Read Biatah Bidayuh 2 KRONIKEL 9 Bible Online

2 KRONIKEL 9 - Biatah Bidayuh bible

2 KRONIKEL 9

¹ Rani so Sheba, dingah munki masam timagah Raja Solomon, matak ka Jerusalem an suba ayŭh ngga bagŭ pinyiken adi mbar dog nam. Ayŭh mandŭg ayō bagŭ pinurung, samŭn dudu onta kabis rapah, batuh brega, ka mua kiang mas. Kan ayŭh ngga Solomon bidapŭd, ayŭh siken barang masam kayuh adi ayŭh tungang siken.

²Raja Solomon nam sopŭrŭg-i; mating adi raru mbar adi-i kidaan rati-i.

³Rani so Sheba dingah pinyibijak Solomon ka kiris istana adi-i pijog.

⁴Ayŭh kiris pinguman adi dog ngidang di tunduh mija-i, ramin ramin bara pinurung-i, atur kraja bara adi nyiraja darŭm istana ngga piraka adi ngara nēn, piraka bara daya-gaji adi ngidang ayŭh di tika gawai, ka sadis adi-i jugan[15] di Ramin TUHAN. Sopŭrŭg anŭ bada rani anŭ ngasŭng ka inga inga.

⁵Rani anŭ nang di raja, “Kayuh adi aku dingah so rais adŭp ku pasar kuu[16] ka pasar pinyibijak mu inŭh sawŭ!

⁶Aku dŭh sabah kayuh adi daya kidaan di aku ndŭg ka adŭp ku mbŭh kiris-i. Pak kayuh anŭ adi aku dingah dŭh-i tungang sitangah anŭ adi aku kiris madin. Kuu inŭh adi rabis bijak so adi dog kidaan daya.

⁷Munki masam bituah inŭh ngara adi bituan di kuu, adi ari agi ngga kuu ka adi tungang dingah pinganang bijak mu!

⁸Puji ka TUHAN adi Tapa mu! Ayŭh mbŭh kiren munki masam munos asŭng-I di kuu ka mbŭh bada kuu jadi raja, ka mritah ngga adŭn-I. Sabab Ayŭh rindu daya-I Israel ka raan adu adu kingat ngara, Ayŭh mbŭh bada kuu jadi raja ngara isa kuu dapŭd pimanu ukum-adat ka pinyitŭnggŭn.”

⁹Rani anŭ nggen di Raja Solomon dudu pinganggen adi-i taban: rabis so 4,000 kilogram mas ka rapah ngga batuh brega adi raru bagŭ. Gi-mating rapah adi re rabis kana so anŭ adi rani so Sheba mbŭh nggen di Raja Solomon.

¹⁰(Bara daya Raja Hiram ngga Raja Solomon adi taban mas so Ophir, taban gŭh kayuh junipa ka batuh brega.

¹¹Solomon pakai kayuh ngga ndai tungoh Ramin TUHAN ka tungoh istana-i, ka ngga ndai kachapi ngga gambus yŭn bara pimain musik. Gi-mating kayuh mun anŭ dog kiris di tarun tana Judah diŭ so anŭ.)

¹²Raja Solomon nggen di rani so Sheba tadŭ kayuh adi-i mite. Anŭ ngga nambah anŭ adi-i nggen di ayŭh ngga maras pinganggen[17] adi-i taban ka ayŭh. Komŭnŭ ayŭh ngga bara pinurung-i pari ka tarun tana Sheba.

¹³Barang sawa Raja Solomon kambat sindŭk 23,000 kilogram mas,

¹⁴nambah suke adi dog bayar bara daya dagang. Raja raja rais Arabia ngga bara gabenor utung tarun tana rais Israel gŭh taban ka yŭn-i pirak ngga mas.

¹⁵Solomon ndai 200 pinangin adi baga, adi dog marut ngga kurang rabis 7 kilogram mas adi dog maba,

¹⁶ka 300 pinangin adi siit, adi dog nurap ngga 3 kilogram mas adi dog maba. Ayŭh bada sopŭrŭg-i dog na darŭm Birit-bās Tuān Lebanon.[18]

¹⁷Raja gŭh bada ndi takta adi baga dog ndai so bŭbŭt gajah ka dog marut ngga tigŭrŭ mas.

¹⁸Takta anŭ biyŭn nŭm subang tungoh ngga maad-i, ka agi bangan kaja dieh, dog marut ngga mas. Agi duwŭh tangan takta anŭ yŭn sangan tangan, ka patong singah agi di soduwŭh parad tigang-i.

¹⁹Simŭng duwŭh patong singah di barang bŭngŭn subang tungoh. Mating pritah adi bŭkŭn biyŭn takta mun anŭ.

²⁰Sopŭrŭg saker Raja Solomon dog ndai so mas, ka sopŭrŭg pingakas di darŭm Birit-bās Tuān Lebanon dog ndai so tigŭrŭ mas. Pirak dŭh dog nyirundeng kayuh adi brega di jaman Solomon.

²¹Ayŭh biyŭn kapar kapar baga adi birayar di rawŭt ngga dudu kapar Raja Hiram. Ndi sidah darŭm taruh sawa kapar kapar-i anŭ pari, taban mas, pirak, bŭbŭt gajah, ka kiyad.

²²Raja Solomon mbŭh kaya dŭ ka bijak dŭ so tadŭ tadŭ raja adi bŭkŭn di ong.

²³Sopŭrŭg ngara bisiken ngga ayŭh, an dingah pinyibijak adi Tapa mbŭh nggen di ayŭh.

²⁴Barang naan ngara taban pinganggen ka ayŭh -- barang masam kayuh adi dog ndai so pirak ngga mas, ka piraka, sinyata, rapah, kuda, ka kuda pinakan kaldi. Kayuh anŭ simŭnŭ barang sawa.

²⁵ Raja Solomon gŭh biyŭn 4,000 kandang yŭn nyikŭn krita krita kuda ka dudu kuda, ka biyŭn 12,000 soldadu pinunggang kuda. Kada so anŭ ayŭh nyikŭn di Jerusalem ka adi bŭkŭn ayŭh na di kupo kupo bŭkŭn.

²⁶ Ayŭh inŭh pimritah adi siabo bigatung so sopŭrŭg raja di tarun tana so Yang Euphrates ndŭg Philistia ka baat Egypt.

²⁷Di jaman pinyipritah-i pirak inŭh kayuh braŭn di Jerusalem, keya ka batuh; ka kayuh sedar mbŭh raru bagŭ mun kayuh sycomore saja di sigŭn sandah Judah.

²⁸ Solomon miris dudu kuda so Musri[19] ka so barang rais adi bŭkŭn.

²⁹Dundan Solomon adi bŭkŭn, so sibungas-i ndŭg pinŭbŭn-i agi dog nuris darŭm Surat Dundan Nabi Nathan, darŭm Surat Piminyu Binabi Ahijah so Shiloh, ka darŭm Surat Visi Nabi Iddo, adi agi gŭh pasar pinyipritah Jeroboam adi raja Israel.

³⁰Solomon jadi raja di Jerusalem, mritah ndi tarun tana Israel sitian pat puru sawa.

³¹Ayŭh kabŭs ka dog kubur di kupo David, ka anak-i Rehoboam gati ayŭh jadi raja.