Read Biatah Bidayuh EZRA 5 Bible Online

EZRA 5 - Biatah Bidayuh bible

EZRA 5

¹Di tika anŭ duwŭh naan nabi, Haggai ngga Zechariah anak Iddo, piguru minyu ngga adŭn Tapa Israel di daya Jahudi adi rŭŭ di Judah ngga di Jerusalem.

² Kan Zerubbabel anak Shealtiel ngga Joshua anak Jehozadak dingah pinganang ngara, ngara piguru pari pijog Ramin TUHAN di Jerusalem, ka soduwŭh nabi anŭ turung ngara.

³Nganŭ gŭh gabenor Tattenai so Euphrates Barat, Shethar Bozenai, ngga bara dingan ngara adi pinurung pritah mandŭg ka Jerusalem ka siken: “Asi nggen di angān ukum bada pijog Ramin Simayang ati ka ngamas pingakas-i?”

⁴Ngara[10] gŭh siken dŭn sopŭrŭg daya adi turung pijog Ramin anŭ.

⁵Pak Tapa taŭn agi grindung bara pinguru daya Jahudi, ka bara pinurung pritah Persia dŭh pirŭŭ kraja ngara ndŭg ka ngara mbŭh pait surat ka Darius ka dapŭd pinyinam so ayŭh.

⁶Ati inŭh ripot adi ngara pait ka raja-empaya:

⁷“Nuju Raja Darius, isa-i kaam mritah darŭm damai.

⁸“Tuan Raja patut puan kieh agi di ka utung rais Judah ka kiris Ramin Simayang yŭn Tapa bās dog pari pijog ngga dudu tibande batuh ka ngga dudu parang kayuh dog nyindung darŭm sindung. Kraja anŭ dog ndai ngga nakit ka raju.

⁹“Ka kieh siken di bara pinguru daya bada kidaan di kieh asi nggen di ngara kuasa ngga pari pijog Ramin Simayang anŭ ka ngamas pingakas-i.

¹⁰Kieh gŭh siken dŭn ngara isa kieh bisa kidaan di kaam asi pinguru ngara di kraja anŭ.

¹¹“Ngara nam, ‘Kieh ati urun Tapa rangit ngga ong, ka kieh pari pijog Ramin TUHAN adi sibungas-i dog pijog ka dog ngamas raja Israel adi bikuasa bipuru puru sawa adi mbŭh ripas.

¹² Pak sabab tayung-babuk ami bada Tapa adi pinguasa di shorga baji, Ayŭh bada ngara dog ngarah Raja Nebuchadnezzar so Babylonia, raja taris asar pinyipritah Chaldea. Ramin TUHAN dog nyirubuh, ka bara daya dog taran ka Babylonia.

¹³ Komŭnŭ di sibungas sawa darŭm pinyipritah Cyrus adi raja-empaya Babylonia, Cyrus piruah ukum bada Ramin TUHAN dog pari pijog.

¹⁴Ayŭh pari pingakas mas ngga pirak adi dog pakai di Ramin TUHAN. Pingakas anŭ ko dog sirapas Nebuchadnezzar ka dog na di bari-sambah adŭp-i di Babylon. Cyrus nyerah pingakas pingakas anŭ ka tangan ndi naan daya dŭn Sheshbazzar, adi ayŭh tijuan bada jadi gabenor di Judah.

¹⁵Raja bada ayŭh taban-i pari ka Ramin TUHAN di Jerusalem, ka pari pijog Ramin TUHAN di yŭn-i dog pijog dawŭ-i.

¹⁶Jadi Sheshbazzar mandŭg di na puun pinagap-rasan yŭn Ramin TUHAN; kraja pari pijog babŭ ndŭg madin, pak Ramin TUHAN gibabŭ dŭh kamas.’

¹⁷“Madin, kambŭi-i kana di pikir Tuan Raja, bada daya pirasa di rekod raja di Babylon, sawŭ kah dŭh Cyrus nggen ukum bada Ramin TUHAN di Jerusalem pari dog pijog, ka kidaan di kieh munki atur mai di kayuh anŭ.”