Read Biatah Bidayuh 2 KRONIKEL 4 Bible Online

2 KRONIKEL 4 - Biatah Bidayuh bible

2 KRONIKEL 4

¹ Raja Solomon biyŭn ndi mija-sambah Timaga, adi 9 mita misagi ka 4.5 mita bigatung.

²Ayŭh gŭh ndai tong timaga, 2.2 mita tŭrŭp-i, 4.4 mita pimutas baba-i, ka 13.2 mita pinyidakŭp-i.

³Maning sapa bibis tong anŭ[9] agi duwŭh jari abuh, bisarŭt duwŭh. Abuh anŭ darŭm gayŭn dari sapi, adi dog ndai sinyadi ngga tong anŭ.

⁴Tong anŭ dog sangan di tunduh simŭng duwŭh sapi timaga adi jawin-i nura sapa, taruh nura ka utara, taruh nura ka barat, taruh nura ka siratan, taruh nura ka timor.

⁵Bŭngŭn tong anŭ 75 milimita tabar-i. Bibis tong anŭ mun bibis saker, mirimbeh ka sapa mun dawŭn rarak bunga. Tong anŭ tungang ngisi kurang rabis 60,000 lita.

⁶ Ngara gŭh ndai simŭng sambong, rimŭh an dog na di tura ka siratan Ramin TUHAN ka rimŭh an dog na di tura ka utara. Dudu sambong anŭ an dog pakai yŭn ngu tatad dāng adi dog badang ndu sadis. Piin adi darŭm tabande tong inŭh yŭn bara imam ngu tangan ngara.

⁷ Ngara ndai simŭng rika-mas prita nanyam ka suto adi muko dog natu, ka simŭng mija, ka na sopŭrŭg anŭ di birit bās Ramin TUHAN, rimŭh rika prita ngga rimŭh mija di barang parad. Ngara ndai gŭh siratus makuk mas.

⁹Ngara ndai badag tura ka darŭm yŭn bara imam, ka simŭnŭ gŭh badag tura ka sapa. Rubek tiban yŭn tiban tiban di asah duwŭh badag anŭ dog ndai so timaga.

¹⁰Tong anŭ dog na sindŭk sikuh Ramin TUHAN tura ka siratan-timor.

¹¹Huram gŭh ndai priok, sanduk, ngga makuk. Ayŭh ngamas ndai sopŭrŭg kayuh ati adi-i mbŭh bijanji ngga Raja Solomon an ndai yŭn Ramin TUHAN: Duwŭh tiang bās. Duwŭh ubak adi mun makuk di tibung tiang tiang bās anŭ. Butik adi birasŭk rasŭk mun parik basi di ubak ubak soduwŭh tiang bās anŭ. 400 buwa delima timaga dog ngatur duwŭh baris kirurung butik di barang ubak tiang tiang bās. Simŭng[10] krita timaga. Simŭng sambong. Tong. Simŭng duwŭh dari sapi adi yŭn sangan tong anŭ. Dudu priok, sanduk, ka sirapang. Huram ndai sopŭrŭg kayuh anŭ[11] so timaga adi ko dog ngusu so pinyibada Raja Solomon, yŭn pakai di Ramin TUHAN.

¹⁷Raja bada sopŭrŭg anŭ dog ndai di tana-riyat di asah Sukkoth ngga Zeredah[12] di Rubān Jordan.

¹⁸Mbŭh raru bagŭ kayuh anŭ dog ndai ndŭg ka mating daya puan kiang-ki prungun timaga dog pakai.

¹⁹Raja Solomon gŭh bada pingakas pingakas Ramin TUHAN dog ndai so mas: mija-sambah ka mija mija yŭn ruti adi dog jugan ka Tapa;

²⁰rika rika prita ngga prita dog ndai so tigŭrŭ mas adi an dog tung di jawin Yŭn adi Siabo Kudus, nanyam adi mbŭh dog ngatur;

²¹abuh abuh bunga, prita, ka satip;

²²pimura prita, makuk, pinggen yŭn kimanyan, ka tipaku ngga taban bam apui. Sopŭrŭg kayuh anŭ dog ndai so tigŭrŭ mas. Tura ka sapa tiban Ramin TUHAN ngga tiban tiban Yŭn adi Siabo Kudus dog nurap ngga mas.