Read Biatah Bidayuh PINYIRUAH 21 Bible Online

PINYIRUAH 21 - Biatah Bidayuh bible

PINYIRUAH 21

¹Nggen di daya Israel ukum ukum-adat ati:

² Kambŭi angān miris urun, ayŭh siŭn bituan di angān sitŭkŭd nŭm sawa. Ngga sawa adi ju ayŭh siŭn dog pirupas dŭh ngga bibayar.

³Kambŭi ayŭh bayuh sawan darŭm ayŭh jadi urun ngan, ayŭh dŭh siŭn taban sawŭn-i kan ayŭh bu; pak kambŭi ayŭh mbŭh sawan di andu ayŭh jadi urun ngan, ayŭh siŭn taban sawŭn-i.

⁴Kambŭi tuan-i nggen di ayŭh dayung jadi sawŭn-i ka dayung anŭ biranak anak dari puan kah anak dayung yŭn-i, dayung anŭ ngga bara anak-i anŭ dog dapu tuan-i, ka adŭp dari anŭ patut bu sadi adŭp-i.

⁵Pak kambŭi urun anŭ kidaan adŭp-i rindu tuan-i, sawŭn-i, ka bara anak-i ka dŭh raan dog pirupas so jadi urun,

⁶tuan-i siŭn taban ayŭh ka yŭn bisambah. Diginŭ ayŭh bada ayŭh mijog minyandis di tiban puan kah di uros tiban ka tabŭk kajit-i diginŭ. So nganŭ ayŭh jadi urun-i sitŭkŭd udip-i.

⁷“Kambŭi daya jua anak dayung-i da jadi urun, anak dayung anŭ dŭh siŭn dog pirupas, nimun urun dari.

⁸Kambŭi ayŭh dog jua ka daya adi raan sawŭn ayŭh, pak dŭh suka ayŭh, dayung anŭ patut dog jua pari ka sama-i; tuan-i dŭh siŭn jua ayŭh ka daya pinami, sabab ayŭh dŭh kana ngga ayŭh.

⁹Kambŭi daya miris dayung urun an-i nggen di anak dari-i, ayŭh siŭn bada dayung anŭ jadi keya ka anak adŭp-i.

¹⁰Kambŭi daya sawan dinge, ayŭh dŭh siŭn dŭh nggen di sawŭn numbor ndi-i kiang pinguman ngga piraka samŭn hak di tadŭ kayuh nimun adi mbŭh.

¹¹Kambŭi ayŭh dŭh ndai simŭnŭ di dayung anŭ, ayŭh dŭh siŭn dŭh ngga dŭh bibayar pirupas dayung anŭ.

¹² “Asi asi adi mukong ka siŭ daya dŭh siŭn dŭh dog ukum kabŭs.

¹³ Pak kambŭi ayŭh siŭ daya ngga dŭh singaja, ayŭh bisa bu di ka tarun adi Aku re mien yŭn mu, ka diginŭ ayŭh re siramat.

¹⁴Pak kan daya baji ka singaja-i siŭ daya, ayŭh dŭh siŭn dŭh dog ukum kabŭs, sunggu bait kani ayŭh di ka mija-sambah Ku yŭn pinyigrindung.

¹⁵“Asi asi adi mukong sama-i puan kah sindŭ-i dŭh siŭn dŭh dog ukum kabŭs.

¹⁶ “Asi asi adi nakap daya yŭn re jua puan kah re ndu urun, dŭh siŭn dŭh dog ukum kabŭs.

¹⁷ “Asi asi adi mangu sindŭ-i puan kah sama-i dŭh siŭn dŭh dog ukum kabŭs.

¹⁸“Kambŭi agi daya bikaii ka agi adi nuku dingan-i ngga batuh puan kah mukut ayŭh, pak dŭh siŭ ayŭh, daya anŭ dŭh dog ukum. Kambŭi sianŭ adi dog nuku biragan ka guring di ambok, pak ripas anŭ tungang makat ka panu pakai sikud, daya adi ko nuku ayŭh dŭh siŭn dŭh bayar gati rugi ka kingat jaga ayŭh ndŭg ka ayŭh mbŭh bua.

²⁰“Kambŭi daya adi dapu urun mukong urun-i ngga kayuh, bait-i dari puan kah dayung, ka urun anŭ nyan yŭn-i kabŭs, daya adi dapu urun anŭ patut dog ukum.

²¹Pak kambŭi urun anŭ dŭh kabŭs ndi puan kah duwŭh andu ripas anŭ, tuan anŭ dŭh dog ukum. Urun anŭ keya ka rata di ayŭh, ka jadi ukum di ayŭh kambŭi-i kabŭs.

²²“Kambŭi agi daya bikaii ka bada ndi naan dayung adi bite kinaman ndŭg ka bubu, pak dŭh rabis so anŭ, sianŭ adi bada ayŭh kinaman patut dog ukum sikiang nanyam pimite banŭh dayung anŭ, buang nanyam ka adi dog nyibandar bara akim.

²³Pak kambŭi dayung anŭ biragan, ukum-i inŭh asŭng gati asŭng,

²⁴ batŭh gati batŭh, jipŭh gati jipŭh, tangan gati tangan, kaja gati kaja,

²⁵raus gati raus, tawan gati tawan, pŭmŭs gati pŭmŭs.

²⁶“Kambŭi agi daya mukong dari urun puan kah dayung urun-i di batŭh ndŭg ka karak, ayŭh patut pirupas urun-i anŭ ngga bayar batŭh-i.

²⁷Kambŭi ayŭh bada jipŭh-i pata, ayŭh patut pirupas urun-i anŭ ngga bayar jipŭh-i.

²⁸“Kambŭi dari sapi nanduk daya da kabŭs, sapi anŭ patut dog manjan ngga batuh, ka dagin-i dŭh siŭn dog man; pak daya adi dapu sapi anŭ dŭh dog ukum.

²⁹Pak kambŭi dari sapi anŭ mbŭh kanyet nyerang daya, ka daya adi dapu-i mbŭh dog bakan pak dŭh kurung-i, ka tipia sapi anŭ nanduk daya da kabŭs, sapi anŭ patut dog manjan ngga batuh, ka daya adi dapu-i dŭh siŭn dŭh dog ukum kabŭs gŭh.

³⁰Pak, kambŭi daya adi dapu-i dog nyibandar bada bayar ngga nyiramat asŭng adŭp-i, ayŭh dŭh siŭn dŭh bayar ngga puno ukum-i nanyam dog miratak.

³¹Kambŭi dari sapi siŭ anak daya, dari bait dayung, simŭnŭ gŭh dog ngatur.

³²Kambŭi dari sapi siŭ dari urun puan kah dayung urun, daya adi dapu sapi anŭ patut bayar daya adi dapu urun anŭ taruh puru kiping pirak, ka sapi anŭ an dog manjan ngga batuh ndŭg kabŭs.

³³“Kambŭi daya kadi tŭtŭp rubang puan kah kareh rubang ka dŭh nutu-i, ka ndi dari sapi puan kah kaldi rabu ka darŭm-i,

³⁴ayŭh dŭh siŭn dŭh bayar di daya adi dapu dāng anŭ ka bisa tambit dāng adi kabŭs anŭ.

³⁵Kambŭi dari sapi daya siŭ dari sapi daya bŭkŭn, ngara duwŭh patut jua anŭ adi udip ka kutung rega-i; ngara patut gŭh kutung dagin dāng anŭ adi mbŭh kabŭs.

³⁶Pak kambŭi mbŭh dog puan nang dari sapi anŭ taŭn mbŭh kanyet nyerang dari sapi adi bŭkŭn ka sianŭ adi dapu-i dŭh kurung-i, ayŭh dŭh siŭn dŭh an gati ngga dari sapi adi udip, pak ayŭh bisa tambit anŭ adi mbŭh kabŭs.