Read Biatah Bidayuh 2 KRONIKEL 5 Bible Online

2 KRONIKEL 5 - Biatah Bidayuh bible

2 KRONIKEL 5

¹ Kan Raja Solomon ngamas ndai sopŭrŭg kraja yŭn Ramin TUHAN, ayŭh nyikŭn di birit birit pinyirikŭn Ramin TUHAN sopŭrŭg kayuh adi sama-i David mbŭh nitah ka TUHAN -- pirak, mas, ka kayuh kayuh adi bŭkŭn.

² Komŭnŭ Raja Solomon bagan sopŭrŭg pinguru tibaran-asar ngga manak Israel bada tikuruk di Jerusalem, amai re tambit Pati Simanya TUHAN so Zion, Kupo David,[13] ka Ramin TUHAN.

³Sopŭrŭg ngara tikuruk di tika Gawai Bari-dawŭn.

⁴Kan sopŭrŭg pinguru mbŭh tikuruk, daya daya Levi pakat Pati Simanya

⁵ka tawid-i ka Ramin TUHAN. Bara imam ngga daya Levi mindah gŭh Bari TUHAN ngga sopŭrŭg pingakas-i ka Ramin TUHAN.

⁶Raja Solomon ngga sopŭrŭg daya Israel tikuruk di jawin Pati Simanya ka nyadis raru bagŭ biri ngga sapi sapi ndŭg ka mbŭh dŭh tungang dog mirang.

⁷Komŭnŭ bara imam tawid Pati Simanya anŭ ka darŭm Ramin TUHAN ka na-i di darŭm Yŭn adi Siabo Kudus, di ribo cherubim.

⁸Urad cherubim adi tiburai, nutu Pati anŭ samŭn pinawid.

⁹Tŭbŭn pinawid anŭ dapŭd dog kiris so jawin Yŭn adi Siabo Kudus, pak dŭh so yŭn adi bŭkŭn. (Pinawid anŭ babŭ diginŭ madin.)

¹⁰ Mating kayuh bŭkŭn darŭm Pati Simanya anŭ adŭ-i duwŭh kiping batuh adi Moses ko na diginŭ dawŭ-i di Darŭd Sinai, di andu TUHAN ndai simanya ngga daya Israel darŭm ngara ruah so Egypt.

¹¹ Sopŭrŭg imam adi agi diginŭ, dŭh kira tibaran aki ndi, mbŭh pibisig adŭp ngara. Ka sopŭrŭg daya Levi adi pimain musik, anŭ inŭh Asaph, Heman, ngga Jeduthun, ngga bara so manak ngara, nēn piraka banang linen. Daya Levi mijog sindŭk parad timor mija-sambah ngga sigager ka kachapi, ka ayō ngara agi 120 naan imam mambak trompet. Sirŭŭn bara pinyanyi birasŭk dog kayak ngga jawŭn trompet, sigager, ka pingakas pimain adi bŭkŭn, darŭm ngara nyanyi muji TUHAN nang: “Muji meh TUHAN, sabab Ayŭh kana, Ka pinyirindu-I inŭh tan adu adu.” Darŭm bara imam ruah so Ramin TUHAN, gŭgŭh abun adi jawa ngisi-i ngga jawa bragah TUHAN, ndŭg ka ngara dŭh tungang pijuu simayang.