Read Biatah Bidayuh EZRA 3 Bible Online

EZRA 3 - Biatah Bidayuh bible

EZRA 3

¹Ngga buran adi ju daya Israel mbŭh rŭŭ tatap di kupo kupo ngara. Komŭnŭ sopŭrŭg ngara tikuruk di Jerusalem,

² ka Joshua anak Jehozadak, bara dingan-i adi samah imam, ka Zerubbabel anak Shealtiel, samah ngga madis-i, pari pijog mija-sambah Tapa Israel, isa ngara dapŭd badang sadis di tunduh-i nanyam ka atur adi dog nuris di Ukum-adat Moses, adi urun Tapa.

³ Sunggu[4] bara adi mari ripas ko dog taran taru daya adi rŭŭ di tarun tana anŭ, ngara pari pijog mija-sambah di yŭn amba-i. Komŭnŭ ngara piguru dinge badang di tunduh-i sadis isan isan ngga sadis singumi andu.

⁴ Ngara sita Gawai Bari-Dawŭn nanyam ka atur-adat; barang andu ngara jugan sadis adi dog miratak yŭn andu anŭ;

⁵ nambah ka anŭ, ngara jugan sadis adi barang andu yŭn dog mŭrŭng badang ngga anŭ adi an dog jugan di tika Gawai Anak Buran ka di tika tika daya tikuruk adi ngga TUHAN dog nyambah, samŭn sopŭrŭg pinganggen adi dog jugan so ka pinyiraan atin adŭp.

⁶Sunggu bara daya gibayuh piguru pari pijog Ramin TUHAN, ngara mbŭh piguru badang sadis ka TUHAN di andu adi ndi darŭm buran ju.

⁷Bara daya nggen duit ngga bayar gaji tukang batuh ka tukang kayuh ka nggen pinguman, nok, ka inyo kanā adi re dog pait ka kupo kupo di Tyre ngga Sidon ngga nyambi kayuh kayuh sedar so Lebanon, adi re dog taban ka Joppa so aran rawŭt. Sopŭrŭg anŭ dog ndai so ka pinyibandar Cyrus, adi raja-empaya Persia.

⁸Darŭm buran duwŭh darŭm sawa adi duwŭh ripas ngara mandŭg ka tibawang Ramin TUHAN di Jerusalem, ngara piguru ndai kraja anŭ. Zerubbabel, Joshua, ngga bara dingan ngara adi samah bangsa, bara imam, ka bara daya Levi, samŭn sopŭrŭg adi mbŭh mari ka Jerusalem ripas ko dog taran, sua darŭm kraja anŭ. Sopŭrŭg daya Levi adi duwŭh puru sawa umbur-i bait tuuh so anŭ mbŭh dog bada nguasa kraja pari pijog Ramin TUHAN.

⁹Jeshua adi daya Levi ngga bara anak dari-i ka madis-i, ka Kadmiel ngga bara anak dari-i (adi manak Hodaviah)[5] sua nguasa kraja pari pijog Ramin TUHAN. (Ngara dog turung bara daya Levi so manak Henadad.)

¹⁰ Kan bara tukang piramin piguru na pinagap-rasan Ramin TUHAN, bara imam nēn piraka imam ngara tambit tarun yŭn ngara ngga trompet di tangan ngara, ka bara daya Levi so manak Asaph mijog diginŭ digŭng sigager. Ngara muji TUHAN nanyam ka atur adi dog tunda so jaman Raja David.

¹¹ Ngara nang ragu puji TUHAN, ka pari pari nang tibŭn ragu anŭ: “TUHAN inŭh kana, ka pinyirindu-I yŭn Israel inŭh tan adu adu.” Sopŭrŭg ngara nyirais ngga situngang tungang ngara, muji TUHAN, sabab kraja na pinagap-rasan mbŭh dog piguru.

¹²Bagŭ imam, daya Levi, ngga pingubak manak, adi mbŭh minyamba adi ko kiris Ramin TUHAN adi sibungas-i, sien kan ngara tingga puun pinagap-rasan dog na. Pak adi bŭkŭn adi agi diginŭ nyirais amai gaŭn.

¹³Mating daya tungang ngatŭn aki sirŭŭn sien aki sirais gaŭn, sabab dudu adi ndai ngara mbŭh raru bana ndŭg ka-i tungang dog dingah so jo.