Read Biatah Bidayuh 2 KRONIKEL 36 Bible Online

2 KRONIKEL 36 - Biatah Bidayuh bible

2 KRONIKEL 36

¹Daya Judah mien Joahaz anak Josiah, ka nginyo ayŭh jadi raja di Jerusalem.

²Joahaz mbŭh 23 sawa umbur-i kan ayŭh jadi raja Judah, ka ayŭh mritah di Jerusalem sitian taruh buran.

³Neco adi raja Egypt nakap ayŭh jadi daya-takap ka bada Judah bayar ndu takŭd 3,400 kilogram pirak ngga 34 kilogram mas.

⁴ Neco bada Eliakim adi jurud Joahaz jadi raja Judah ka nukar dŭn-i jadi Jehoiakim. Joahaz dog taban Neco ka Egypt.

⁵ Jehoiakim mbŭh 25 sawa umbur-i kan ayŭh jadi raja Judah. Ayŭh mritah di Jerusalem sitian simŭng ndi sawa. Ayŭh bidosa rawan TUHAN adi Tapa-i.

⁶ Nebuchadnezzar adi raja Babylonia nyerang Judah, nakap Jehoiakim, ka taban ayŭh ka Babylonia dog muak ngga parik basi.

⁷Nebuchadnezzar taban ngga bu kada rata Ramin TUHAN ka na-i di istana adŭp-i di Babylon.

⁸Sopŭrŭg kayuh adi Jehoiakim ndai, samŭn kraja pingandai-i adi sipŭ ngga adi arap, agi dog nuris darŭm Surat Dundan bara Raja Israel ngga Judah. Anak-i Jehoiachin gati ayŭh jadi raja.

⁹Jehoiachin mbŭh simŭng mai[42] sawa umbur-i kan ayŭh jadi raja Judah. Ayŭh mritah di Jerusalem sitian taruh buran simŭng andu. Ayŭh gŭh bidosa rawan TUHAN.

¹⁰ Kan-i mbŭh tipuh bunga, Raja Nebuchadnezzar taban Jehoiachin ka Babylonia jadi daya-takap, ka taban ngga bu rata Ramin TUHAN. Komŭnŭ Nebuchadnezzar bada Zedekiah adi tua[43] Jehoiachin jadi raja Judah ngga Jerusalem.

¹¹ Zedekiah mbŭh 21 sawa umbur-i kan ayŭh jadi raja Judah. Ayŭh mritah di Jerusalem sitian simŭng ndi sawa.

¹²Ayŭh bidosa rawan TUHAN ka dŭh an pirapat adŭp-i dingah Nabi Jeremiah, adi minyu pinganang TUHAN.

¹³ Zedekiah rawan Raja Nebuchadnezzar, adi ko takan ayŭh bada bipayu ngga adŭn Tapa ayŭh re nundok di Raja Nebuchadnezzar. Ayŭh bagŭg abah marik pimudip-i pari ka TUHAN, adi Tapa Israel.

¹⁴Nambah ka anŭ, bara pinguru Judah, bara imam, ngga bara daya tunda suto danding pimudip bidosa bangsa bangsa adi maning ngara adi nyambah tibudo. Ngara nyembar Ramin TUHAN, adi adŭp TUHAN mbŭh bada kudus.

¹⁵TUHAN, adi Tapa tayung-babuk ngara, muko ari pait bara nabi bada bakan daya-I, sabab Ayŭh raan nyiramat ngara ngga Ramin TUHAN.

¹⁶Pak ngara napat bara pinyisung Tapa, dŭh tambit piduri di pinganang-I ka tawŭh bara nabi-I, ndŭg ka pinŭbŭn-i TUHAN mbŭh raru baji di daya-I ka mating aran ngara re tungang pirupas adŭp-i so ukum-I.

¹⁷ Jadi TUHAN bada raja Babylonia nyerang ngara. Raja Babylonia siŭ bara dari Judah adi mara, di darŭm Ramin TUHAN ani. Ayŭh dŭh biyŭn masi di tadŭ tadŭ daya, mara bait tuuh, dari bait dayung, mandam bait dŭh mandam. Tapa nyerah sopŭrŭg ngara di ayŭh.

¹⁸Raja Babylonia sirapas kayuh darŭm Ramin TUHAN, pinyirikŭn-rata Ramin TUHAN, ka pinyikaya raja samŭn tung bara pinurung-i, ka taban sopŭrŭg-i ka Babylon.

¹⁹Ayŭh sigot Ramin TUHAN ngga kupo, samŭn sopŭrŭg istana ngga kaya raja-i, ka nyirubuh sindung kupo.

²⁰Ayŭh taban sopŭrŭg ngara adi babŭ udip ka Babylonia, di yŭn ngara jadi urun bituan di ayŭh ka di bara sesang-i ndŭg ka jaman Empaya Persia makat.

²¹ Jadi kayuh adi TUHAN muko diŭ kidaan so baba nabi Jeremiah mbŭh jadi bitŭtŭk: “Tarun tana ati re nyibawang sitian ju puru sawa, ngga gati ju puru sawa rŭŭ-paya Sabbath[44] adi bŭn dog sita.”

²²Di sibungas sawa Cyrus so Persia jadi raja-empaya,[45] TUHAN bada kayuh adi-I nang so baba nabi Jeremiah jadi bitŭtŭk. Ayŭh nguasa atin Cyrus bada nuris pesan ati ka bada-i dog basa di barang yŭn darŭm empaya-i:

²³ “Ati inŭh pesan Cyrus, adi Raja-empaya Persia. TUHAN, Tapa adi pinguasa di Shorga, mbŭh bada aku jadi pimritah di ndi ong ong ka mbŭh nggen di aku pinanggong pijog Ramin yŭn-I di Jerusalem di tarun tana Judah. Madin, sopŭrŭg ngan adi daya Tapa, panu di kamanŭ, ka isa-i TUHAN adi Tapa ngan agi ngga angān.”