Read Biatah Bidayuh PINYIRUAH 10 Bible Online

PINYIRUAH 10 - Biatah Bidayuh bible

PINYIRUAH 10

¹Komŭnŭ TUHAN nang di Moses, “Di dapŭd raja, Aku muko bada ayŭh ngga bara pinurung-i jadi baking, isa Aku bisa ndai pingandai-nginga Ku di ruang ngara

²ka isa kuu bisa kidaan di bara anak sukuh mu munki masam Aku nyibudo bara daya Egypt kan Aku ndai pingandai-nginga. Sopŭrŭg ngan re puan nang Aku ati TUHAN.”

³Jadi Moses ngga Aaron di dapŭd raja ka nang di ayŭh, “TUHAN, adi Tapa daya Hebrew, nang, ‘Ndŭg sinde kuu dŭh an nundok di Aku? Bada daya Ku ruah isa ngara bisa nyambah Aku.

⁴Kambŭi kuu gibabŭ gŭh dŭh raan bada ngara ruah, Aku re bada dudu kadis mandŭg ka rais mu andu sipagi.

⁵Sakan raru bagŭ-i kadis anŭ, tana re abo dog nutu-i. Kadis re man sopŭrŭg kayuh adi dŭh rusak da ujen batuh, samŭn tŭngŭn tŭngŭn kayuh adi dŭm.

⁶Kadis re ngisi istana mu, samŭn ramin bara pinurung mu, ka ramin bara daya mu. Kadis re rabis arap so tadŭ tadŭ kayuh adi tayung-babuk mu ko kiris.’ ” Komŭnŭ Moses bigiring ka bu.

⁷Bara pinurung minyu di raja, “Ndŭg sinde daya anŭ nyusah ata? Bada adŭ daya Israel ruah isa ngara bisa nyambah TUHAN adi Tapa ngara. Dŭh kah kaam rada nang Egypt mbŭh rusag?”

⁸Jadi Moses ngga Aaron dog bada pari ka yŭn raja, ka-i nang di ngara, “Angān bisa ruah ka nyambah TUHAN adi Tapa ngan. Pak sibatur-i asi meh so angān adi re di?”

⁹Moses nang, “Sopŭrŭg kieh re di, samŭn bara anak ka bara nyamba ami. Kieh re taban bara anak dari ngga anak dayung ami, bara biri ngga kambing ami ka bara sapi ami, sabab kieh dŭh siŭn dŭh kuka gawai ngga kibās TUHAN.”

¹⁰Raja nang, “Aku bipayu ngga adŭn TUHAN aku dŭh re bada angān taban bara dayung ngan ka bara anak ngan! Mbŭh giranan inŭh angān ati mbŭh bipekat an rawan pritah ku.

¹¹Dŭh! Bara dari adŭ bisa di ka nyambah TUHAN kambŭi anŭ pinyiraan ngan.” Nganŭ meh Moses ngga Aaron dog kasig so yŭn raja.

¹²Komŭnŭ TUHAN nang di Moses, “Pakat tangan mu tiju tarun tana Egypt isa dudu kadis mandŭg. Ngara re man sopŭrŭg kayuh adi timbu, sopŭrŭg kayuh adi dŭh rusak da ujen batuh.”

¹³Jadi Moses pakat sikud-i ka TUHAN bada sabak so timor mandŭg ka poh tarun tana rais ndi andu ndi ngarŭm anŭ. Ngga isan isan dudu kadis mbŭh agi.

¹⁴ Kadis mbŭh raru bagŭ mandŭg ka mbap di ndi tarun tarun tana rais. Gi-bŭn daya kiris kadis raru bagŭ mun anŭ, diŭ so anŭ bait ripas anŭ.

¹⁵Kadis mbŭh mingare nutu ndi tarun tarun ndŭg ka tana singŭt da-i; ngara man sopŭrŭg kayuh adi dŭh rusak da ujen batuh, samŭn buwa bawa di atuh kayuh. Mating kayuh barŭm di tadŭ tadŭ atuh tŭngŭn kayuh bait anak anak kayuh-udip dŭm di ndi tarun tana Egypt.

¹⁶Komŭnŭ raja bigaut bagan Moses ngga Aaron, ka nang, “Aku mbŭh bidosa rawan TUHAN adi Tapa ngan, ka rawan angān gŭh.

¹⁷Apun dosa ku kari ati adŭ ka bidua ka TUHAN adi Tapa ngan bada kadi ukum adi bisā ati so aku.”

¹⁸Moses bu so yŭn raja ka bidua ka TUHAN.

¹⁹Ka TUHAN nukar sabak so timor da jadi sabak adi raru daras so barat, adi poh dudu kadis anŭ ka Tanjung Suez.[9] Ndi mating gŭh kadis dŭm di Egypt.

²⁰Pak TUHAN bada raja baking, ka-i dŭh bada bara daya Israel ruah.

²¹Komŭnŭ TUHAN nang di Moses, “Pakat tangan mu tiju rangit, ka karŭm adi karŭm patŭ' re kinarŭm ndi tarun tana Egypt.”

²² Moses pakat tangan-i nuju rangit, ka ndi tarun tana Egypt mbŭh karŭm patŭ' sitadŭn taruh andu.

²³Bara daya Egypt mbŭh dŭh tungang kiris dingan-i, ka mating so ngara ruah ka sapa sitadŭn taruh andu anŭ. Pak daya daya Israel biyŭn jawa di tarun yŭn ngara rŭŭ.

²⁴Raja bagan Moses ka nang, “Angān bisa ruah di nyambah TUHAN; taban anak sawŭn ngan. Pak biri, kambing, ngga sapi ngan dŭh siŭn dŭh babŭ digiti.”

²⁵Moses nam, “Jadi kaam meh garang adi re nggen di kieh dāng dāng adi re kieh ndu sadis samŭn sadis badang adi re kieh jugan ka TUHAN adi Tapa ami.

²⁶Dŭh, kieh re taban dāng dāng ami; ndi dŭh gŭh kieh re tingge. Adŭp ami dŭh siŭn dŭh mien dāng adi re kieh ngga nyambah TUHAN adi Tapa ami. Ka sibayuh kieh ndŭg nŭ, kieh dŭh siŭn puan dāng aki ndi re kieh nyadis yŭn-I.”

²⁷TUHAN bada raja baking, ka ayŭh dŭh an bada ngara ruah.

²⁸Raja nang di Moses, “Bu so ti! Dŭhnyah bada aku kiris kuu dinge! Kambŭi aku kiris kuu dinge, kuu re kabŭs!”

²⁹“Batur pinganang mai,” Moses nam. “Kaam dŭh re kiris aku dinge.”