Read Biatah Bidayuh 2 KRONIKEL 33 Bible Online

2 KRONIKEL 33 - Biatah Bidayuh bible

2 KRONIKEL 33

¹Manasseh, simŭng duwŭh sawa umbur-i kan ayŭh jadi raja Judah, ka ayŭh mritah di Jerusalem sitian 55 sawa.

² Tunda pingandai arap bangsa adi TUHAN pibu darŭm daya-I masang mŭrŭt rais anŭ, Manasseh bidosa rawan TUHAN.

³Ayŭh pari pijog tarun yŭn bisambah adat karŭm adi sama-i Hezekiah muko nyirubuh. Ayŭh pijog mija mija-sambah ngga nyambah Baal, ndai gayŭn gayŭn tapa Asherah, ka nyambah bitang.

⁴ Ayŭh pijog mija mija-sambah adat karŭm darŭm Ramin TUHAN, tarun yŭn adi TUHAN nang yŭn nyambah adŭp-I ndŭg situi tui.

⁵Di duwŭh badag Ramin TUHAN ayŭh pijog mija mija-sambah ngga nyambah bitang.

⁶Ayŭh nyadis anak anak dari adŭp-i di Rubān Hinnom ndu sadis badang. Ayŭh nanung ka ndai biruri karŭm ka bisiken ngga daya adi pandai kidaan nasip ka ngara adi pandai minyu ngga simangi daya adi mbŭh kabŭs. Ayŭh mbŭh bana bidosa rawan TUHAN ka mbŭh kinuas Ayŭh.

⁷ Ayŭh na ndi gayŭn di Ramin TUHAN, tarun yŭn adi Tapa nang di David ngga di anak-i Solomon: “Digiti di Jerusalem, darŭm Ramin Ku ati, inŭh tarun yŭn adi Aku mbŭh mien so sopŭrŭg tarun tana simŭng duwŭh tibaran-asar Israel ndu tarun yŭn Aku dog nyambah.

⁸Ka kambŭi daya Israel tunda sopŭrŭg pesan Ku ka sita sopŭrŭg Ukum-adat adi urun Ku Moses mbŭh nggen di ngara, Aku dŭh re bada ngara dog pibu so tana adi Aku mbŭh nggen di tayung-babuk ngara.”

⁹Manasseh taban daya Judah rabis bidosa so bangsa bangsa adi TUHAN mbŭh pibu darŭm daya-I masang mŭrŭt rais anŭ.

¹⁰Sunggu TUHAN bakan Manasseh ngga bara daya-i, ngara abah dingah pinyibakan anŭ.

¹¹Jadi TUHAN tandah bara pingubak bara tibaran soldadu Assyria nyerang Judah. Ngara nakap Manasseh, nyikait sikait di ayŭh, muak ayŭh ngga parik basi, ka taban ayŭh ka Babylon.

¹²Darŭm sangsara ayŭh pirapat adŭp-i, pari ka TUHAN adi Tapa-i, ka bandar mite turung so Ayŭh.

¹³Tapa trima ka nam dua Manasseh ka bada ayŭh pari ka Jerusalem di mritah dinge. Anŭ mbŭh kiren di Manasseh nang TUHAN inŭh sawŭ Tapa.

¹⁴Ripas anŭ, di parad tura ka timor Kupo David, Manasseh bada rabis bigatung sindung adi tura ka sapa sindung kupo, so rubān adi sindŭk rubang piin Gihon nuju utara ka Tiban Iken ngga tarun yŭn kupo dŭn Ophel. Ayŭh gŭh bada ndi naan pingubak soldadu nguasa ndi tibaran soldadu di barang kupo adi bikuta di Judah.

¹⁵Ayŭh kadi so Ramin TUHAN tapa tapa saruh ngga gayŭn adi ayŭh mbŭh na diginŭ, ka mija mija-sambah adat karŭm adi ko di tunduh sandah di yŭn Ramin TUHAN mijog ka di tarun bŭkŭn di Jerusalem; ayŭh taban sopŭrŭg kayuh anŭ ka sapa kupo ka taran-i.

¹⁶Ayŭh gŭh ndai bada pari kana mija-sambah di yŭn TUHAN dog nyambah, ka ayŭh nyadis sadis bidingan ngga sadis trima kaseh di tunduh-i. Ayŭh nggen ukum bada sopŭrŭg daya Judah nyambah TUHAN adi Tapa Israel.

¹⁷Sunggu daya babŭ jugan sadis di tarun tarun yŭn bisambah adi bŭkŭn, ngara jugan-i ka TUHAN adŭ.

¹⁸Sopŭrŭg pingandai Manasseh adi bŭkŭn, dua adi-i ndai ka Tapa-i, ka pinganang so nabi nabi adi minyu ngga ayŭh ngga adŭn TUHAN, adi Tapa Israel, mbŭh dog nuris darŭm Surat Dundan bara Raja Israel.

¹⁹Dua raja samŭn pinyinam-i so Tapa, ka dundan pasar dosa adi ayŭh mbŭh ndai sibayuh ayŭh marik pimudip-i pari ka Tapa -- arap adi-i ndai, tarun tarun yŭn bisambah adat karŭm ngga tandā tandā pinatŭng tapa Asherah adi-i ndai ngga tibudo adi-i nyambah -- mbŭh dog nuris sopŭrŭg-i darŭm Surat Dundan bara Nabi.

²⁰Manasseh kabŭs ka dog kubur di istana, ka anak-i Amon gati ayŭh jadi raja.

²¹Amon mbŭh 22 sawa umbur-i kan ayŭh jadi raja Judah, ka ayŭh mritah di Jerusalem sitian duwŭh sawa.

²²Mun sama-i Manasseh, ayŭh bidosa rawan TUHAN, ka ayŭh nyambah tibudo adi sama-i ko nyambah.

²³Pak dŭh mun sama-i, ayŭh dŭh pirapat adŭp-i ka TUHAN; ayŭh mbŭh rabis bidosa so sama-i.

²⁴Bara pinurung Amon bipekat rawan ayŭh ka siŭ ayŭh di istana.

²⁵Daya Judah siŭ daya adi siŭ Amon ka bada anak-i Josiah jadi raja.