Read Biatah Bidayuh NEHEMIAH 10 Bible Online

NEHEMIAH 10 - Biatah Bidayuh bible

NEHEMIAH 10

¹Adi diŭ na tandā tangan-i inŭh Gabenor Nehemiah, adi anak Hacaliah; ko anŭ, Zedekiah na tandā tangan-i. Ngara ati gŭh sua na tandā-tangan ngara:

²Bara imam: Seraiah, Azariah, Jeremiah, Pashhur, Amariah, Malchijah, Hattush, Shebaniah, Malluch, Harim, Meremoth, Obadiah, Daniel, Ginnethon, Baruch, Meshullam, Abijah, Mijamin, Maaziah, Bilgai, ngga Shemaiah.

⁹Bara daya Levi: Jeshua anak Azaniah, Binnui so manak Henadad, Kadmiel, Shebaniah, Hodiah, Kelita, Pelaiah, Hanan, Mica, Rehob, Hashabiah, Zaccur, Sherebiah, Shebaniah, Hodiah, Bani, ngga Beninu.

¹⁴Bara pinguru daya: Parosh, Pahath Moab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiah, Azzur, Hodiah, Hashum, Bezai, Hariph, Anathoth, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Anaiah, Hoshea, Hananiah, Hasshub, Hallohesh, Pilha, Shobek, Rehum, Hashabnah, Maaseiah, Ahiah, Hanan, Anan, Malluch, Harim, ngga Baanah.

²⁸Kieh, adi daya Israel, bara imam, bara daya Levi, bara tukang jaga Ramin TUHAN, bara pimain musik, bara daya-gaji Ramin TUHAN, ka sopŭrŭg adi bŭkŭn adi tunda Ukum-adat Tapa ka mbŭh pijo adŭp ngara so daya tami adi rŭŭ di tarun tana ami, kieh, ngga anak anak ami, sawŭn sawŭn ami ngga sopŭrŭg anak ami adi bŭkŭn adi mbŭh baga ka mirati kayuh ati,

²⁹madin ati sua ngga bara pinguru ami bipayu, bisa dog ukum pangu kambŭi kieh miranggar-i, an udip nanyam ka Ukum-adat Tapa, adi Tapa mbŭh nggen so urun-I Moses; kieh an tunda sopŭrŭg anŭ adi TUHAN, anŭ inŭh TUHAN ami, mbŭh pesan di kieh; ka kieh re sita sopŭrŭg ukum adat-I ka ndai sopŭrŭg anŭ nanyam adi mbŭh dog miratak darŭm-i.

³⁰ Kieh dŭh re banan sawan ngga daya tami adi rŭŭ di tarun tana ami.

³¹ Kambŭi daya tami taban gandom bait tadŭ tadŭ kayuh adi bŭkŭn an-i jua di kieh di andu Sabbath puan kah di tadŭ tadŭ andu kudus adi bŭkŭn, kieh dŭh re miris-i so ngara. Barang sawa adi ju kieh re dŭh nyipurun di teya, ka kieh re kinating sopŭrŭg utang.

³² Barang sawa, barang naan kieh re nggen 5 gram pirak ngga turung bayar biranja Ramin TUHAN.

³³Kieh re nggen kayuh kayuh ati ngga bisambah di Ramin TUHAN: ruti kudus, sadis ruwang kayuh, dāng adi re dog badang barang andu ndu sadis, pinganggen kudus yŭn andu Sabbath, Gawai Anak Buran, ka gawai gawai adi bŭkŭn, pinganggen kudus adi bŭkŭn, sadis sadis ngga taran dosa daya Israel, ka tadŭ tadŭ kayuh adi bŭkŭn adi dog biguna yŭn Ramin TUHAN.

³⁴Kieh, adi daya Israel, bara imam, ngga bara daya Levi, re taran dadu ngga natu manak aki ndi adi re nggen uwang ngga badang sadis adi dog jugan ka TUHAN Tapa ami, nanyam adi mbŭh dog miratak darŭm Ukum-adat.

³⁵ Kieh re taban ka Ramin TUHAN barang sawa pinganggen buwa bungas adi siabo kana adi kieh ngatŭm ngga buwa bungas pimuruh adi mbŭh masak.

³⁶ Anak pinuai adi dog biranak yŭn barang naan ami kieh re taban ka yŭn imam di Ramin TUHAN ka diginŭ, nanyam adi mbŭh dog miratak Ukum-adat, dog nitah ka Tapa. Kieh re nyerah gŭh anak bungas sapi, anak bungas biri bait anak bungas kambing.

³⁷ Kieh re taban ka yŭn imam di Ramin TUHAN pinguman ami adi dog pŭh so buwa bungas adi dog ngatŭm barang sawa samŭn pinganggen wain, inyo kanā, ka barang masam buwa pimuruh. Kieh re taban ka yŭn bara daya Levi, adi sun pinganggen di anak anak kupo teya ami, anŭ inŭh ndi utung-so-simŭng so buwa buwa pimuruh adi timbu di tana ami.

³⁸Bara imam adi so sesang Aaron an agi ngga bara daya Levi kan pinganggen ndi utung-so-simŭng dog sun, ka yŭn pakai di Ramin TUHAN bara daya Levi an taban ka birit-pinyirikŭn pinganggen ndi utung-so-simŭng so anŭ adi mbŭh dog sun.

³⁹Bara daya Israel ngga bara daya Levi an taban pinganggen gandom, wain, ka inyo kanā ka birit-pinyirikŭn di yŭn pingakas Ramin TUHAN dog nyikŭn ka di yŭn bara imam nyiraja, di yŭn bara adi tukang jaga Ramin TUHAN, ka bara pinyanyi yŭn Ramin TUHAN rŭŭ. Kieh dŭh re nyibireu ramin Tapa ami.