Read Biatah Bidayuh NEHEMIAH 6 Bible Online

NEHEMIAH 6 - Biatah Bidayuh bible

NEHEMIAH 6

¹Sanballat, Tobiah, Geshem ngga bara pinganyu ami adi bŭkŭn dingah kieh mbŭh ngamas pijog sindung ka mating tia rubang dieh, sunggu kieh gibayuh na sindung sindung tiban di tiban-bās.

²Jadi Sanballat ngga Geshem pait pinganang ka aku, suba mite aku bidapŭd ngga ngara di ndi kupo di Rabak Ono. Aku puan ngara suba an kinaman aku.

³Aku pait pinyisung bada nang di ngara, “Aku aŭn ndai kraja adi dŭh siŭn dŭh dog ndai madin ka dŭh aku dapŭd mūn kamanŭ. Aku dŭh dapŭd tingge kraja ati ramŭn an dapŭd angān.”

⁴Pikupat kari ngara pait pinganang anŭ anŭ, ka pikupat kari gŭh aku nam sakanŭ.

⁵Komŭnŭ Sanballat pait ndi naan so bara daya gaji-i ngga pinganang adi numbor rimŭh, pak kari ati ngga surat adi tikuka.[11]

⁶Sakati surat anŭ: “Geshem kidaan di aku nang mbŭh agi dog dingah di dupan daya di rais rais adi maning ati nang kuu ngga bara daya Jahudi suba an rawan pritah ka anŭ inŭh sabab kuu pari pijog sindung kupo. Ayŭh gŭh nang kuu bipusar an bada adŭp mu jadi raja

⁷ka nang kuu mbŭh ngatur bada kada nabi kidaan di daya bagŭ nang kuu inŭh raja Judah. Tuan Raja tatu re puan pasar kayuh anŭ, jadi aku pikir kana dŭ ata duwŭh bidapŭd ka kirakar pasar kayuh anŭ.”

⁸Aku pait pinyinam ku ka ayŭh: “Sopŭrŭg anŭ adi kuu nang dŭh-i sawŭ. Anŭ dundan nimbur mu.”

⁹Ngara suba pirawan kieh isa kraja ami matang. Aku bidua, “Tapa, bada aku bake!”

¹⁰Darŭm tipuh anŭ aku di bidapŭd ngga Shemaiah, adi anak Delaiah ka sukuh Mehetabel, adi dŭh tungang tingge ramin-i. Ayŭh nang di aku, “Ata duwŭh dŭh siŭn dŭh bu di bisukan di Yŭn Kudus Ramin TUHAN ka ngabŭt sopŭrŭg tiban, sabab ngara re mandŭg di siŭ kuu. Tadŭ nga-i ngarŭm ati ngara re mandŭg di siŭ kuu.”

¹¹Aku nam, “Aku dŭh inŭh daya adi an bikaduh bu ka bisukan. Kuu pikir aku re tungang nyiramat adŭp ku bisukan di Ramin TUHAN? Abah aku.”

¹²Kan aku nakit bipikir di kayuh anŭ, aku rada Tapa mating minyu ngga Shemaiah, pak Tobiah ngga Sanballat inŭh adi mbŭh nyuap ayŭh bada bakan aku sakanŭ.

¹³Ngara ngupah ayŭh bada pirawan aku isa aku ndai dosa, amai darŭm ndai simŭnŭ ngara dapŭd pirusak dŭn ku ka pimangŭh aku.

¹⁴Aku bidua, “Tapa, ingat kayuh adi Tobiah ngga Sanballat mbŭh ndai. Ngukum adŭ ngara. Ingat gŭh ndi naan dayung adi dŭn Noadiah ngga sopŭrŭg nabi adi bŭkŭn adi suba an pirawan aku.”

¹⁵Ripas 52 andu sindung anŭ mbŭh kamas dog pijog di andu adi 25 darŭm buran Elul.

¹⁶Kan pinganyu ami di rais rais maning kieh dingah, ngara rada adŭp ngara mbŭh mangŭh, amai barang naan daya puan nang kraja anŭ mbŭh kamas so ka pinurung adŭp Tapa.

¹⁷Tian-ti bara pinguru daya Jahudi taŭn ari bipait surat ngga Tobiah.

¹⁸Bagŭ daya Judah mŭrŭt parad-i sabab Shecaniah anak Arah adi damŭh-i inŭh daya Jahudi. Nambah ka anŭ, anak-i Jehohanan mbŭh sawŭn anak dayung Meshullam anak Berechiah.

¹⁹Daya ari kidaan di aku sopŭrŭg pingandai kana Tobiah ka ari kidaan di ayŭh kayuh adi aku nang. Ka ayŭh dŭh ko ko pait surat ngga-i suba pirawan aku.