Read Biatah Bidayuh ESTHER 9 Bible Online

ESTHER 9 - Biatah Bidayuh bible

ESTHER 9

¹Kan-i mbŭh andu adi simŭng taruh darŭm buran Adar, andu adi ngga pinganang ukum raja dog pimanu, ka andu adi ngga pinganyu daya Jahudi harap adŭp-i nguasa daya Jahudi; gŭt-i daya Jahudi adi ngarah ngara.

²Di tarun yŭn daya Jahudi di barang kupo[8] darŭm empaya, bara daya Jahudi tikuruk sidia re nyerang tadŭ daya adi suba an kinaman ngara. Daya di barang yŭn taru ngara, ka mating daya dapŭd rawan ngara.

³Sibatur-i, sopŭrŭg pinurung darŭm utung utung rais -- bara gabenor, bara pingubak adi tukang ngatur kraja, ngga bara pingarun raja -- turung daya Jahudi sabab ngara taru Mordecai.

⁴Sopŭrŭg daya darŭm empaya mbŭh puan nang Mordecai madin mbŭh daya adi bikuasa di istana, buang kuasa-i anŭ taŭn mbŭh aŭn bitambah.

⁵Jadi daya Jahudi dapŭd ndai ani ani ngara raan ngga bara pinganyu ngara. Ngara nyerang ngara ngga pedang ka siŭ ngara.

⁶Di Susa, adi sindŭ kupo, bara daya Jahudi siŭ 500 naan daya.

⁷Di dupan ngara adi dog siŭ inŭh simŭng madis anak Haman adi anak Hammedatha, adi pinganyu daya Jahudi: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai, ngga Vaizatha. Darŭm-i mun anŭ, mating buat-rata daya dog sirapas.

¹¹Di andu anŭ gŭh prungun daya adi dog siŭ di Susa dog kidaan di raja.

¹²Ayŭh nang di Rani Esther, “Di Susa adŭ, daya Jahudi mbŭh siŭ rimŭh ratus naan daya, samŭn simŭng madis anak Haman. Munki meh di utung utung rais adi bŭkŭn! Ani raan mu madin? Kuu bisa biyŭn-i. Kidaan di aku ani dinge raan mu, ka aku re nggen-i di kuu.”

¹³Esther nam, “Kambŭi-i kana di pikir Tuan Raja, bada bara daya Jahudi ndai dinge sipagi kayuh adi dog nyibandar ngara ndai andu ati. Ka nggen ukum bada tadang anak anak Haman adi simŭng madis dog tangid di tiang anŭ adi yŭn daya dog tangid.”

¹⁴Raja nggen ukum bada pimite anŭ dog pimanu, ka pinganang ukum anŭ dog piruah di Susa. Tadang anak anak Haman adi simŭng madis dog tangid.

¹⁵Di andu simŭng pat darŭm buran Adar bara daya Jahudi di Susa tikuruk dinge ka siŭ 300 naan dinge daya di kupo. Pak gibabŭ gŭh ngara dŭh sirapas buat-rata daya.

¹⁶Daya Jahudi di utung utung rais gŭh tikuruk ka ngibān adŭp ngara. Ngara ngarah pinganyu ka siŭ 75,000 naan daya adi tiru di ngara. Pak ngara dŭh gŭh sirapas buat-rata daya.

¹⁷Anŭ inŭh di andu adi simŭng taruh darŭm buran Adar. Di andu anŭ ndi, di andu adi simŭng pat, mating tia bisiŭ, ka ngara bada-i jadi andu adi gaŭn yŭn bigawai.

¹⁸Pak bara daya Jahudi di Susa bada andu adi simŭng-rimŭh andu primisi ngara ka bigawai andu anŭ, amai ngara ko siŭ pinganyu ngara andu adi simŭng taruh ngga andu adi simŭng pat ka rŭŭ di andu adi simŭng rimŭh.

¹⁹Anŭ inŭh sabab bara daya Jahudi adi rŭŭ di anak anak kupo bigawai di andu adi simŭng pat darŭm buran Adar, andu adi ngga nggen pinganggen ka pinguman di dingan ngara.

²⁰Mordecai bada kayuh kayuh anŭ adi mbŭh jadi dog nuris ka dog pait ka sopŭrŭg daya Jahudi adi sindŭk ngga adi jo, di ndi tarun tana Empaya Persia,

²¹bada ngara sita andu adi simŭng pat ngga andu adi simŭng-rimŭh darŭm buran Adar bada jadi andu primisi barang sawa.

²²Anŭ inŭh andu adi ngga daya Jahudi ngarah pinganyu ngara; anŭ inŭh buran adi ngga pimudip jera ngga sangsara dog marik jadi pimudip gaŭn ngga sanang. Ngara dog bada sita andu andu anŭ ngga gawai ka rami, nggen pinganggen pinguman di dingan ka di daya sirata.

²³Jadi daya Jahudi tunda atur so Mordecai, ka gawai anŭ jadi kayuh adi dog ndai barang sawa.

²⁴ Haman anak Hammedatha adi sesang Agag ka pinganyu daya Jahudi muko taran dadu (puan kah “purim”, adi ngara kadŭn-i) ngga natu andu adi ngga pirabur daya Jahudi; ayŭh mbŭh bisatur an pirarap ngara.

²⁵Pak Esther di ka yŭn raja, ka raja piruah ukum adi dog nuris adi bada Haman kabŭs bada kayuh adi adŭp-i mbŭh ndai yŭn daya Jahudi. Ayŭh ngga bara anak-i dog tangid di uros adi yŭn tangid daya.

²⁶Anŭ meh sabab primisi anŭ dog kadŭn Purim. Sabab surat Mordecai ka sabab sopŭrŭg kayuh adi mbŭh jadi di tunduh ngara,

²⁷bara daya Jahudi mbŭh ndai atur yŭn adŭp ngara, bara sesang ngara, ka tadŭ daya adi raan jadi daya Jahudi, nang di tika adi patut barang sawa duwŭh andu primisi anŭ an ari dog sita nanyam ka pesan Mordecai.

²⁸Mbŭh dog natu nang barang rawang daya Jahudi darŭm turap bauh di barang utung rais ka di barang kupo patut ingat ka an adu adu sita andu andu gawai Purim.

²⁹Komŭnŭ Rani Esther, anak Abihail, ngga nambah tung Mordecai, nuris gŭh surat, yŭn nggen sukup kuasa-i ngga nyibandar surat Mordecai pasar Purim.

³⁰Surat anŭ dog pait nuju sopŭrŭg daya Jahudi, ka kada-i dog pait ka sopŭrŭg utung rais adi 127 darŭm Empaya Persia. Surat anŭ mite bara daya Jahudi udip darŭm damai buang siramat

³¹ka pesan ngara ngga bara sesang ngara bada sita gawai Purim di tipuh adi patut, nimun ngara trima atur bipusa ka tika ngurid. Anŭ inŭh pesan so Mordecai ngga Rani Esther.

³²Pinyipesan Esther, adi natu atur pasar gawai Purim, inŭh dog nuris darŭm surat.