Read Biatah Bidayuh EZRA 9 Bible Online

EZRA 9 - Biatah Bidayuh bible

EZRA 9

¹Ripas sopŭrŭg anŭ mbŭh dog ndai, kada so bara pinguru daya Israel mandŭg ka kidaan di aku nang bara daya, bara imam, ngga bara daya Levi dŭh pijo adŭp ngara so daya bangsa bŭkŭn adi udip maning ngara, anŭ inŭh daya Ammon, daya Moab, ngga daya Egypt puan kah daya Canaan, daya Hitti, daya Periz, daya Jebus, ka daya Amor. Ngara tunda pingandai sipŭ adi ngara anŭ ndai.

²Bara dari daya Jahudi mbŭh sawŭn dayung daya bangsa bŭkŭn, ka daya adi Tapa dapu mbŭh kais. Bara pinguru ngga bara pinurung inŭh adi piguru pimudip adi dŭh tŭtŭd anŭ.

³Kan aku dingah kayuh anŭ, aku nyiratak piraka ku darŭm susah, nyirugut ubok ngga gagap ku, ka guru ngga atin adi keya ka mbŭh asur.

⁴Aku guru diginŭ susah ndŭg ka tika adi ngga jugan sadis singumi andu, ka bara daya piguru tikuruk maning aku -- sopŭrŭg ngara adi mbŭh taru sabab kayuh adi Tapa Israel mbŭh nang pasar dosa ngara, ngara adi mbŭh mari ripas ko dog taran.

⁵Kan-i mbŭh tika adi ngga jugan sadis singumi andu, aku makat so yŭn aku guru darŭm susah, buang babŭ nēn piraka ku adi tiratak, aku sidikang ka simayang buang pakat tangan ku ka TUHAN adi Tapa ku.

⁶Aku nang, “O Tapa, aku mbŭh raru mangŭh re pakat ubak ku nyigura Kaam. Dosa ami mbŭh bitugung, bigatung so ubak ami; sopŭrŭg-i mbŭh bitugung ndŭg rangit.

⁷So jaman tayung-babuk ami ndŭg madin, kieh, adi daya Mai, mbŭh bana bidosa. Sabab dosa ami kieh, bara raja ami, ka bara imam ami mbŭh rabu ka darŭm tangan raja raja bangsa bŭkŭn, ka kieh mbŭh dog siŭ, dog mirupak, ka dog taban ngga bu jadi daya-takap. Kieh mbŭh dog pimangŭh, ka babŭ ndŭg madin.

⁸Madin, gibayuh tui, O TUHAN adi Tapa ami, Kaam mbŭh raru mandis ngga kieh ka mbŭh pirupas kieh so dog piurun ka udip ngga siramat di tarun yŭn kudus ati. Kaam mbŭh pirupas kieh so pimudip urun ka mbŭh nggen di kieh pimudip bauh.

⁹Kieh ko jadi urun, pak Kaam dŭh tingge kieh darŭm pimudip urun. Kaam bada raja-empaya Persia kana ngga kieh ka nyibandar kieh pijuu pimudip ami ka pari pijog Ramin Mai, adi mbŭh rubuh, ka dapŭd pinyigrindung digiti di Judah ngga di Jerusalem.

¹⁰“Pak madin, O Tapa, ani re ami nang ripas sopŭrŭg kayuh anŭ adi mbŭh jadi? Kieh mbŭh pari nyibireu pesan

¹¹adi Kaam mbŭh nggen di kieh so urun Mai bara nabi. Ngara kidaan di kieh nang tarun tana adi kieh re ngisi inŭh dŭh bisig sabab daya adi rŭŭ dieh mbŭh kinais-i so bŭngŭn ndi ndŭg bŭngŭn andi ngga pimudip adi dŭh tatu buang sipŭ.

¹² Ngara kidaan di kieh nang kieh dŭh siŭn banan sawan ngga ngara anŭ ka dŭh siŭn turung ngara mujur kambŭi kieh raan munos udip di tarun tana anŭ ka nggen-i di bara sesang ami bada adu adu dapu.

¹³Sunggu ripas barang masam kayuh adi mbŭh nyatŭk kieh ngga ngukum kieh amai dosa ngga sarah ami, kieh puan Kaam, adi Tapa ami, mbŭh ngukum kieh kurang so adi patut kieh trima ka mbŭh nyibandar kieh babŭ udip.

¹⁴Ka simuki meh kieh nyipunok dinge Pinyipesan Mai ka banan sawan ngga bangsa adi ginaka anŭ? Kambŭi simŭnŭ, Kaam tatu re raru baji ka pirabur kieh ndŭg ka ndi naan mating gŭh udip.

¹⁵TUHAN adi Tapa Israel, Kaam inŭh batur, pak Kaam tandah kieh udip. Kieh ngaku sarah ami ka Kaam; kieh dŭh tibirang re mandŭg di situra jawin ngga Kaam.”