Read Biatah Bidayuh ESTHER 2 Bible Online

ESTHER 2 - Biatah Bidayuh bible

ESTHER 2

¹Ripas anŭ, sunggu raja mbŭh dŭh tia baji, ayŭh babŭ bipikir pasar kayuh adi Vashti mbŭh ndai ka pasar pinganang ukum adi mbŭh-i piruah da nyatŭk ayŭh.

²Jadi agi kada adi tukang pitayan yŭn-i adi rapat ngga ayŭh, nang, “Mani kaam dŭh jiroh dayung dayung tibŭn adi ramus?

³Kaam bisa tijuan pinurung pinurung di barang utung rais darŭm empaya ka nggen ukum bada ngara taban sopŭrŭg dayung adi ramus adi mara ka istana-dayung digiti di Susa, adi sindŭ kupo. Na ngara di ribo pinyita Hegai, ndi naan eunuch adi tukang kingat bara dayung mai, ka bada pinyiramus ngara dog sita.

⁴Komŭnŭ tambit sianŭ adi mara adi siabo mai rindu ka bada ayŭh jadi rani ngga gati Vashti.” Raja pikir pinyitayan anŭ kana, ka ayŭh tunda-i.

⁵Di Susa agi ndi naan daya Jahudi dŭn Mordecai anak Jair; ayŭh anŭ so tibaran-asar Benjamin ka sesang Kish ngga Shimei.

⁶ Kan Raja Nebuchadnezzar so Babylon taban Jehoiachin adi raja Judah ayō bara daya-takap adi bŭkŭn so Jerusalem, Mordecai mbŭh ndi naan so ngara.

⁷Ayŭh biyŭn bitungar adi dŭn Esther, ka dŭn Hebrew-i inŭh Hadassah; ayŭh dayung adi ramus buang piayong. Kan sindŭ sama-i kabŭs, Mordecai tambit ayŭh ka nyiran ayŭh nimun anak adŭp-i.

⁸Kan raja mbŭh piruah pinganang ukum-i adi bauh ka bagŭ dayung adi mara mbŭh dog taban ka Susa, Esther mbŭh ndi naan so ngara. Ayŭh gŭh mbŭh dog taban ka istana raja di ribo pinyita Hegai, adi nguasa istana-dayung.

⁹Hegai rindu Esther, ka mbŭh kana ngga ayŭh. Ayŭh rikas piguru sita pinyiramus-i ka nambah pinyita anŭ ngga pinguman adi patut. Ayŭh nggen di ayŭh tarun yŭn adi siabo kana di istana-dayung ka tijuan ju naan dayung mara adi nakit dog mien so istana bada ngidang ayŭh.

¹⁰Darŭm tipuh anŭ, amai Mordecai muko bakan ayŭh, Esther dŭh kidaan di tadŭ daya adŭp-i daya Jahudi.

¹¹Barang andu Mordecai panu matak mari di jawin badag istana-dayung anŭ, an puan munki ayŭh ka ani adi re jadi di ayŭh.

¹²Pinyita pinyiramus dayung inŭh ndi sawa -- pisŭ ganan ngga inyo myrrh sitian ju buran ka ngga inyo balsam sitian nŭm buran ripas anŭ. Ko anŭ, barang naan dayung anŭ bikires kires dog taban ka yŭn Raja Xerxes.

¹³Kan dayung panu so istana-dayung di ka istana, dayung anŭ an nēn tadŭ tadŭ piraka adi raan-i.

¹⁴Ayŭh an di kamanŭ singumi andu, ka isan isan andu jawa ndi ayŭh an dog taban ka yŭn istana-dayung adi bŭkŭn di ribo pinyita Shaashgaz, ndi naan eunuch adi nguasa bara dayung nyikŭn raja. Ayŭh dŭh di ka yŭn raja dinge adŭ-i kambŭi raja mbŭh sukup rindu ayŭh ka bagan ayŭh pakai dŭn-i.

¹⁵Tipuh mbŭh mandŭg adi ngga Esther di ka yŭn Raja. Esther -- anak Abihail ka bitungar Mordecai adi tambit ayŭh bada jadi anak adŭp-i; Esther -- dog nganju barang naan daya adi kiris ayŭh. Kan-i mbŭh idar-i, ayŭh nēn piraka adi Hegai, eunuch adi nguasa istana-dayung, pitayan ayŭh bada nēn.

¹⁶Jadi di sawa adi ju darŭm pinyipritah Xerxes, darŭm buran simŭng, buran Tebeth, Esther dog taban ka yŭn Raja Xerxes di istana.

¹⁷Raja rindu ayŭh rabis so tadŭ tadŭ dayung anŭ adi bŭkŭn, ka rabis so ngara adi bŭkŭn ayŭh mbŭh kana ngga ayŭh ka siŭt ayŭh. Ayŭh kasŭk makota di ubak-i ka bada ayŭh jadi rani gati Vashti.

¹⁸Komŭnŭ raja ndai gawai bās yŭn Esther ka bagan sopŭrŭg pinurung ngga bara pingubak. Ayŭh bada daya primisi[3] di ndi tarun tana empaya ka nggen raru bagŭ pinganggen.

¹⁹Atan anŭ, Mordecai mbŭh dog tijuan raja bada jadi pingubak adi tukang ngatur kraja.

²⁰Ka Esther, ayŭh gi-dŭh bada daya puan adŭp-i daya Jahudi. Mordecai muko kidaan di ayŭh bada dŭh kidaan di tadŭ tadŭ daya, ka di kayuh anŭ ayŭh tunda pinganang-i, nimun ayŭh dingah pinganang-i di andu ayŭh gibabŭ anak daya di ribo pinyita-i.

²¹Di tika Mordecai nyiraja di istana, Bigthana ngga Teresh, duwŭh naan eunuch istana adi jaga tiban birit raja, mandam atin-i di raja ka bipekat an siŭ ayŭh.

²²Mordecai puan pekat ngara ka kidaan di Rani Esther, adi rasu kidaan di raja kayuh adi Mordecai mbŭh puan.

²³Kan kayuh anŭ dog nyasat, ka dog dapŭd nang sawŭ, soduwŭh daya anŭ dog nggen ukum tangid ndŭg kabŭs. Raja nggen ukum bada har anŭ dog nuris darŭm rekod pritah.