Read Biatah Bidayuh ESTHER 7 Bible Online

ESTHER 7 - Biatah Bidayuh bible

ESTHER 7

¹Komŭnŭ raja ngga Haman di man ayō Esther

²adi piduwŭh saba. Darŭm ngara nok wain, raja siken ayŭh dinge, “Jadi meh, Rani Esther, ani raan mu? Kidaan di aku ka kuu re trima-i. Aku re nggen gŭh sitangah utung tarun tana empaya ku.”

³Rani Esther nam, “Kambŭi-i kana di pikir Tuan Raja an nggen pimite ku, pimite ku inŭh dŭhnyah tandah aku ngga bara daya ku adi daya Jahudi dog siŭ.

⁴Bara daya ku mbŭh dog jua yŭn dog siŭ. Kambŭi-i dŭh rabis so dog jua jadi urun, aku dŭh bidudu ka dŭh gŭh mito kuu;[6] pak kieh mbŭh sindŭk dog pirarap!”

⁵Komŭnŭ Raja Xerxes siken Rani Esther, “Asi anŭ adi birani ndai kayuh mun anŭ? Asi daya anŭ?”

⁶Esther nam, “Pinganyu ami, adi kisiis kieh, inŭh daya adi arap ati, Haman!” Haman kimat raja ngga rani darŭm taru.

⁷Raja makat buang-i raru baji, ruah so birit anŭ, di ka sapa di ka teya bunga istana. Haman puan raja re ngukum adŭp-i sabab har anŭ, jadi ayŭh babŭ diginŭ mite turung so Rani Esther bada nyiramat adŭp-i.

⁸Haman aŭn mutu di tunduh pangō Esther mite masi so Esther, kan raja pari so teya bunga. Kiris anŭ, raja nyirais nang, “Daya ati re miragag rani digiti di jawin ku, darŭm istana ku kah?” Raja gibayuh ko minyu kan kudu kudu naan eunuch mbŭh nutu jawin Haman.

⁹Komŭnŭ ndi naan so ngara, dŭn Harbonah, nang, “Haman mbŭh gŭh pijog ndi tiang sindŭk ramin-i yŭn tangid daya, re yŭn-i tangid Mordecai, adi mbŭh nyiramat asŭng Tuan Raja. Tiang anŭ inŭh duwŭh puru duwŭh mita bigatung!” “Tangid Haman di tiang anŭ!” Raja mritah ngara.

¹⁰Jadi Haman dog tangid di tiang adi adŭp-i mbŭh pijog an-i yŭn tangid Mordecai. Komŭnŭ atin raja pari madŭd.