Read Biatah Bidayuh NEHEMIAH 2 Bible Online

NEHEMIAH 2 - Biatah Bidayuh bible

NEHEMIAH 2

¹Ndi andu, pat buran ripas anŭ, kan Artaxerxes adi raja-empaya aŭn man, aku taban wain ka yŭn-i. Ayŭh bŭn kiris raŭn ku susah,

²jadi ayŭh siken, “Mani kuu mun adi raru susah? Dŭh kuu sungoh; tatu agi kayuh nyusah kuu.” Aku gŭgŭh

³ ka nam, “Tabi Tuan Raja! Simuki aku re dŭh susah kan kupo di yŭn tayung-babuk ku dog kubur mbŭh jadi tibawang ka tiban tiban-i mbŭh rusak bada apui?”

⁴Raja siken, “Kambŭi sakanŭ, ani meh raan mu?” Aku bidua ka Tapa adi pinguasa di Shorga,

⁵ka komŭnŭ aku nang di raja, “Kambŭi Tuan Raja dŭh baji di aku ka raan nggen pimite ku, bada aku di ka tarun tana Judah, kupo di yŭn tayung-babuk ku dog kubur, isa aku dapŭd pari pijog kupo anŭ.”

⁶Ka raja, ngga rani adi guru ngapid ayŭh, nyibandar pimite ku. Ayŭh siken tian-ki aku re diginŭ, ka sinde aku pari; aku kidaan di ayŭh.

⁷Komŭnŭ aku mite ayŭh ndai surat isa aku taban ka gabenor gabenor di utung rais Euphrates Barat,[3] kidaan di ngara bada nyibandar aku panu di ka Judah.

⁸Aku mite gŭh surat an ku taban ka Asaph adi tukang jaga tuān raja, kidaan di ayŭh bada nggen di aku betang betang kayuh ngga ndai tiban tiban-bās kuta adi ngibān Ramin TUHAN, ngga ndai sindung kupo, ka ngga ndai ramin adi re aku yŭn rŭŭ. Raja nggen di aku sopŭrŭg adi aku mite, sabab Tapa agi ngga aku.

⁹Raja bada kada pingubak soldadu ngga ndi tibaran soldadu pinunggang kuda matak ayō aku, ka aku meh matak ka Euphrates Barat. Diginŭ aku nggen surat raja di bara gabenor.

¹⁰Pak Sanballat, so kupo Beth Horon, ngga Tobiah, ndi naan pinurung di utung rais Ammon, dingah daya agi mandŭg an nyiraja yŭn kana daya Israel, mbŭh raru bangok.

¹¹Aku di ka Jerusalem, ka sitian taruh andu

¹²aku dŭh kidaan di tadŭ tadŭ daya kayuh adi Tapa mbŭh bada aku ndai yŭn Jerusalem. Komŭnŭ ngga sitŭrŭp ngarŭm aku makat ka ruah ka sapa, taban kada dingan ku. Kaŭs dāng adi kieh taban inŭh kaldi adi aku nunggang.

¹³Babŭ karŭm kan aku ruah so kupo tambus Tiban Rubān tura ka barat ka radus murah Sumbur Naga nuju Tiban Sapok. Darŭm aku panu, aku pirasa sindung sindung kupo adi rusak ka tiban tiban adi rusak bada apui.

¹⁴Komŭnŭ di parad timor kupo anŭ aku panu ka Tiban Sumbur ngga Pagong Raja tura ka utara. Diginŭ mating aran re kaldi ku kadŭg amai sapok mbŭh raru bagŭ,

¹⁵jadi aku mūn ka rubān Kidron ka pijuu panu, tingga sindung sindung kupo. Komŭnŭ aku pari kadŭg aran adi so aku mandŭg tejah ka pari ka darŭm kupo so Tiban Rubān.

¹⁶Bara pinurung diginŭ dŭh puan kamaki aku di bait ani mbŭh aku ndai. Gibayuh gŭh aku nang ani ani di bara dingan ku adi samah daya Jahudi -- bara imam, bara pinguru, bara pinurung, ka tadŭ tadŭ daya adi re sua ndai kraja pari pijog Jerusalem.

¹⁷Pak ko anŭ aku kidaan di ngara, “Tingga munki masam susah ata sabab Jerusalem mbŭh jadi tibawang ka tiban tiban-i mbŭh abo rusak! Ja ata pari pijog sindung kupo isa ata dŭh tia dog pimangŭh.”

¹⁸Ka aku kidaan di ngara munki Tapa agi ngga aku ka turung aku, samŭn kayuh adi raja mbŭh nang di aku. Ngara nam, “Ja pari pijog-i!” Ka ngara mbŭh sidia re piguru kraja.

¹⁹Kan Sanballat, Tobiah, ngga ndi naan daya Arab dŭn Geshem dingah kayuh adi re ami ndai, ngara tawŭh kieh ka nang, “Ani anŭ ndai ngan? Angān re rawan pritah raja-empaya kah?”

²⁰Aku nam, “Tapa adi pinguasa di Shorga re bada kieh mujur. Kieh ati urun-I, ka kieh re piguru pijog. Pak angān dŭh biyŭn hak bait rata di Jerusalem, ka angān dŭh biyŭn utung di dundan asar-i.”