Read Biatah Bidayuh NEHEMIAH 9 Bible Online

NEHEMIAH 9 - Biatah Bidayuh bible

NEHEMIAH 9

¹Andu adi 24 darŭm buran anŭ, daya Israel tikuruk yŭn bipusa ngga kiren atin susah amai dosa ngara. Ngara mbŭh nyidŭrŭ adŭp ngara so sopŭrŭg daya tami. Ngara nēn banang guni ka na apŭk di ubak ndu tandā atin susah. Komŭnŭ ngara mijog ka piguru ngaku dosa adi ngara mbŭh ndai samŭn adi tayung-babuk ngara mbŭh ndai.

³Kira ka taruh andu Ukum-adat TUHAN adi Tapa ngara dog basa di sirung jawin ngara, ka ripas anŭ ngara ngaku dosa ngara ka nyambah TUHAN adi Tapa ngara taruh jam.

⁴Diginŭ agi tarun yŭn daya Levi mijog, di tunduh-i mbŭh mijog Jeshua, Bani, Kadmiel, Shebaniah, Bunni, Sherebiah, Bani, ngga Chenani. Ngara bidua bana ka TUHAN adi Tapa ngara.

⁵Bara daya Levi ati bagan bara daya bada simayang: Jeshua, Kadmiel, Bani, Hashabneiah, Sherebiah, Hodiah, Shebaniah, ngga Pethahiah. Ngara nang: “Mijog ka nggen puji ka TUHAN adi Tapa ngan; muji Ayŭh ndŭg situi tui! Muji adŭn-I adi bibragah sopŭrŭg ngan, sunggu puji manusia dŭh re sukup bās.”

⁶Komŭnŭ daya Israel nang dua ati: “Kaam, TUHAN, Kaam sadi adŭ TUHAN; Kaam napa rangit ka bitang bitang di rangit. Kaam napa tana ka rawŭt ka sopŭrŭg isi-i; Kaam bada sopŭrŭg kayuh udip. Kuasa kuasa di rangit mutu ka nyambah Kaam.

⁷ Kaam, TUHAN Tapa, mien Abram ka taban ayŭh ruah so Ur di Babylonia; Kaam nukar dŭn-i jadi Abraham.

⁸ Kaam dapŭd ayŭh tŭtŭd di Kaam, ka Kaam ndai simanya ngga ayŭh. Kaam bijanji an nggen di ayŭh tana daya Canaan, tana daya Hitti ngga daya Amor, tana daya Periz, daya Jebus, ka daya Girgash, bada jadi tana di yŭn bara sesang-i rŭŭ. Kaam ingat janji Mai, sabab Kaam inŭh tŭtŭd.

⁹ “Kaam ko kiris munki tayung-babuk ami sangsara di Egypt; Kaam dingah sirŭŭn ngara mite turung di Rawŭt Bireh.

¹⁰ Kaam ndai pingandai-nginga ngga rawan raja, ka rawan bara pinurung-i ka bara daya tarun tana-i, sabab Kaam puan munki daya Mai dog kinanyuh. Di tika anŭ Kaam bada adŭn Mai timagah, ndŭg andu ati.

¹¹ Kaam mire rawŭt ka ndai aran yŭn daya Mai kadŭg ka nguru ngara panu di tunduh tana badŭh. Daya adi tadak ngara rŭnggŭd di rawŭt tŭrŭp, nimun batuh timŭtŭm di rawŭt bās.

¹² Ngga abun Kaam nguru ngara sandu, ka singarŭm Kaam pijawa aran ngara ngga apui.

¹³ Di Darŭd Sinai Kaam mūn so rangit; Kaam minyu di daya Mai ka nggen di ngara ukum-adat adi kana ngga ajar adi kana.

¹⁴Kaam ngajar ngara bada sita andu Sabbath bada kudus, ka so urun Mai Moses Kaam nggen di ngara ukum ukum-adat Mai.

¹⁵ “Kan ngara sibŭrŭk, Kaam nggen di ngara pinguman so shorga, ka piin so batuh kan ngara badŭh asŭng. Kaam bada ngara nguasa tarun tana adi Kaam ko bijanji an nggen di ngara.

¹⁶ Pak tayung-babuk ami bitambah sambuh ka baking ka abah tunda pesan Mai.

¹⁷ Ngara abah dingah pinganang; ngara kambŭt sopŭrŭg kayuh adi Kaam mbŭh ndai; ngara kambŭt pingandai-nginga adi Kaam mbŭh ndai. Darŭm sambuh, ngara mien ndi naan pinguru bada taban ngara pari jadi urun di Egypt. Pak Kaam inŭh Tapa adi an apun; Kaam inŭh mandis buang rindu daya, ka sais baji. Masi Mai inŭh bās; Kaam dŭh tagan ngara.

¹⁸ Ngara ndai tibudo tunda gayŭn anak dari sapi ka nang-i tapa adi taban ngara ruah so Egypt! Munki masam-i ngara mbŭh ngamun Kaam, TUHAN!

¹⁹ Pak Kaam dŭh tagan ngara diginŭ di tarun tana-pajam, amai masi Mai inŭh bās. Kaam dŭh kadi abun puan kah apui adi kiren aran di ngara sandu ka singarŭm.

²⁰Ngga pinyikana Mai Kaam kidaan di ngara kayuh adi patut ngara ndai; Kaam paan ngara ngga manna ka nggen piin nok di ngara.

²¹Darŭm pat puru sawa di tarun tana-pajam Kaam nggen di ngara sopŭrŭg kayuh adi ngara biguna; piraka ngara bŭn tiratak, ka kaja ngara dŭh bŭ ka mandam.

²² “Kaam nggen di ngara pimanang ngarah bangsa ngga pritah adi bibaat ngga tung ngara. Ngara ngarah tarun tana Heshbon, di yŭn Sihon mritah, ka tarun tana Bashan, di yŭn Og jadi raja.

²³ Kaam nggen bagŭ anak di ngara mun dudu bitang di rangit, ka bada ngara sirabŭt tana ka rŭŭ dieh adi Kaam mbŭh bijanji an nggen di tayung-babuk ngara.

²⁴ Ngara tambit tarun tana Canaan; Kaam ngarah daya adi rŭŭ diginŭ. Kaam nggen di daya Mai kuasa ngga ndai ani ani adi ngara raan di daya ka raja raja di Canaan.

²⁵ Daya Mai sirabut kupo kupo adi bikuta, tana adi damŭn, ramin ramin adi puno ngga rata, prigi prigi adi ko dog kareh, tŭngŭn kanā, tŭngŭn kayuh, ka teya anggor. Ngara man sopŭrŭg anŭ adi ngara raan ka mbŭh bitambah gamu; ngara udip sanang ngga sopŭrŭg kayuh adi Kaam mbŭh nggen di ngara,

²⁶ “Pak daya Mai rawan ka dŭh tŭtŭd di Kaam; ngara nyipunok Ukum-adat Mai. Ngara siŭ nabi nabi adi bakan ngara, adi kidaan di ngara bada pari ka Kaam. Ngara ari ngamun Kaam,

²⁷ka Kaam bada pinganyu ngara ngarah ka mritah ngara. Darŭm ngara susah ngara bagan Kaam mite turung, ka Kaam nam ngara so shorga. Darŭm masi bās Mai Kaam nggen pinguru di ngara adi nyiramat ngara so pinganyu ngara.

²⁸Kan tarun tana ngara kinyam damai, ngara bidosa dinge, ka Kaam dinge bada pinganyu ngara ngarah ngara. Pak kan ngara marik pimudip ngara pari ka Kaam, ka mite Kaam nyiramat ngara, so shorga Kaam dingah, ka pari pari Kaam nyiramat ngara ngga masi bās Mai.

²⁹ Kaam bakan ngara bada tunda ajar Mai, pak ngga atin sambuh ngara tirawan ukum ukum-adat Mai, sunggu aran nuju udip inŭh so ka sita Ukum-adat Mai. Tangek buang baking, ngara abah dingah pinganang.

³⁰ Barang sawa ngga tŭtŭd Kaam bakan ngara. Kaam bada bara nabi Mai minyu, pak daya Mai bangam, ka Kaam bada ngara dog ngarah daya bangsa bŭkŭn.

³¹Pak sabab masi Mai adi bās, Kaam dŭh tagan ka pirabur ngara. Kaam inŭh Tapa adi mandis ka adi masi!

³² “O Tapa, adi Tapa ami, munki masam bās inŭh Kaam! Kaam inŭh adi dog taru buang bikuasa! Kaam tŭtŭd ingat janji simanya Mai. So jaman raja raja-empaya Assyria kinanyuh kieh, ndŭg madin, munki masam sangsara kieh! Raja raja ami, pinguru pinguru ami, bara imam ami, ka bara nabi ami, bara tayung-babuk ami, ka sopŭrŭg daya ami mbŭh sangsara. Ingat munki masam kieh mbŭh sangsara!

³³Dŭh inŭh sarah Kaam ngukum kieh; Kaam tŭtŭd ngga kieh, sunggu kieh mbŭh bidosa.

³⁴Tayung-babuk ami, bara raja ami, bara pinguru, ngga bara imam dŭh sita Ukum-adat Mai. Ngara dŭh dingah pesan ngga pinyibakan Mai.

³⁵Ngga berkat Mai, bara raja mritah daya Mai, kan ngara rŭŭ di tana bayah ngga damŭn anŭ adi Kaam mbŭh nggen di ngara; pak ngara dŭh raan taran udip bidosa ka bituan di Kaam.

³⁶Ka madin kieh jadi urun di tarun tana adi Kaam mbŭh nggen di kieh, tana damŭn ati adi nggen pinguman di kieh.

³⁷Kayuh adi tana ati piruah dog sirapas bara raja adi Kaam bada nguasa kieh amai kieh bidosa. Ngara ndai ngga suka asŭng ngara di tunduh kieh ka di tunduh dāng kudip ami, ka kieh mbŭh bana susah!”

³⁸Sabab sopŭrŭg anŭ adi mbŭh jadi, kieh, daya Israel, ndai payu pekat-janji adi dog nuris, ka bara pinguru ami, bara daya Levi, ngga bara imam ami na chop-tandā ngara dieh.