Read Biatah Bidayuh ESTHER 5 Bible Online

ESTHER 5 - Biatah Bidayuh bible

ESTHER 5

¹Di andu adi taruh darŭm bipusa Esther nēn piraka rani-i; ayŭh di ka mijog di badag adi tura ka darŭm istana, nura birit takta. Raja agi diginŭ, guru di takta, nura tiban buwang.

²Kan raja kiris Rani Esther mijog di sapa, ayŭh raru gaŭn kiris ayŭh, ka rasu tiju ayŭh ngga sikud-pinyipritah mas-i. Ayŭh mŭrŭt ka tama tŭbŭn sikud anŭ.

³“Ani agah, Rani Esther?” raja siken. “Kidaan di aku ani raan mu, ka kuu re dapŭd-i -- sunggu bait kani pimite mu anŭ sitangah utung tarun tana empaya ku.”

⁴Esther nam, “Kambŭi-i kana di pikir Tuan Raja, aku mite kuu ngga Haman jadi pingabang ku ngarŭm ati di gawai adi aku mbŭh sidia yŭn mu.”

⁵Raja rasu nggen ukum bada daya bagan Haman da rikas mandŭg, isa ngara dapŭd samah trima pinyibagan Esther ka gawai anŭ. Jadi raja ngga Haman di ka gawai Esther.

⁶Darŭm ngara nok wain raja siken di Esther, “Kidaan di aku ani raan mu, ka aku bisa nggen-i di kuu. Ani ani pimite mu aku re nggen, bait-i sitangah utung tarun tana empaya ku.”

⁸“Kambŭi Tuan Raja tŭk sawŭ an nggen pimite ku, aku raan kuu ngga Haman jadi pingabang ku di gawai adi aku mbŭh sidia yŭn mu di andu sipagi ani. Nganŭ aku re kidaan di kuu kayuh adi aku raan.”

⁹Kan Haman bu so gawai anŭ ayŭh mbŭh raru gaŭn. Pak kan ayŭh kiris Mordecai di tiban istana, ka kan Mordecai dŭh makat ka nggen stabi di ayŭh adi aŭn murah, Haman raru baji di ayŭh.

¹⁰Pak ayŭh dŭh ndai urah-i diginŭ; ayŭh radus maad. Komŭnŭ ayŭh bagan bara dingan-i ka ramin-i ka bada sawŭn-i Zeresh sua guru ngga ngara.

¹¹Ayŭh mingangŭn pasar kaya raja-i di sirung jawin ngara, kudu madis anak dari-i, munki raja paad pangkat-i, ka munki masam biguna ayŭh so bara pinurung raja adi bŭkŭn.

¹²“Adi rabis so anŭ,” Haman pijuu minyu, “Rani Esther ndai gawai dŭh yŭn daya bŭkŭn pak yŭn kieh duwŭh raja, ka kieh duwŭh re dog bagan dinge sipagi.

¹³Pak kayuh anŭ dŭh biyŭn rati di aku kambŭi aku babŭ kiris Mordecai guru di tiban istana.”

¹⁴Jadi sawŭn-i ngga sopŭrŭg dingan-i nang, “Mani kuu dŭh pijog ndi tiang yŭn tangid daya, adi duwŭh puru mita bigatung? Isan isan andu sipagi kuu bisa mite raja nggen ukum bada Mordecai dog tangid dieh, ka ripas anŭ kuu bisa di ka gawai ngga atin gaŭn.” Haman pikir anŭ atur adi kana, jadi ayŭh bada tiang adi yŭn tangid daya dog pijog.