Read Biatah Bidayuh PINYIRUAH 13 Bible Online

PINYIRUAH 13 - Biatah Bidayuh bible

PINYIRUAH 13

¹TUHAN nang di Moses,

² “Nitah yŭn Ku sopŭrŭg anak pinuai dari, amai barang naan anak pinuai dari daya Israel ka barang pŭrŭng anak bungas dari dāng Aku dapu.”

³Moses nang di bara daya, “Ingat andu ati, andu adi ngga angān ruah so Egypt, tarun adi yŭn ngan jadi urun. Ati inŭh andu adi ngga TUHAN taban angān ruah pakai kuasa-I adi raru bās. Ruti adi biragi dŭh siŭn dog man.

⁴Angān ruah so Egypt di andu ati darŭm sibungas buran, buran Abib.

⁵TUHAN mbŭh bipayu ngga tayung-babuk ngan, an nggen di angān tarun tana daya Canaan, daya Hitti, daya Amor, daya Hivi, ka daya Jebus. Kan Ayŭh taban angān ngga mŭrŭt tarun tana anŭ adi kaya ka damŭn, angān dŭh siŭn dŭh an sita gawai ati darŭm buran ndi barang sawa.

⁶Sitŭkŭd ju andu angān dŭh siŭn dŭh man ruti adi dŭh biragi, ka ngga andu adi ju an agi gawai ngga kibās TUHAN.

⁷Sitŭkŭd ju andu angān dŭh siŭn man ruti adi dog ndai ngga ragi; Dŭhnyah nyikŭn ragi di tadŭ yŭn-i di rais ngan.

⁸Kan gawai anŭ piguru, kidaan rati-i di bara anak ngan nang angān ndai simŭnŭ sabab kayuh adi TUHAN mbŭh ndai yŭn ngan darŭm angān ruah so rais Egypt.

⁹Pinyita gawai ati inŭh jadi pingingat, keya ka kayuh adi dog mŭŭng di tangan ngan puan kah di arŭ ngan; ayŭh bada angān ingat nang angān an adu adu nyabŭt ka birajar Ukum-adat TUHAN, sabab TUHAN mbŭh taban angān ngga ruah so Egypt pakai kuasa bās-I.

¹⁰Sita gawai ati di andu adi mbŭh dog miratak barang sawa.

¹¹“TUHAN re taban angān ka tarun tana daya Canaan adi muko-I bipayu an nggen di angān ka di bara tayung-babuk ngan. Kan Ayŭh nggen-i di angān,

¹² angān dŭh siŭn dŭh jugan ka TUHAN barang naan anak pinuai dari ngan. Barang pŭrŭng anak bungas dari dāng ngan TUHAN dapu,

¹³pak angān dŭh siŭn dŭh jugan anak biri ngga miris pari barang pŭrŭng anak bungas kaldi. Kambŭi angān dŭh raan miris pari kaldi anŭ, angān mata tungo-i. Angān dŭh siŭn dŭh miris pari barang naan anak pinuai dari ngan.

¹⁴Jŭ, kan anak dari ngan siken ani rati pinyita gawai ati simuti, angān nam ayŭh nang, ‘Ngga kuasa bās-I TUHAN mbŭh taban ata ruah so Egypt, tarun yŭn ata ko jadi urun.

¹⁵Kan raja Egypt baking ka abah bada ata ruah so rais-i, TUHAN siŭ barang naan anak pinuai dari di Egypt, manusia ngga dāng. Anŭ meh sabab ata nyadis barang pŭrŭng anak bungas dari dāng ka TUHAN, pak miris pari anak pinuai dari ta.

¹⁶Pinyita gawai ati inŭh pingingat, keya ka kayuh adi dog mŭŭng di tangan ta puan kah di arŭ ta; ayŭh re bada ata ingat TUHAN mbŭh taban ata ngga ruah so Egypt pakai kuasa bās-I.’ ”

¹⁷Kan raja Egypt bada daya Israel ruah, Tapa dŭh taban ngara kadŭg aran tabing rawŭt Philistia, sunggu-i aran anŭ purok. Tapa pikir, “Aku dŭh raan ngara nukar pikir-i ka raan pari ka Egypt kan ngara kiris re agi biperang.”

¹⁸Ngapŭi meh TUHAN taban ngara kadŭg aran adi bikaring so tarun tana-pajam nuju Rawŭt Bireh.[10] Bara daya Israel mbŭh bisinyata sidia re biperang.

¹⁹ Moses taban tadang Joseph nanyam adi Joseph ko bipayu ngga daya Israel. Joseph mbŭh nang, “Kan Tapa piruah angān, angān dŭh siŭn dŭh taban tadang ku ngga ruah so tarun ati.”

²⁰Bara daya Israel matak so Sukkoth ka bibari di Etham, di bŭngŭn tarun tana-pajam.

²¹Sandu TUHAN panu diŭ di jawin ngara darŭm tŭngŭn abun, kiren aran di ngara; ka singarŭm darŭm tŭngŭn apui Ayŭh panu diŭ di jawin ngara nggen jawa di ngara, isa ngara bisa panu sandu ngga singarŭm.

²²Tŭngŭn abun ari agi diŭ di jawin ngara sandu, ka tŭngŭn apui singarŭm.