Read Biatah Bidayuh ESTHER 1 Bible Online

ESTHER 1 - Biatah Bidayuh bible

ESTHER 1

¹ So takta-i di Susa adi sindŭ kupo di Persia, Raja Xerxes mritah 127 utung rais, so India ndŭg Ethiopia.

³Di sawa adi taruh darŭm pinyipritah-i ayŭh ndai gawai bās yŭn sopŭrŭg bara pinurung-i ngga bara pingubak pingubak darŭm pritah-i. Bara tibaran soldadu Persia ngga Media mbŭh agi sua tikuruk, samŭn bara gabenor ngga bara pingibās so utung utung rais.

⁴Sitian nŭm buran ayŭh kiren pinyikaya empaya ngga sopŭrŭg bragah ngga sangŭn-i.

⁵Ripas anŭ, raja ndai gawai bās yŭn sopŭrŭg rayat adi rŭŭ di sindŭ kupo Susa, adi kaya ngga adi sirata. Ngara bigawai ndi minggu ka dog ndai di badag bunga istana raja.

⁶Badag anŭ dog ngabuh ngga tabir banang linen adi biru ngga adi buda, dog mŭŭng ngga taris linen adi bēng di sigarong pirak di tiang tiang bās mabel. Dudu pangō adi dog marut ngga mas bait pirak agi dog na di badag, adi dog nutu ngga mabel buda, kristal bireh, kiruping-darŭm kirubung rukan, ka batuh adi bikala.

⁷Raja piruah raru bagŭ wain adi dog ngidang ngga saker mas adi barang ka mun suan-i.

⁸Daya bisa nok wain sikiang kiang ngara raan; ka raja mbŭh nggen ukum di bara daya-gaji istana nang daya siŭn nok sikiang kiang ngara raan.[1]

⁹Atan anŭ, di darŭm istana Rani Vashti ndai gawai yŭn bara dayung.

¹⁰Di andu adi ju darŭm gawai-i anŭ raja mbŭh birunok ngga gaŭn pawŭn, jadi ayŭh bagan bada mŭrŭt ju naan eunuch adi daya-gaji yŭn adŭp-i, Mehuman, Biztha, Harbona, Bigtha, Abagtha, Zethar, ngga Carkas.

¹¹Ayŭh nggen ukum di ngara bada taban Rani Vashti mŭrŭt, nēn makota-i. Rani anŭ inŭh dayung adi ramus, ka raja raan kiren pinyiramus-i di bara pingubak ngga bara pingabang-i.

¹²Pak kan daya daya-gaji anŭ kidaan di Rani Vashti pesan raja, ayŭh abah mandŭg. Anŭ bada raja raru bangok.

¹³Raja ngga kanyet-i ari mite pikir-kira di har ukum-adat ngga atur, ayŭh bagan bara adi tukang pitayan yŭn-i, adi puan ani patut dog ndai.

¹⁴Ngara adi ari-i yŭn mite pinyitayan inŭh Carshena, Shethar, Admatha, Tarshish, Meres, Marsena, ngga Memucan -- ju naan pinurung Persia ngga Media adi bās pangkat-i darŭm pritah.

¹⁵Ayŭh nang di ngara anŭ, “Aku, Raja Xerxes, pait daya-gaji ku ka Rani Vashti ngga pesan, ka ayŭh abah tunda-i! Ani sŭn ukum-adat nang kayuh adi patut ata ndai di ayŭh?”

¹⁶Komŭnŭ Memucan nang di raja ngga di bara pinurung-i: “Rani Vashti mbŭh nggen mangŭh dŭh di raja adŭ pak di bara pinurung-i -- sibatur-i di sopŭrŭg dari darŭm empaya!

¹⁷Barang naan dayung darŭm empaya re dŭh stabi di banŭh ngara kan ngara dingah kayuh adi rani mbŭh ndai. Ngara re nang, ‘Raja Xerxes pesan Rani Vashti bada mandŭg ka yŭn adŭp-i, pak ayŭh abah.’

¹⁸Kan sawŭn sawŭn pinurung raja Persia ngga Media dingah pasar urah rani, ngara re kidaan di banŭh ngara diŭ so andu karŭm. Bara sawŭn di barang yŭn re dŭh stabi di banŭh ngara, ka bara banŭh re baji di sawŭn ngara.

¹⁹Kambŭi-i kana di pikir Tuan Raja, piruah pinganang ukum adi kidaan nang Vashti re dŭh tia tatŭng di sirung jawin raja. Bada ukum anŭ dog nuris jadi ukum ukum-adat Persia ngga Media, isa-i dŭh bisa dog ngubah. Komŭnŭ bada dayung adi kana dŭ gati ayŭh jadi rani.

²⁰Kan pinganang ukum mai mbŭh dog puan di ndi tarun tana empaya adi bayah ati, barang naan dayung re stabi di banŭh ngara, bait-i ayŭh daya kaya puan kah daya sirata.”

²¹Raja ngga bara pinurung-i situju di pikir-kira anŭ, ka raja ndai nimun adi mbŭh Memucan nang.

²²Di barang utung utung rais darŭm empaya ayŭh pait pinganang darŭm piminyu ngga turis adi dog pakai diginŭ, nang[2] barang naan banŭh patut jadi pingubak rawang di ramin arŭn-i ka biyŭn sukup kuasa di ani ani pikir-kira adi dog ndai.