Read Biatah Bidayuh 2 KRONIKEL 34 Bible Online

2 KRONIKEL 34 - Biatah Bidayuh bible

2 KRONIKEL 34

¹ Josiah mbŭh mai sawa umbur-i kan ayŭh jadi raja Judah, ka ayŭh mritah di Jerusalem sitian 31 sawa.

²Ayŭh ndai kayuh adi pimunos asŭng TUHAN; ayŭh tunda suto danding so babuk-i Raja David, tunda ukum ukum-adat Tapa ngga siabo asŭng-i.

³Di sawa adi mai darŭm pinyipritah Josiah, darŭm ayŭh gibabŭ mara, ayŭh piguru nyambah Tapa babuk-i David. Pat sawa ripas anŭ ayŭh piguru nyirubuh tarun yŭn bisambah adat karŭm, tandā tandā pinatŭng tapa Asherah, ngga sopŭrŭg tibudo adi bŭkŭn.

⁴ So ka pinyipesan-i mija mija-sambah adi yŭn Baal dog nyambah dog pirandŭk, ka mija mija-sambah kimanyan adi sindŭk-i dog nyirubuh. Ngara pirandŭk ka bada jadi dabu gayŭn Asherah ngga sopŭrŭg tibudo adi bŭkŭn ka komŭnŭ nabur dabu-i di kubur daya adi ko bisadis ka ngara.

⁵ Ayŭh badang turang turang bara imam adat karŭm di mija-sambah di yŭn ngara bisambah. Darŭm ndai simŭnŭ, ayŭh bada Judah ngga Jerusalem pari bisig nanyam ka adat.

⁶Ayŭh ndai simŭnŭ gŭh di kupo kupo ka di tarun yŭn adi rusak di Manasseh, Ephraim, ngga Simeon, ka jeh ka utara ndŭg Naphtali.

⁷Di ndi tarun tana Pritah Utara ayŭh pirandŭk mija mija-sambah ngga tandā tandā pinatŭng Asherah, pirandŭk bada jadi dabu tibudo tibudo, ka mape bada randŭk mija-sambah kimanyan. Komŭnŭ ayŭh pari ka Jerusalem.

⁸Di sawa adi simŭng mai darŭm pinyipritah-i, ripas ayŭh muko pibisig rais ka Ramin TUHAN, anŭ inŭh pirŭŭ sambah adat karŭm, Raja Josiah pait taruh naan daya bada nyurat Ramin TUHAN Tapa: Shaphan anak Azaliah, Maaseiah, adi gabenor Jerusalem, ngga Joah anak Joahaz, pinurung adi bās pangkat.

⁹Duit adi dog nguruk ngara adi tukang jaga di Ramin TUHAN, anŭ inŭh daya Levi, dog nyerah ka tangan Hilkiah adi Imam Bās. (Anŭ dog nguruk so daya Ephraim ngga Manasseh ka so ngara adi bŭkŭn di Pritah Utara, ka so daya Judah, Benjamin, ngga Jerusalem.)

¹⁰Duit anŭ dog nyerah ka tangan ngara adi tukang nguasa kraja nyurat Ramin TUHAN, ka ngara nggen-i di

¹¹bara tukang kayuh ngga bara adi tukang pijog ngga miris batuh ka betang betang kayuh adi dog pakai ngga nyurat ramin adi raja raja Judah mbŭh tandah rusak.

¹²Bara daya adi ndai kraja inŭh adi raru jujur. Ngara dog nguasa pat naan daya Levi: Jahath ngga Obadiah so manak Merari, ka Zechariah ngga Meshullam so manak Kohath. (Sopŭrŭg daya Levi inŭh daya adi sukup pandai main musik.)

¹³Bara daya Levi adi bŭkŭn inŭh tukang nguasa kraja muat preka piramin ka tukang ngatur daya di barang masam kraja, ka adi bŭkŭn tukang nyikŭn rekod puan kah jadi daya adi tukang jaga.

¹⁴Di tika duit dog taban ruah so birit pinyirikŭn, Hilkiah dapŭd ndi surat Ukum-adat TUHAN, ukum-adat adi Tapa mbŭh nggen di Moses.

¹⁵Ayŭh nang di Shaphan, “Aku mbŭh dapŭd ndi surat Ukum-adat di Ramin TUHAN.” Ayŭh nggen-i di Shaphan surat anŭ,

¹⁶ka Shaphan taban-i ka raja ka nang, “Kieh mbŭh ndai sopŭrŭg kayuh adi kaam bada.

¹⁷Kieh mbŭh taban duit anŭ adi ko dog nyikŭn di Ramin TUHAN ka nyerah-i ka bara adi nyiraja samŭn ngara adi ngatur kraja ngara.”

¹⁸Komŭnŭ ayŭh nang, “Ati surat adi Hilkiah mbŭh nggen di aku.” Ka ayŭh basa-i bana yŭn raja.

¹⁹Kan raja dingah isi surat anŭ, ayŭh nyiratak piraka-i darŭm susah

²⁰ka nggen pinganang ati ka Hilkiah, ka Ahikam anak Shaphan, ka Abdon[40] anak Micaiah, ka Shaphan, adi tukang pinuris, ka Asaiah, adi pinurung raja:

²¹“Panu di bisiken ngga TUHAN yŭn ku ka yŭn bara daya adi babŭ di Israel ngga di Judah, pasar ajar di surat ati. TUHAN baji di ata sabab tayung-babuk ta dŭh tunda pinganang TUHAN ka dŭh ndai kayuh adi surat ati nang dŭh siŭn dŭh dog ndai.”

²²So ka pesan raja, Hilkiah ngga ngara adi bŭkŭn matak di bisiken ngga ndi naan dayung dŭn Huldah, nabi adi rŭŭ di parad Jerusalem adi bauh. (Banŭh-i Shallum, adi anak Tikvah ngga sukuh Harhas, inŭh adi tukang nguasa piraka ambu di Ramin TUHAN.) Ngara kidaan di ayŭh kayuh adi mbŭh jadi,

²³ka ayŭh bada ngara pari ka raja ka kidaan

²⁴pinganang ati so TUHAN: “Aku re ngukum Jerusalem ka sopŭrŭg daya-i ngga pangu adi dog nuris darŭm surat adi dog basa yŭn raja.

²⁵Ngara mbŭh tirawan Aku ka mbŭh jugan sadis ka tapa tapa bŭkŭn, ka mbŭh kinuas Aku ngga sopŭrŭg pingandai ngara. Jerusalem mbŭh kinuas Aku ka baji Ku dŭh re pura.

²⁶Ka yŭn adŭp raja, ati inŭh kayuh adi Aku, TUHAN Tapa Israel, nang: Kuu mbŭh dingah kayuh adi dog nuris darŭm surat anŭ,

²⁷ka kuu mbŭh marik pimudip mu pari ka Aku ka pirapat adŭp mu di sirung jawin Ku, nyiratak piraka mu ka sien, ka kuu dingah Aku re ngukum Jerusalem ngga daya-i. Aku mbŭh dingah dua mu,

²⁸ka ukum adi Aku re bada nyatŭk Jerusalem dŭh re mandŭg adŭ-i kan kuu mbŭh kabŭs. Aku re bada kuu kabŭs ngga sanang.” Ngara pari ka yŭn Raja Josiah ngga pinganang anŭ.

²⁹Raja Josiah bagan sopŭrŭg pinguru Judah ngga Jerusalem,

³⁰ka ngara samah di ka Ramin TUHAN, ayō bara imam ka bara daya Levi ka sopŭrŭg bara daya adi kaya bait sirata. Di sirung jawin sopŭrŭg ngara, raja bana basa sopŭrŭg isi surat simanya anŭ, adi dog dapŭd di Ramin TUHAN.

³¹Ayŭh mijog sindŭk tiang bās adi taŭn yŭn raja[41] ka ndai simanya ngga TUHAN an nurut pinganang-I, an sita ukum ukum-adat ngga pinyipesan-I ngga siabo atin ka ngga siabo simangi-i, ka ndai nanyam adi mbŭh dog nuris darŭm surat anŭ.

³²Ayŭh bada daya Benjamin ngga barang naan daya bŭkŭn adi agi di Jerusalem bijanji an sita simanya anŭ. Jadi daya Jerusalem tunda kayuh adi mbŭh dog miratak simanya adi ngara mbŭh ndai ngga Tapa tayung-babuk ngara.

³³Raja Josiah pirabur sopŭrŭg tibudo adi sipŭ anŭ adi di darŭm tarun tana Israel, ka sitian ayŭh udip, ayŭh bada daya bituan di TUHAN, adi Tapa tayung-babuk ngara.