Read Biatah Bidayuh EZRA 6 Bible Online

EZRA 6 - Biatah Bidayuh bible

EZRA 6

¹Jadi Darius, adi raja-empaya, piruah ukum bada daya pirasa rekod raja, adi dog nyikŭn di Babylon.

²Pak-i di kupo Ecbatana di utung rais Media ndi surat-barun dog dapŭd, brisi ngga rekod sakati:

³“Di sibungas sawa darŭm pinyipritah-i Raja Cyrus pesan bada Ramin TUHAN di Jerusalem pari dog pijog ndu tarun yŭn bisadis ka yŭn pinganggen dog badang. Ramin anŭ an 27 mita bigatung ka 27 mita bayah.

⁴Sindung sindung an dog pijog ngga ndi tŭngŭn betang kayuh di tunduh barang taruh sandug batuh. Sopŭrŭg biranja an dog bayar ngga duit so pinyirikŭn rata pritah.

⁵Simŭnŭ gŭh ngga pingakas mas ngga pirak adi Raja Nebuchadnezzar taban ngga bu ka Babylon so Ramin TUHAN di Jerusalem an dog pari ka yŭn adŭp-i.”

⁶Komŭnŭ Darius pait pinyinam sakati: “Ka Tattenai, adi gabenor Euphrates Barat, Shethar Bozenai, ngga bara dingan ngan adi samah pinurung pritah di Euphrates Barat. “Tandah nŭh daya Jahudi,

⁷ka dŭhnyah katang kraja ngara adi pari pijog Ramin anŭ. Tandah gabenor Judah ngga bara pinguru daya Jahudi pari pijog Ramin Tapa di tarun adi yŭn-i ko mijog dawŭ-i.

⁸Jadi aku pesan angān bada turung ngara pari pijog-i. Biranja-i an rikas dog bayar ngga duit suke adi dog trima so Euphrates Barat, isa kraja anŭ dŭh matang.

⁹Barang andu angān dŭh siŭn dŭh nggen di bara imam di Jerusalem tadŭ mun kayuh adi ngara kidaan di angān ngara biguna: dari dari sapi adi gibabŭ mara, biri, puan kah anak anak biri adi re dog badang ndu sadis ka Tapa adi pinguasa di Shorga, puan kah gandom, garo, wain, puan kah inyo kanā.

¹⁰Kayuh anŭ an dog ndai isa ngara dapŭd jugan sadis adi Tapa adi pinguasa di Shorga trima, ka isa ngara bidua mite berkat-I yŭn ku ka yŭn anak anak dari ku.

¹¹Aku gŭh pesan angān nang kambŭi agi daya nyibireu ukum ati, parang kayuh re dog nyirakang so ramin ngara, ka re dog pirasing tŭbŭn-i di ndi parad, ka re ngga tabŭk bada birambus pŭrŭng-i. Ka ramin-i re jadi tugung sapok.

¹²Isa-i Tapa adi mien Jerusalem ndu tarun yŭn-I dog nyambah ngarah tadŭ tadŭ raja puan kah bangsa adi nyibireu pesan ati ka adi suba an nyirubuh Ramin TUHAN. Aku, Darius, mbŭh piruah ukum ati. Ukum ati dŭh siŭn dŭh dog tunda.”

¹³Ripas anŭ Tattenai, adi gabenor, Shethar Bozenai, ngga bara dingan ngara adi samah pinurung pritah ndai nimun adi mbŭh raja-empaya pesan.

¹⁴ Bara pinguru daya Jahudi mujur di kraja ngara pari pijog Ramin anŭ, dog ngatat nabi Haggai ngga Zechariah. Ngara ngamas Ramin anŭ nimun adi mbŭh dog pesan Tapa Israel, ka dog pesan Cyrus, Darius, ka Artaxerxes, adi raja raja-empaya Persia.

¹⁵Ngara ngamas kraja pari pijog Ramin anŭ dog ngga taruh andu buran Adar di sawa adi nŭm darŭm pinyipritah Raja Darius.

¹⁶Komŭnŭ daya Israel -- bara imam, bara daya Levi, ngga sopŭrŭg adi bŭkŭn adi mbŭh pari ripas ko dog taran -- nyikudus Ramin TUHAN ngga pawŭn.

¹⁷Yŭn adat nyikudus anŭ ngara jugan siratus pŭrŭng dari sapi, 200 pŭrŭng biri, ka 400 anak biri ndu sadis, ka simŭng duwŭh kambing ndu sadis taran dosa, barang tibaran-asar kambat ndi pŭrŭng.

¹⁸Ngara gŭh ngatur bara imam ngga bara daya Levi yŭn kraja ngara di Ramin TUHAN di Jerusalem, nanyam ka atur adi darŭm surat Moses.

¹⁹ Bara daya adi mbŭh pari ripas ko dog taran sita gawai Paska dog ngga simŭng pat andu buran ndi sawa anŭ ndi.

²⁰Sopŭrŭg imam ngga bara daya Levi mbŭh pibisig adŭp ngara ka mbŭh bisig nanyam ka adat. Bara daya Levi siŭ dāng yŭn sadis Paska yŭn man siramat bara daya adi mbŭh pari ripas ko dog taran, yŭn bara imam, ka yŭn adŭp ngara.

²¹Sadis sadis anŭ dog man sopŭrŭg daya Israel adi mbŭh pari ripas ko dog taran ka dog man ngara adi mbŭh taran kraja pingandai adat karŭm bangsa bŭkŭn adi rŭŭ di tarun tana anŭ ka adi mbŭh mandŭg an nyambah TUHAN Tapa Israel.

²²Sitian ju andu ngara sita ngga pawŭn Gawai Ruti dŭh-Biragi. Ngara mbŭh raru pawŭn sabab TUHAN mbŭh bada raja-empaya Assyria[11] kana ngga ngara, ndŭg ka batu ngara darŭm kraja ngara adi pari pijog Ramin TUHAN adi Tapa Israel.