Read Biatah Bidayuh ESTHER 4 Bible Online

ESTHER 4 - Biatah Bidayuh bible

ESTHER 4

¹Kan Mordecai dingah sopŭrŭg kayuh anŭ adi mbŭh jadi, ayŭh nyiratak piraka-i amai susah. Komŭnŭ ayŭh nēn banang guni, ngabu apŭk di ubak-i, ka panu darŭm kupo buang bana sien,

²ndŭg ka ayŭh mandŭg di tiban istana. Ayŭh dŭh mŭrŭt amai daya adi nēn banang guni taŭn dŭh siŭn mŭrŭt.

³Di ndi tarun tana utung utung rais, di yŭn pinganang ukum raja mbŭh dog kidaan, diginŭ mbŭh agi puās adi raru bana di dupan daya Jahudi. Ngara bipusa, sien ka nyirais, ka bagŭ ngara mbŭh nēn banang guni ka guring di tunduh apuk.

⁴Kan bara dayung Esther adi mara anŭ samŭn eunuch eunuch-i kidaan di ayŭh pasar kayuh adi Mordecai ndai, ayŭh mbŭh raru bipito. Ayŭh pait kada piraka ka yŭn Mordecai, pak ayŭh dŭh trima-i.

⁵Komŭnŭ ayŭh bagan Hathach, ndi naan eunuch istana adi raja mbŭh tijuan bada jadi daya gaji-i, ka kidaan di ayŭh bada di ka Mordecai di siken ani har-i ka ani sabab-i mun anŭ.

⁶Hathach di ka Mordecai di pakan kupo di tiban istana.

⁷Mordecai kidaan di ayŭh sopŭrŭg kayuh adi mbŭh jadi di adŭp-i ka kiang duit adi Haman mbŭh bijanji an pibŭrŭt di pinyirikŭn rata pritah kambŭi sopŭrŭg daya Jahudi dog siŭ.

⁸Ayŭh nggen di Hathach ndi kiping surat pinganang ukum adi muko dog piruah di Susa, adi nggen ukum bada sopŭrŭg daya Jahudi dog siŭ. Mordecai mite ayŭh taban-i ka Esther, kidaan rati kayuh kayuh anŭ di ayŭh, ka mite ayŭh di ka yŭn raja ka mite raja turung masi di daya-i, adi daya Jahudi.

⁹Hathach sawŭ di,

¹⁰ka Esther bada ayŭh taban pinganang ati ka yŭn Mordecai:

¹¹“Kambŭi agi daya, dari bait dayung, di ka badag adi tura ka darŭm di bidapŭd ngga raja dŭh sabab dog bagan, daya anŭ dŭh siŭn dŭh dog siŭ. Anŭ inŭh ukum-adat; barang naan daya, bara adi tukang pitayan yŭn raja ngga sopŭrŭg daya adi di utung utung rais, an puan-i. Ndi adŭ aran ngga pirupas adŭp so ukum-adat anŭ, anŭ inŭh kan raja tiju daya ngga sikud-pinyipritah mas-i. Pak madin mbŭh ndi buran raja mating bagan aku.”

¹²Kan Mordecai trima pinganang Esther,

¹³ayŭh nggen pinganang bakan ati: “Dŭhnyah kuu pikir adŭp mu mbŭh rŭŭ di istana ka kuu re siramat dŭ so daya Jahudi adi bŭkŭn.

¹⁴Kambŭi kuu pirŭŭ adŭp mu di tika mun ati, pinurung babŭ gŭh re mandŭg so shorga yŭn daya Jahudi, ka ngara re siramat, pak kuu re kabŭs ka rawang sama mu re mating tia. Asi re puan, bait-i kuu dŭh patut jadi rani di tika adi mun ati!”

¹⁵Esther pait pinyinam sakati ka Mordecai:

¹⁶“Panu di bada sopŭrŭg daya Jahudi tikuruk di Susa. Bada ngara bipusa ka bidua yŭn ku. Dŭhnyah man bait nok tadŭ tadŭ kayuh sitŭkŭd taruh andu taruh ngarŭm. Bara dayung ku adi mara ngga adŭp ku re ndai simŭnŭ gŭh. Ripas anŭ, aku re di ka yŭn raja, sunggu-i miranggar ukum-adat aku ndai simŭnŭ. Kambŭi aku patut kabŭs amai aku ndai simŭnŭ, isa-i aku kabŭs.”

¹⁷Mordecai panu di ndai sopŭrŭg anŭ adi Esther mbŭh bada ayŭh ndai.