Read Biatah Bidayuh PINYIRUAH 15 Bible Online

PINYIRUAH 15 - Biatah Bidayuh bible

PINYIRUAH 15

¹ Komŭnŭ Moses ngga bara daya Israel nang ragu ati ka TUHAN: “Aku an nang ragu ka TUHAN, sabab Ayŭh mbŭh dapŭd pimanang adi bibragah; Ayŭh mbŭh taran bara kuda ngga pinunggang-i ka darŭm rawŭt.

² TUHAN inŭh pingibān ku adi tagap; Ayŭh inŭh sianŭ adi mbŭh nyiramat aku. Ayŭh inŭh Tapa ku, ka aku re kibās Ayŭh, Tapa sama ku, ka aku re biragu kibās Ayŭh.

³TUHAN inŭh pimagan; TUHAN inŭh adŭn-I.

⁴“Ayŭh taran bara soldadu Egypt ngga krita kuda ngara di rawŭt; bara pingubak soldadu Egypt adi siabo pandai mbŭh rŭnggŭd di Rawŭt Bireh.

⁵Rawŭt bās mbŭh ngapuh ngara; ngara timŭtŭm ka rasan-i mun batuh.

⁶“Tangan tauh Mai, TUHAN, mbŭh raru bikuasa; tangan Mai bada pinganyu randŭk.

⁷Darŭm pimanang bās Kaam mbŭh ngarah pinganyu Mai; baji Mai bijireb ka sigot ngara keya ka siriyang dog badang.

⁸Kaam poh tunduh rawŭt ka piin makat bigatung; ka mijog tŭnggŭn keya ka sindung; rasan rawŭt jadi badŭh buang riang.

⁹Pinganyu nang, ‘Aku re tadak ka nakap ngara; aku re kutung pinyikaya ngara ka tambit sopŭrŭg adi aku raan; aku re nyitak pedang ku ka tambit sopŭrŭg anŭ adi ngara biyŭn.’

¹⁰Pak Kaam poh ndi sidah, TUHAN, ka bara daya Egypt rasu rŭnggŭd; ngara timŭtŭm keya ka timah ka darŭm piin adi raru tŭrŭp.

¹¹“TUHAN, asi adi dupan bara tapa re mun Kaam? Asi re mun Kaam, bibragah buang kudus? Asi re bisa ndai pingandai-nginga ka pingandai bās mun jamai?

¹²Kaam ton tangan tauh Mai, ka tana tŭrŭn pinganyu ami.

¹³Tŭtŭd ngga janji Mai, Kaam nguru daya adi Kaam mbŭh nyiramat; ngga kuasa Mai Kaam nguru ngara ka yŭn tana kudus Mai.

¹⁴Bara bangsa bŭkŭn mbŭh dingah, ka ngara kimŭtŭr darŭm taru; daya Philistia mbŭh tikaran.

¹⁵Bara pinguru di Edom mbŭh tikaran; bara dari daya Moab adi bake mbŭh kimŭtŭr taru; daya Canaan mbŭh dŭh tia pagan.

¹⁶Taru mbŭh nyatŭk ngara. Ngara kiris pinyibake Mai, O TUHAN, ka ngara mijog dŭh bigaya buang taru ndŭg ka daya Mai mbŭh panu murah, daya adi Kaam mbŭh pirupas so jadi urun.

¹⁷Kaam taban ngara ngga mŭrŭt ka na ngara di darŭd Mai, tarun adi Kaam, TUHAN, mbŭh mien ndu yŭn pinyirŭŭ Mai, Ramin adi Kaam mbŭh pijog.

¹⁸Kaam, TUHAN, re adu adu jadi Raja.”

¹⁹Daya Israel panu mutas rawŭt di tunduh tana badŭh. Pak kan krita krita kuda ngga bara kuda ka bara adi pimanu krita kuda mŭrŭt rawŭt, TUHAN bada piin pari, ka-i ngapuh ngara.

²⁰Nabi Miriam, kaka dayung Aaron, tambit tamburin, ka sopŭrŭg dayung tunda ayŭh mambak tamburin ka bitanda.

²¹Miriam biragu yŭn ngara: “Biragu ka TUHAN, amai Ayŭh mbŭh manang darŭm bragah. Ayŭh mbŭh taran bara kuda ngga pinunggang-i ka darŭm rawŭt.”

²²Komŭnŭ Moses nguru daya Israel bu so Rawŭt Bireh mŭrŭt tarun tana-pajam Shur. Ngara panu taruh andu di tarun tana-pajam, ka mating dapŭd piin.

²³Komŭnŭ ngara mandŭg di tarun adi dŭn Marah, pak piin diginŭ mbŭh raru pa'it; dŭh ngara tungang nok-i. Anŭ sabab tarun anŭ dog kadŭn Marah.[13]

²⁴Daya bagŭ ngadu ka Moses, siken, “Ani re ata nok?”

²⁵Moses bandar bandar bidua ka TUHAN, ka TUHAN kiren di ayŭh ndi apŭg kayuh, adi Moses rasu taran ka darŭm piin, ka piin anŭ rasu bisa dog nok. Diginŭ TUHAN nggen ukum-adat bada ngara tunda, ka diginŭ gŭh Ayŭh suba ngara.

²⁶Ayŭh nang, “Kambŭi angān an tunda pinganang Ku ngga ndai anŭ adi Aku nang batur ka sita pesan Ku, Aku dŭh re ngukum angān ngga tadŭ mun andam anŭ adi Aku ko bada dog daya Egypt. Aku ati TUHAN adi pibua angān.”

²⁷Bu so nŭ, ngara mandŭg ka Elim. Diginŭ agi simŭng duwŭh rubang piin ngga ju puru tŭngŭn kurma; diginŭ ngara bibari sindŭk piin.