Read Biatah Bidayuh 2 KRONIKEL 7 Bible Online

2 KRONIKEL 7 - Biatah Bidayuh bible

2 KRONIKEL 7

¹ Kan Raja Solomon muko bidua, apui mūn so rangit ka badang sadis adi ko dog jugan, ka jawa bragah TUHAN ngisi Ramin TUHAN.

²Sabab Ramin TUHAN mbŭh puno ngga jawa bragah TUHAN, bara imam dŭh tungang mŭrŭt-i.

³ Kan daya Israel kiris apui mūn so rangit ka jawa ngisi Ramin TUHAN, ngara sidikang di tarun yŭn mijog anŭ, nyambah Tapa ka muji Ayŭh amai pinyikana-I ngga pinyirindu-I adi tan adu adu.

⁴Komŭnŭ Solomon ngga sopŭrŭg daya jugan sadis ka TUHAN.

⁵Ayŭh nyadis 22,000 pŭrŭng sapi ka 120,000 biri ndu sadis bidingan. Simŭnŭ inŭh ayŭh ngga sopŭrŭg daya nyikudus Ramin TUHAN.

⁶Bara imam mijog di tarun yŭn adi mbŭh dog nitah yŭn ngara, ka nura ngara inŭh bara daya Levi, muji TUHAN ngga pingakas musik adi Raja David mbŭh sidia buang ngara nang ragu, “Pinyirindu-I inŭh tan adu adu!” nimun adi mbŭh David ngatur. Bara imam anŭ mambak trompet atan bara daya mijog.

⁷Solomon nitah yun badag, tarun yŭn di jawin Ramin TUHAN, ka komŭnŭ jugan sadis adi mŭrŭng dog badang diginŭ, sadis ruwang kayuh, ka ramak so sadis bidingan. Ayŭh ndai simŭnŭ sabab mija-sambah timaga adi-i ko ndai mbŭh raru sŭ yŭn sopŭrŭg sadis anŭ.

⁸Solomon ngga sopŭrŭg daya Israel sita Gawai Bari-Dawŭn sitian ju andu. Raru bagŭ daya mandŭg jeh so Ateng Hamath di utara ngga baat Egypt di siratan.

⁹Ngara bigawai sita ju andu mija-sambah dog nitah, ka komŭnŭ ngara bigawai ju andu dinge. Andu adi sikasŭn anŭ ngara tŭŭp gawai,

¹⁰ka di andu anŭ ndi, 23 andu buran ju, Solomon bada bara daya maad. Ngara mbŭh raru sanang asŭng amai sopŭrŭg berkat adi TUHAN mbŭh nggen di daya-I Israel, di David, ka di Solomon.

¹¹Ripas Raja Solomon muko ngamas pijog Ramin TUHAN ngga istana, samŭn sopŭrŭg adi-i bisatur raan ndai yŭn soduwŭh-i,

¹²TUHAN nandŭng di ayŭh singarŭm. Ayŭh nang di ayŭh, “Aku mbŭh dingah dua mu, ka Aku trima Ramin ati ndu tarun yŭn sadis dog jugan ka Aku.

¹³Kan Aku bitan ujen, puan kah pait kadis bada man pimuruh, puan kah pait sesak-andam di daya Ku,

¹⁴kambŭi ngara bidua ka Aku ka marik pimudip ngara pari ka Aku ka dŭh tia ndai arap, Aku re dingah ngara so shorga, apun dosa ngara, ka bada tana ngara pari damŭn.

¹⁵Aku re nyibatŭh Ramin Ku ati ka sidia an dingah sopŭrŭg dua adi dog jugan digiti,

¹⁶sabab Aku mbŭh mien-i ka nyikudus-i ndu tarun yŭn Aku dog nyambah ndŭg situi tui. Aku re ari nyibatŭh-i ka grindung-i.

¹⁷Kambŭi kuu tŭtŭd bituan di Aku nimun sama mu David, sita ukum-adat Ku ka ndai sopŭrŭg kayuh adi Aku pesan di kuu,

¹⁸ Aku re pijadi janji adi Aku muko ndai ngga sama mu David kan Aku kidaan di ayŭh nang Israel re ari dog mritah sesang-i.

¹⁹Pak kambŭi kuu ngga daya mu dŭh tunda ukum-adat ngga pesan Ku adi Aku mbŭh nggen di kuu, ka nyambah tapa bŭkŭn,

²⁰Aku re taran angān so tarun tana adi Aku nggen di angān, ka Aku re tagan Ramin ati adi Aku mbŭh nyikudus ndu tarun yŭn Aku dog nyambah. Daya di barang yŭn re tawŭh-i ka ngamun-i.

²¹“Ramin ati madin grua sangŭn, pak di andu anŭ barang naan daya adi murah re inga inga ka re siken, ‘Mani TUHAN ndai simŭnŭ di tarun tana ati ngga di Ramin ati?’

²²Daya re nam, ‘Sabab ngara tagan TUHAN adi Tapa ngara, adi taban tayung-babuk ngara ruah so Egypt. Ngara bituan di tapa tapa bŭkŭn ka nyambah-i. Ngapŭi TUHAN taban pinyirusag ati ka ngara.’ ”