Read Biatah Bidayuh PINYIRUAH 17 Bible Online

PINYIRUAH 17 - Biatah Bidayuh bible

PINYIRUAH 17

¹ Sopŭrŭg daya Israel bu so tarun tana-pajam Sin, masang so tarun ndi di ka tarun andi nanyam dog pesan TUHAN. Ngara bibari di Rephidim, pak di tarun anŭ mating piin re ngara nok.

²Ngara mingungut di Moses buang nang, “Nggen di kieh piin nok.” Moses nam, “Mani angān mingungut? Mani angān suba TUHAN?”

³Pak ngara mbŭh ruai badŭh asŭng ka gibabŭ mingungut di Moses. Ngara nang, “Mani kaam taban kieh ruah so Egypt? An siŭ kieh ngga bara anak ami samŭn dāng kudip ami kah?”

⁴Moses bandar bandar bidua ka TUHAN ka nang, “Simuki gaya ku ngga bara daya ati? Ngara batang an manjan aku ngga batuh.”

⁵TUHAN nang di Moses, “Taban kada pinguru daya Israel ngga adŭp mu ka panu diŭ di jawin bara daya bagŭ. Taban sikud anŭ adi ko kuu ngga masut piin Yang Nile.

⁶Aku re mijog di tunduh ndi batuh di jawin mu di Darŭd Sinai. Mupu batuh anŭ, ka piin re rasu ruah so dieh yŭn bara daya nok.” Moses ndai simŭnŭ di sirung jawin bara pinguru daya Israel.

⁷Tarun anŭ dog kadŭn Massah ngga Meribah,[15] amai daya Israel mingungut buang suba TUHAN di andu ngara siken, “Agi kah TUHAN ngga ata?”

⁸Daya Amalek mandŭg ka nyerang daya Israel di Rephidim.

⁹Moses nang di Joshua, “Mien kada dari ngga di rawan daya Amalek sipagi. Aku re mijog di tibung sandah buang digen sikud adi Tapa bada aku taban.”

¹⁰Joshua ndai nimun Moses ko pesan ka matak di rawan daya Amalek, sitadŭn Moses, Aaron ngga Hur maad ka mijog di tibung sandah.

¹¹Atas Moses gibabŭ pakat tangan-i daya Israel manang birawan, pak kan ayŭh bisor tangan-i daya Amalek piguru manang birawan.

¹²Kan tangan Moses mbŭh kawŭk, Aaron ngga Hur tambit ndi batuh yŭn Moses guru buang mijog ngapid ayŭh pakat tangan-i. Ngara duwŭh nukang tangan Moses ndŭg ka batŭh andu simŭdŭp.

¹³Simŭnŭ inŭh Joshua ngarah daya Amalek.

¹⁴ Komŭnŭ TUHAN nang di Moses, “Nuris pasar pimanang ati darŭm surat isa-i bisa adu adu dog ingat. Kidaan di Joshua nang Aku re pirarap daya Amalek.”

¹⁵Moses pijog ndi mija-sambah ka kadŭn-i “TUHAN inŭh Binira ku.”

¹⁶Ayŭh nang, “Katuh bada bigatung binira TUHAN![16] TUHAN re babŭ pijuu rawan daya Amalek!”