Read Biatah Bidayuh PINYIRUAH 2 Bible Online

PINYIRUAH 2 - Biatah Bidayuh bible

PINYIRUAH 2

¹Di tipuh anŭ ndi naan dari so tibaran-asar Levi sawan sawŭn ndi naan dayung so tibaran-asar adŭp-i.

² Dayung anŭ biranak yŭn-i ndi anak dari. Kan dayung anŭ kiris sipira anŭ raru ramus, ayŭh sukan-i sitian taruh buran.

³Pak kan ayŭh mbŭh dŭh tungang re adu adu sukan-i, ayŭh tambit bakur adi dog nganyam so tŭngŭn tŭngŭn reed ka dog madad ngga tar da panet, isa piin dŭh tambus; ayŭh na sipira anŭ di darŭm-i ka pasan di randa uduh di tabing Yang Nile.

⁴Kaka dayung sipira anŭ agi mijog so jo, tukang nyibatŭh kayuh adi re jadi di ayŭh.

⁵Di tika anŭ, anak dayung raja Pharaoh di mūn mamuh ka Yang Nile, atan bara dayung adi daya gaji-i panu di tabing yang anŭ. Ayŭh gŭgŭh kiris ndi bakur di randa uduh. Ayŭh bagan ndi naan dayung urun-i da di tambit.

⁶Anak raja rasu kuka bakur anŭ ka kiris sipira dari. Sipira anŭ sien, ka ayŭh masi kiris buang nang, “Ati ndi so anak daya Hebrew,” ayŭh nang.

⁷Komŭnŭ kaka dayung sipira anŭ siken, “Bisa kah aku bagan ndi dayung daya Hebrew da mira sipira ati yŭn mai?”

⁸“Bisa,” ayŭh nam. Rasu kaka sipira anŭ di bagan sindŭ adŭp sipira anŭ.

⁹Anak raja kidaan di dayung anŭ, “Tambit sipira ati ka mira-i yŭn ku; aku re bayar kuu.” Rasu ayŭh tambit ka mira anak anŭ.

¹⁰ Andu bŭkŭn, kan sipira anŭ mbŭh mua baga, ayŭh taban-i ka yŭn anak dayung raja, adi ngakat ayŭh jadi anak adŭp-i. Anak raja anŭ nang, “Aku tambit ayŭh so piin, aku re kadŭn ayŭh Moses.”[2]

¹¹ Kan Moses mbŭh baga tuuh ayŭh panu muah tudu bangsa adŭp-i, daya Hebrew, ka kiris munki masam ngara dog takan da kraja jera. Ayŭh kiris gŭh daya Egypt siŭ ndi naan daya Hebrew, ndi naan so daya adŭp Moses.

¹²Moses kimat bait tauh-i, ka kan ayŭh kiris daya mating kiris adŭp-i, ayŭh siŭ daya Egypt anŭ ka sukan tadang-i di sumat.

¹³Andu anŭ ndi ayŭh ruah dinge ka kiris duwŭh naan daya Hebrew bikaii. Moses nyara sianŭ adi sarah, “Mani kuu kijera dingan mu adi samah daya Hebrew?”

¹⁴ Daya anŭ nam, “Asi bada kuu jadi pinguasa ka akim ami? Kuu re siŭ aku kah nimun kuu ko siŭ daya Egypt anŭ?” Moses mbŭh jadi taru ka minyu darŭm asŭng-i, “Daya mbŭh puan kayuh adi muko aku ndai.”

¹⁵ Kan raja dingah pasar kayuh adi mbŭh jadi ayŭh jiroh aran ngga re siŭ Moses. Pak Moses mbŭh bu ka rŭŭ di tarun tana Midian. Ndi andu darŭm Moses aŭn guru di bŭngŭn prigi, ju madis anak dayung Jethro adi imam di Midian, mandŭg di pēn piin ngga ngisi durang biri ka kambing sama-i.

¹⁷Pak kada pingingat-biri adi bŭkŭn pibu bara anak dayung Jethro. Komŭnŭ Moses di turung ngara ka nggen piin di dāng dāng ngara.

¹⁸Kan ngara maad ka yŭn sama ngara, ayŭh siken, “Mani angān awar maad andu ati?”

¹⁹“Ndi naan daya Egypt turung kieh so dog mito pingingat pingingat-biri adi bŭkŭn,” ngara nam, “ka ayŭh turung gŭh kieh nggen piin di dāng dāng ta.”

²⁰“Diki ayŭh?” ayŭh siken bara anak dayung-i. “Mani angān tingge ayŭh? Panu di bagan ayŭh da bisamah ngga ata.”

²¹Jadi Moses natu pikir kira-i an rŭŭ diginŭ, ka Jethro nggen anak dayung-i Zipporah da jadi sawŭn-i,

²²adi biranak yŭn-i ndi anak dari. Moses nang darŭm asŭng-i, “Aku daya pinami di tarun tana ati, kana aku kadŭn ayŭh Gershom.”[3]

²³Kudu kudu sawa ripas anŭ raja Egypt kabŭs, pak bara daya Israel gibabŭ sangsara dog piurun. Darŭm nyidaing ngara mite turung. Ka sidaing ngara maad ka Tapa,

²⁴ adi dingah ka ingat simanya-I ngga Abraham, Isaac, ka Jacob.

²⁵Tapa kiris munki masam bara daya Israel dog piurun ka mbŭh masi di ngara.[4]