Read Biatah Bidayuh ESTHER 3 Bible Online

ESTHER 3 - Biatah Bidayuh bible

ESTHER 3

¹Mua tian-i ripas anŭ Raja Xerxes paad pangkat ndi naan daya dŭn Haman bada jadi Pinguru Bās. Haman inŭh anak Hammedatha, sesang Agag.[4]

²Raja nggen ukum bada sopŭrŭg pinurung-i stabi di Haman, anŭ inŭh sidikang ka mutu ubak ka ayŭh. Sopŭrŭg ngara ndai simŭnŭ, adŭ-i Mordecai, adi abah ndai simŭnŭ.

³Bara pinurung adi bŭkŭn siken mani ayŭh miranggar ukum raja;

⁴barang andu ngara ngasu ayŭh, pak ayŭh dŭh piduri kayuh adi nang ngara. “Aku ati daya Jahudi,” ayŭh nang, “ka aku dŭh bisa mutu ubak ku ka Haman.” Jadi ngara kidaan di Haman pasar kayuh anŭ, an puan tungang kah dŭh ayŭh trima urah Mordecai.

⁵Haman mbŭh raru baji kan ayŭh dingah Mordecai dŭh re sidikang ka mutu ubak-i ka ayŭh,

⁶ka kan ayŭh dingah Mordecai anŭ daya Jahudi, ayŭh ndai pikir-i an ngukum dŭh-i Mordecai adŭ. Ayŭh bisatur an siŭ sopŭrŭg daya Jahudi adi darŭm Empaya Persia.

⁷Di sawa adi simŭng duwŭh darŭm pinyipritah Raja Xerxes, darŭm sibungas buran, buran Nisan, Haman nggen ukum bada dadu dog taran (“purim”, ngara kadŭn-i) ngga natu andu ngga buran adi kana ngga pimanu pekat-i. Andu adi simŭng taruh darŭm buran simŭng duwŭh, buran Adar, inŭh andu adi-i mien.

⁸Ka Haman kidaan di raja, “Agi ndi bangsa adi mbŭh mingare di ndi tarun tarun darŭm empaya mai, ka agi di barang utung rais. Ngara sita adat adi dŭh mun tung daya bŭkŭn. Nambah ka anŭ, ngara dŭh an tunda ukum ukum-adat empaya; jadi dŭh-i kana kambŭi kaam nurut ngara.

⁹Kambŭi-i kana di pikir Tuan Raja, piruah ukum nang ngara anŭ an dog nggen ukum kabŭs. Kambŭi kaam ndai simŭnŭ, aku puan nang aku tungang pibŭrŭt 340,000 kilogram pirak ka darŭm pinyirikŭn rata pritah ngga pimanu kraja darŭm empaya.”

¹⁰Raja kadi sisin so trinju-i, adi siraru-i pakai ngga chop pinganang ukum, ka nggen-i di pinganyu daya Jahudi, Haman anak Hammedatha, adi sesang Agag.

¹¹Raja nang di ayŭh, “Bara daya anŭ samŭn duit ngara inŭh jamu; ndai ani ani adi kuu raan ngga ngara.”

¹²Jadi di andu adi simŭng taruh darŭm sibungas buran, Haman bagan tukang pinuris raja ka kidaan pinganang ukum so raja adi-i bada ayŭh mindai ka darŭm barang piminyu ngga barang turis adi dog pakai darŭm empaya ka bada-i dog pait ka sopŭrŭg pimritah, bara gabenor, ngga bara pinurung. Pinganang ukum anŭ dog piruah pakai dŭn Raja Xerxes ka dog nandā ngga chop sisin-i dieh.

¹³Daya daya adi tukang taban surat taban pinganang ukum anŭ ka barang utung rais darŭm empaya. Ukum anŭ brisi ngga atur adi nang darŭm ndi andu, andu adi simŭng taruh darŭm buran Adar, sopŭrŭg daya Jahudi -- mara bait minyamba, dayung bait anak-anya -- an dog siŭ. Ngara an dog siŭ ka dŭh kira masi, ka kayuh kayuh adi ngara dapu an dog sirapas.

¹⁴Pinganang ukum anŭ an dog piagah di barang utung rais, isa barang naan daya sidia adŭp ngara kan andu anŭ mandŭg.

¹⁵So ka pesan raja ukum mbŭh dog piruah darŭm sindŭ kupo Susa, ka daya adi tukang taban surat taban agah anŭ ka utung utung rais. Raja ngga Haman guru ka nok sitadŭn kupo Susa mbŭh bipito bada agah anŭ.