Read Biatah Bidayuh 2 KRONIKEL 6 Bible Online

2 KRONIKEL 6 - Biatah Bidayuh bible

2 KRONIKEL 6

¹Komŭnŭ Raja Solomon bidua, “TUHAN, Kaam raan dŭ rŭŭ darŭm abun adi karŭm.

²Madin aku mbŭh pijog ramin adi grua yŭn Mai, tarun yŭn Kaam rŭŭ ndŭg situi tui.”

³Sopŭrŭg daya Israel mijog diginŭ. Raja bigiring nura ngara ka mite Tapa nyiberkat ngara.

⁴ Ayŭh nang, “Puji ka TUHAN adi Tapa Israel! Ayŭh mbŭh bada bitŭtŭk janji adi-I ndai ngga sama ku David kan Ayŭh nang di ayŭh,

⁵‘So andu adi ngga Aku taban daya Ku ruah so Egypt ndŭg madin, Aku gi-bŭn mien kupo aki ndi di tana Israel ndu tarun yŭn pijog ramin adi yŭn Aku dog nyambah, ka Aku mating mien asi asi daya bada nguru daya Ku Israel.

⁶Pak Aku mbŭh mien Jerusalem ndu tarun yŭn Aku dog nyambah, ka kuu, David, re mritah daya Ku.’ ”

⁷Ka Solomon pijuu minyu, “Sama ku David bisatur an pijog ndi ramin yŭn nyambah TUHAN adi Tapa Israel,

⁸pak TUHAN nang di ayŭh, ‘Batur pinyiraan mu adi raan pijog ndi ramin yŭn Ku,

⁹pak kuu dŭh re pijog-i. Anak mu, anak adŭp mu, adi re pijog ramin Ku.’

¹⁰“Madin TUHAN mbŭh bada bitŭtŭk janji-I: Aku mbŭh gati sama ku jadi raja Israel, ka aku mbŭh pijog ndi ramin yŭn nyambah TUHAN adi Tapa Israel.

¹¹Aku mbŭh na Pati Simanya di darŭm Ramin TUHAN, adi brisi ngga kiping kiping batuh simanya adi TUHAN mbŭh ndai ngga daya Israel.”

¹²Komŭnŭ di sirung jawin daya bagŭ Solomon di ka mijog di jawin mija-sambah ka pakat tangan-i bidua.

¹³(Solomon muko ndai ndi takah timaga, na-i di yun badag anŭ. Takah anŭ 2.2 mita misagi ka 1.3 mita bigatung. Ayŭh maad takah anŭ, sidikang di yŭn daya bagŭ dapŭd kiris ayŭh, ka pakat tangan-i ka shorga.)

¹⁴Ayŭh bidua, “TUHAN adi Tapa Israel, di rangit bait di ong mating tapa mun Kaam. Kaam bada bitŭtŭk simanya Mai ngga daya Mai ka kiren pinyirindu Mai kan ngara nundok di Kaam ngga siabo atin ngara.

¹⁵Kaam mbŭh bada bitŭtŭk janji adi Kaam mbŭh ndai ngga sama ku David; andu ati sopŭrŭg bang piminyu mbŭh jadi bitŭtŭk.

¹⁶ Madin, TUHAN Tapa Israel, bada bitŭtŭk gŭh janji adi bŭkŭn adi Kaam mbŭh ndai ngga sama ku kan Kaam kidaan di ayŭh nang re ari agi so bara sesang-i jadi raja Israel, atas ngara nakit tunda Ukum-adat Mai mun adŭp-i

¹⁷Jadi madin, TUHAN Tapa Israel, bada jadi bitŭtŭk sopŭrŭg kayuh adi Kaam mbŭh bijanji ngga urun Mai David.

¹⁸ “Pak bisa kah Kaam, O Tapa, sawŭ rŭŭ di ong di dupan manusia? Kambŭi rangit adi siabo bigatung dŭh sadang bayah yŭn Mai, simuki meh ramin ati adi aku mbŭh pijog?

¹⁹TUHAN Tapa ku, aku ati urun Mai. Dingah dua ku ka nggen pimite ku.

²⁰ Grindung Ramin ati sandu ngga singarŭm. Kaam mbŭh bijanji nang ati inŭh yŭn Mai dog nyambah, ka dingah meh aku kan aku nura Ramin ati ka bidua.

²¹Dingah dua ku samŭn dua daya Mai Israel kan ngara nura tarun yŭn ati ka bidua. So yŭn pinyirŭŭ Mai di shorga dingah kieh ka apun kieh.

²²“Kan daya dog nyarah amai mbŭh sarah di tunduh daya bŭkŭn ka dog taban ka mija-sambah Mai di Ramin ati bada bipayu adŭp-i dŭh sarah,

²³O TUHAN, dingah so shorga ka natu aki ndi urun Mai adi sarah. Ngukum sianŭ adi sarah nanyam patut ka pirupas sianŭ adi dŭh sarah.

²⁴“Kan daya Mai dog ngarah pinganyu sabab ngara mbŭh bidosa rawan Kaam ka kan ngara pari ka Kaam ka mandŭg ka Ramin ati, ngga atin rapat bidua ka Kaam mite apun,

²⁵dingah ngara so shorga. Apun dosa daya Mai ka taban ngara pari ka tarun tana adi Kaam muko nggen di ngara ka di tayung-babuk ngara.

²⁶“Kan Kaam bitan ujen sabab daya Mai mbŭh bidosa rawan Kaam ka komŭnŭ kan ngara marik pimudip ngara pari ka Kaam ka nura Ramin ati, ngga atin rapat bidua ka Kaam,

²⁷O TUHAN, dingah ngara so shorga ka apun dosa bara urun Mai, adi daya Israel, ka ngajar ngara bada ndai kayuh adi batur. Komŭnŭ nggen ujen di tarun tana Mai ati, adi Kaam mbŭh nggen di daya Mai ndu bisaka.

²⁸“Kan apag agi di tarun tana ati, puan kah sesak-andam, puan kah pimuruh dog pirusak sabak adi paras bait dudu kadis; puan kah kan daya Mai dog nyerang pinganyu bait andam,

²⁹dingah dua ngara. Kambŭi agi daya di dupan daya Mai Israel, ngga atin susah, pakat tangan-i nuju Ramin ati buang bidua,

³⁰dingah dua-i. Dingah ngara so yŭn pinyirŭŭ Mai di shorga ka apun ngara. Kaam sadi adŭ adi puan isi atin manusia. Ndai di tunduh barang naan daya nanyam patut,

³¹isa daya Mai taru ka tŭtŭd di Kaam ka tunda pinganang Mai sitian ngara rŭŭ di tarun tana adi Kaam mbŭh nggen di tayung-babuk ngara.

³²“Kan daya tami adi rŭŭ di tarun jo dingah munki masam bās ka bikuasa Kaam ka munki masam Kaam sidia an ndai kayuh, ka komŭnŭ ngara mandŭg ka Ramin ati ka bidua ka Kaam,

³³dingah dua ngara. So shorga, di yŭn pinyirŭŭ Mai, dingah ngara ka ndai kayuh adi ngara mite Kaam ndai, isa sopŭrŭg daya di ong bisa puan Kaam ka nundok di Kaam, mun daya Mai Israel. Komŭnŭ ngara re puan nang Ramin ati adi mbŭh aku pijog inŭh tarun yŭn Mai dog nyambah.

³⁴“Kan Kaam mritah daya Mai bada di biperang rawan pinganyu ngara ka ngara bidua ka Kaam, di tadŭ yŭn ngara, nura kupo ati adi Kaam mbŭh mien ka Ramin ati adi aku mbŭh pijog yŭn Mai,

³⁵dingah dua ngara. Dingah ngara so shorga ka nggen di ngara pimanang.

³⁶“Kan daya Mai bidosa rawan Kaam -- ka mating daya adi dŭh bidosa -- ka ngga baji Mai Kaam bada pinganyu ngara ngarah ngara ka taban ngara jadi daya-takap ka tarun tana bŭkŭn, sunggu-i tarun tana anŭ jo,

³⁷dingah dua daya Mai. Kambŭi di tarun tana anŭ ngara marik pimudip ngara pari ka Kaam ka bidua ka Kaam, ngaku munki masam bidosa ka ginaka ngara, dingah dua ngara, O TUHAN.

³⁸Kambŭi di tarun tana anŭ ngara sawŭ ka ngga siabo asŭng ngara marik pimudip ngara pari Kaam ka bidua ka Kaam darŭm ngara nura tarun tana ati adi Kaam mbŭh nggen di tayung-babuk ngara, kupo ati adi Kaam mbŭh mien, ka Ramin ati adi aku mbŭh pijog yŭn Mai,

³⁹dingah dua ngara. So yŭn pinyirŭŭ Mai di shorga dingah ngara ka masi di ngara ka apun sopŭrŭg dosa daya Mai.

⁴⁰“Madin, O Tapa ku, tingga kieh ka dingah dua adi dog jugan ka Kaam di ramin ati.

⁴¹ Makat meh madin, TUHAN Tapa, ka ngga Pati Simanya, adi tandā kuasa Mai, mŭrŭt ka Ramin ati ka rŭŭ digiti ndŭg situi tui. Nyiberkat bara imam Mai di sopŭrŭg pingandai ngara, ka isa-i sopŭrŭg daya Mai sanang sabab pinyikana Mai di ngara.

⁴²TUHAN Tapa, dŭhnyah tirawan raja adi Kaam mbŭh mien. Ingat pinyirindu Mai di urun Mai David.”[14]