Read Biatah Bidayuh EZRA 7 Bible Online

EZRA 7 - Biatah Bidayuh bible

EZRA 7

¹Kudu kudu sawa ripas anŭ, di tika Artaxerxes jadi raja-empaya Persia, agi ndi naan daya dŭn Ezra. Ayŭh anŭ ndi naan so sesang Aaron, adi Imam Bās. Taris tayung babuk-i agi simuti: Ezra inŭh anak Seraiah, anak Azariah, anak Hilkiah,

²anak Shallum, anak Zadok, anak Ahitub,

³anak Amariah, anak Azariah, anak Meraioth,

⁴anak Zerahiah, anak Uzzi, anak Bukki,

⁵anak Abishua, anak Phinehas, anak Eleazar, anak Aaron.

⁶Ezra inŭh daya adi baga sikura-i ngga sukup pinyipuan pasar Ukum-adat adi TUHAN, adi Tapa Israel, mbŭh nggen di Moses. Sabab Ezra mbŭh dapŭd berkat so TUHAN adi Tapa-i, raja-empaya nggen di ayŭh sopŭrŭg kayuh adi-i mite. Di sawa adi ju darŭm pinyipritah Artaxerxes, Ezra matak so Babylonia di ka Jerusalem ngga ndi tibaran daya Israel samŭn bara imam, bara daya Levi, bara pimain musik Ramin TUHAN, bara adi tukang jaga Ramin TUHAN, ngga bara tukang.

⁸Ngara bu so Babylonia ngga sibungas andu darŭm sibungas buran, ka dog turung Tapa ngara mandŭg di Jerusalem ngga andu adi ndi darŭm buran rimŭh.

¹⁰Ezra mbŭh ngga siabo atin-i birajar Ukum-adat TUHAN, tunda-i, ka ngajar sopŭrŭg ukum-adat ngga atur adat di darŭm-i di daya Israel.

¹¹Artaxerxes nggen surat ati di Ezra, adi imam ka daya adi baga sikura-i, adi biyŭn sukup pinyipuan pasar ukum ukum-adat ngga pesan adi TUHAN mbŭh nggen di Israel:

¹²“So Artaxerxes[12] adi raja-empaya nuju Ezra adi imam, adi sukup pandai di Ukum-adat Tapa adi mritah di Shorga.[13]

¹³“Aku pesan bada sopŭrŭg daya Israel di darŭm empaya ku, bait-i bara imam, ngga bara daya Levi adi raan, bisa matak ngga kuu di ka Jerusalem.

¹⁴Aku, ngga ju naan ngara adi tukang pitayan yŭn ku, pait kuu bada nyasat munki gaya kayuh di Jerusalem ngga di Judah siŭn dapŭd puan munki Ukum-adat Tapa mu, adi mbŭh dog nggen di kuu, dog tunda.

¹⁵Kuu an taban pinganggen mas ngga pirak adi aku ngga bara adi tukang pitayan yŭn ku raan nggen di Tapa Israel, Tapa adi rŭŭ di Jerusalem.

¹⁶Kuu an taban gŭh sopŭrŭg pirak ngga mas adi kuu ko nguruk so ndi utung utung rais Babylon ngga pinganggen adi bara daya Israel ngga imam imam ngara mbŭh nggen yŭn Ramin TUHAN adi Tapa ngara di Jerusalem.

¹⁷“Angān an pakai duit anŭ ngga nakit ka miris dari sapi, dari biri, anak biri, gandom, ngga wain ka jugan-i di mija-sambah Ramin TUHAN di Jerusalem.

¹⁸Kuu bisa pakai tadŭh pirak ngga mas anŭ yŭn tadŭ mun kayuh adi kuu ngga daya daya mu raan, nanyam pinyiraan Tapa mu.

¹⁹Kuu an nyerah ka Tapa di Jerusalem sopŭrŭg pingakas adi muko dog nggen di kuu yŭn dog pakai darŭm Ramin TUHAN.

²⁰Ka tadŭ tadŭ kayuh bŭkŭn adi kuu biguna yŭn Ramin TUHAN, kuu siŭn mite so pinurung pinyirikŭn rata pritah.

²¹“Aku pesan sopŭrŭg pinurung pinyirikŭn rata darŭm utung rais Euphrates Barat bada nggen di Ezra, adi imam adi sukup pandai di Ukum-adat Tapa adi pinguasa di Shorga, sopŭrŭg kayuh adi-i mite so angān,

²²ngga prungun ndŭg kiang: 3,400 kilogram pirak, 10,000 kilogram gandom, 2,000 lita wain, 2,000 lita inyo kanā, ka sikiang kiang garo adi dog biguna.

²³Angān dŭh siŭn dŭh an nakit darŭm angān nggen kayuh adi Tapa adi pinguasa di Shorga mite yŭn Ramin-I, isa Ayŭh dŭh baji di aku puan kah di ngara adi mritah ripas aku.

²⁴Angān dŭh siŭn nguruk suke so bara imam, bara daya Levi, bara pimain musik, bara adi tukang jaga, bara tukang, puan kah so tadŭ tadŭ daya adi agi gagit-i ngga Ramin TUHAN.

²⁵“Kuu, Ezra, ngga pinyibijak adi Tapa mu mbŭh nggen di kuu, an tijuan daya bada jadi pingubak ka akim da nguasa sopŭrŭg daya adi di Euphrates Barat adi udip tunda Ukum-adat Tapa mu. Kuu dŭh siŭn dŭh ngajar Ukum-adat anŭ di tadŭ tadŭ ngara adi gibayuh puan-i.

²⁶Kambŭi agi daya nyibireu ukum ukum-adat Tapa mu puan kah ukum ukum-adat empaya, daya anŭ an rikas dog ukum: bait-i dog nggen ukum kabŭs, puan kah dog taran ka rais tami, puan kah buat rata-i dog sirapas, puan kah dog jer.”

²⁷Ezra nang, “Puji ka TUHAN, adi Tapa tayung-babuk ta! Ayŭh mbŭh kies atin raja-empaya bada stabi ka tambit bat di Ramin TUHAN di Jerusalem.

²⁸Ngga pinyirasi-mandis Tapa, aku mbŭh dapŭd pinyirindu so raja-empaya, so bara adi tukang pitayan yŭn-i, ka so sopŭrŭg pinurung-i adi bikuasa; TUHAN adi Tapa ku mbŭh nggen di aku atin pagan, ka aku mbŭh tungang bada bagŭ pingubak manak Israel mari samah ngga aku.”