŭ jarok ngga pinangin dog ndai.

⁶Ayŭh bada sopŭrŭg dari di kupo di ribo kuasa pingubak bara soldadu ka nggen ukum bada ngara tikuruk di pakan di tiban-bās kupo. Ayŭh nang di ngara,

⁷“Angān dŭh siŭn dŭh birani ka dŭhnyah bada atin ngan arot. Dŭhnyah taru raja-empaya Assyria bait bara tibaran soldadu adi-i taban. Ata biyŭn kuasa adi rabis bās di parad ta so anŭ adi di parad-i.

⁸Ayŭh biyŭn kuasa manusia, pak ata biyŭn TUHAN adi Tapa ta turung ata biperang.” Bara daya dog ngatat ngga pinganang anŭ adi so raja ngara.

⁹Mua tian ripas anŭ, darŭm Sennacherib ngga bara tibaran soldadu-i gibabŭ di Lachish, ayŭh pait pinganang ati ka Hezekiah ngga daya Judah adi agi ngga ayŭh di Jerusalem:

¹⁰“Aku, Sennacherib, adi Raja-empaya Assyria, siken ani anŭ adi bada angān birani babŭ rŭŭ di Jerusalem adi mbŭh dog nyikapung.

¹¹Hezekiah kidaan di angān nang TUHAN adi Tapa ngan re nyiramat angān so kuasa ami, pak Hezekiah kadong angān ka re bada angān kabŭs sikirau, dŭh man dŭh nok.

¹²Ayŭh inŭh adi pirusak bari-sambah ngga mija-sambah ka komŭnŭ bada daya Judah ngga daya Jerusalem nyambah ka badang kimanyan di ndi mija-sambah adŭ.

¹³Dŭh kah angān puan kayuh adi tayung-babuk ku ngga adi aku mbŭh ndai di daya bangsa bŭkŭn? Agi kah tapa so tadŭ tadŭ bangsa anŭ nyiramat daya-i so raja-empaya Assyria?

¹⁴Sinde tapa tapa sopŭrŭg rais anŭ mbŭh nyiramat rais ngara so kieh? Jadi ani meh adi bada angān pikir Tapa ngan dapŭd nyiramat angān?

¹⁵Dŭhnyah tandah Hezekiah nyibudo ka kadong angān mun anŭ. Dŭhnyah sabah ayŭh! Mating tapa bŭkŭn adi tungang nyiramat daya-i so raja-empaya Assyria. Ka simŭnŭ gŭh Tapa ngan anŭ dŭh re tungang nyiramat angān!”

¹⁶Bara pinurung raja Assyria mbŭh nang gŭh kayuh adi raru sipŭ rawan TUHAN Tapa ka rawan Hezekiah, adi urun TUHAN.

¹⁷Surat adi raja-empaya nuris mbŭh natang TUHAN, adi Tapa Israel. Surat anŭ nang, “Tapa tapa bangsa bŭkŭn bŭn nyiramat daya-i so kuasa ku, ka simŭnŭ gŭh Tapa Hezekiah dŭh re nyiramat daya-i so aku.”

¹⁸Bara pinurung anŭ nyirais nang anŭ darŭm piminyu Hebrew ngga-i pirawan ka pijimŭ daya Jerusalem adi di tunduh sindung kupo, siŭn ngara sanang sirabut kupo anŭ.

¹⁹Ngara minyu rawan Tapa Jerusalem mun ngara minyu rawan tapa tapa daya bangsa bŭkŭn, adi tibudo dog ndai manusia.

²⁰Komŭnŭ Raja Hezekiah ngga nabi Isaiah anak Amoz bidua ka Tapa mite turung so Ayŭh.

²¹Komŭnŭ TUHAN pait ndi naan malaikat adi siŭ bara soldadu ngga pingubak pingubak bara tibaran soldadu Assyria. Ka raja-empaya pari ka Assyria mangŭh. Ndi andu kan ayŭh di ramin-sambah tapa-i, kada so bara anak dari-i siŭ ayŭh ngga pedang.

²²Simŭnŭ inŭh TUHAN nyiramat Raja Hezekiah ngga daya Jerusalem so kuasa Sennacherib, adi raja-empaya Assyria, ka so pinganyu pinganyu ngara adi bŭkŭn. Ayŭh bada ngara udip darŭm damai[39] ngga sopŭrŭg rais adi maning anŭ.

²³Bagŭ daya mandŭg ka Jerusalem, taban pinganggen sadis ka TUHAN ngga pinganggen ka Hezekiah. So nganŭ sopŭrŭg bangsa bŭkŭn stabi di Hezekiah.

²⁴Kira ka di tipuh anŭ Raja Hezekiah birandam ka sindŭk re kabŭs. Ayŭh bidua, ka TUHAN nggen di ayŭh tandā nang ayŭh re bua.

²⁵Pak Hezekiah mbŭh raru sambuh ka dŭh biyŭn atin trima kaseh yŭn kayuh adi TUHAN mbŭh ndai di ayŭh, ka Judah ngga Jerusalem meh adi sangsara bada-i.

²⁶Pak sikasŭn-i, Hezekiah ngga bara daya Jerusalem pirapat adŭp ngara, ka TUHAN dŭh ngukum ngara adŭ-i ripas Hezekiah mbŭh kabŭs.

²⁷Raja Hezekiah jadi raru kaya, ka bara daya stabi di ayŭh. Ayŭh biyŭn birit birit pinyirikŭn dog ndai yŭn mas-i, pirak, batuh brega, rapah, pinangin, ka kayuh kayuh adi bŭkŭn adi brega.

²⁸Nambah ka anŭ, ayŭh bada ramin pinyirikŭn dog pijog yŭn nyikŭn gandom, wain, ka inyo kanā; kandang yŭn sapi sapi-i; ka buwang yŭn biri-i.

²⁹Nambah ka anŭ, Tapa nggen di ayŭh biri ngga sapi ngga raru bagŭ kaya raja-i adi bŭkŭn ndŭg ka ayŭh dapŭd pijog kupo kupo bŭkŭn.

³⁰Raja Hezekiah inŭh adi nabat aran piin so Rubang piin Gihon ka piruah piin bada aman so rubang di ribo tana ka darŭm kupo Jerusalem. Hezekiah mujur di sopŭrŭg kayuh adi ndai-i,

³¹ndŭg ka kan bara pingarun adi daya Babylonia mandŭg di siken pasar kayuh saruh adi mbŭh jadi di tarun tana anŭ, Tapa tandah Hezekiah nggen pinyinam-i amai raan puan isi atin-i.

³²Sopŭrŭg pingandai Raja Hezekiah adi bŭkŭn ngga pinyitŭtŭd-i di TUHAN agi dog nuris darŭm Surat Visi Nabi Isaiah Anak Amoz ngga darŭm Surat Dundan bara Raja Judah ngga Israel.

³³Hezekiah kabŭs ka dog kubur di kubur raja adi tura ka sambu. Sopŭrŭg daya Judah ngga daya Jerusalem munāng ayŭh ngga stabi di tika ayŭh kabŭs. Anak-i Manasseh gati ayŭh jadi raja.