Read Biatah Bidayuh ESTHER 8 Bible Online

ESTHER 8 - Biatah Bidayuh bible

ESTHER 8

¹Di andu anŭ gŭh Raja Xerxes nggen di Esther sopŭrŭg rata Haman, adi pinganyu daya Jahudi. Esther kidaan di raja nang Mordecai bimadis ngga adŭp-i, ka so nganŭ Mordecai dog nyibandar bidapŭd ngga raja.

²Raja kadi sisin adi agi chop tandā-i dieh (adi muko-i tambit pari so Haman) ka nggen-i di Mordecai. Esther bada Mordecai tukang nguasa rata Haman.

³Komŭnŭ Esther minyu di raja dinge, mŭŭb di kaja raja ka sien. Ayŭh mite raja pirŭŭ pekat arap Haman, adi sesang Agag,[7] adi mbŭh-i ndai rawan daya Jahudi.

⁴Raja tiju ayŭh ngga sikud-pinyipritah mas-i, ka ayŭh mijog ka nang,

⁵“Kambŭi-i kana di pikir Tuan Raja, ka kambŭi kuu siŭt aku, ka kambŭi batur di kira mu, turung piruah pinganang ukum ngga pirŭŭ surat Haman, adi anak Hammedatha adi sesang Agag, adi nggen ukum bada sopŭrŭg daya Jahudi adi darŭm empaya dog siŭ.

⁶Simuki aku re tan kiris kayuh mun anŭ nyatŭk daya ku adi daya Jahudi, ka bara madis adŭp ku gŭh mbŭh dog siŭ?”

⁷Raja Xerxes rasu nang di Rani Esther ngga Mordecai, adi daya Jahudi, “Tingga, aku mbŭh bada Haman dog tangid amai pekat-i rawan daya Jahudi, ka aku gŭh mbŭh nggen rata-i di Esther.

⁸Pak pinganang ukum adi dog piruah ngga dŭn raja ka dog chop ngga chop-tandā raja dŭh dapŭd dog ngubah. Pak sunggu mŭnŭ, kuu bisa nuris surat ka bara daya Jahudi tadŭ tadŭ kayuh adi kuu raan; ka kuu bisa nuris-i pakai dŭn ku ka chop-i pakai chop tandā-raja.”

⁹Kayuh anŭ jadi simŭnŭ di andu 23 darŭm buran adi taruh, buran Sivan. Mordecai bagan bara pinuris raja ka nggen pinganang adi ngara nuris ka pait ka bara daya Jahudi, ka bara gabenor, ka bara pingubak adi ngatur kraja, ka bara pinurung darŭm 127 utung rais so India ndŭg Ethiopia.

¹⁰Mordecai nuris surat surat anŭ pakai dŭn Raja Xerxes, ka chop-i ngga chop-tandā raja. Surat surat anŭ dog taban bara adi nunggang kuda adi raju bikaduh, so kandang kuda raja.

¹¹Surat surat anŭ kidaan nang raja nyibandar bara daya Jahudi di barang kupo bada tikuruk yŭn nyiramat adŭp ngara. Kambŭi bara daya adi bisinyata so tadŭ tadŭ bangsa darŭm utung utung rais nyerang dari daya Jahudi, anak anak ngara, bait sawŭn ngara, daya Jahudi bisa rawan ka pirabur bara pinyerang anŭ. Ngara bisa siŭ barang naan ngara samŭn anak ngga sawŭn ngara, ka tambit rata ngara.

¹²Ukum anŭ dŭh siŭn dŭh dog pimanu di ndi tarun tana Empaya Persia di andu adi muko dog miratak yŭn siŭ bara daya Jahudi, simŭng taruh andu buran Adar, buran adi simŭng duwŭh.

¹³Ukum anŭ an dog piagah jadi ukum-adat ka dog kidaan di barang naan daya darŭm barang utung rais, isa bara daya Jahudi sidia adŭp ngara yŭn maras serang kan andu anŭ mandŭg.

¹⁴So ka pesan adŭp raja bara pinunggang kuda anŭ nunggang kuda kuda raja ka matak ngga sirikas rikas ngara. Ukum anŭ gŭh dog kidaan di bara daya di Susa, adi sindŭ kupo.

¹⁵Mordecai ruah so istana, nēn jipo-ambu raja adi biru ngga buda, ka jipo adi dog ndai so banang linen adi jarŭh, ka di ubak-i makota mas adi raru ramus. Komŭnŭ di aran aran di Susa dog dingah sirais gaŭn ngga tarā.

¹⁶Diginŭ bara daya Jahudi mbŭh gaŭn buang raru sanang asŭng, amai anŭ mbŭh keya ka pimanang.

¹⁷Di barang kupo ngga utung rais, di tadŭ yŭn pinganang ukum anŭ dog basa, bara daya Jahudi mbit primisi ka bigawai ngga gaŭn. Bagŭ daya bŭkŭn jadi daya bangsa Jahudi, sabab ngara mbŭh taru daya bangsa anŭ.