Read Biatah Bidayuh PINYIRUAH 22 Bible Online

PINYIRUAH 22 - Biatah Bidayuh bible

PINYIRUAH 22

¹“Kambŭi daya naku sapi puan kah biri ka siŭ puan kah jua-i, ayŭh dŭh siŭn dŭh gati ngga rimŭh pŭrŭng sapi yŭn ndi sapi ka pat pŭrŭng biri yŭn ndi biri.

²Ayŭh dŭh siŭn dŭh gati kayuh adi-i ko naku. Kambŭi ayŭh dŭh biyŭn ani ani, ayŭh dŭh siŭn dŭh dog jua jadi urun ngga gati kayuh adi-i ko naku. Kambŭi dāng adi dog naku, bait-i sapi, kaldi, puan kah biri, dog dapŭd babŭ udip darŭm tangan-i, ayŭh gati ngga duwŭh pŭrŭng yŭn ndi pŭrŭng. “Kambŭi ndi naan pinaku dog nakap darŭm-i mŭrŭt ramin singarŭm ka dog siŭ, sianŭ adi siŭ ayŭh dŭh sarah. Pak kambŭi kayuh ati jadi ngga jawa sandu, ayŭh sarah.

⁵“Kambŭi daya bada dāng dāng-i man uduh di teya adŭp-i puan kah di teya anggor, ka ngara mirarat ka man pimuruh[19] di teya daya bŭkŭn, ayŭh dŭh siŭn dŭh an pakai pimuruh so teya adŭp-i puan kah teya anggor ngga gati rugi.

⁶“Kambŭi daya ndai apui di tana adŭp-i ka-i minyawit tunda uduh di ka teya daya, ka man tŭngŭn tŭngŭn gandom adi aŭn timbu puan kah adi muko dog kapŭg ka dog nguruk, sianŭ adi ndai apui anŭ dŭh siŭn dŭh bayar gati rugi.

⁷“Kambŭi ndi naan daya situju an nyikŭn duit daya bŭkŭn puan kah tadŭ tadŭ kayuh brega ka-i dog naku so ramin-i, pinaku anŭ, kambŭi dog dapŭd, patut bayar duwŭh rupet.

⁸Pak kambŭi pinaku anŭ dŭh tungang dog dapŭd, sianŭ adi nyikŭn kayuh kayuh anŭ adi brega patut dog taban ka yŭn bisambah ka diginŭ ayŭh dŭh siŭn dŭh bipayu adŭp-i mating naku kayuh adi-i nyikŭn anŭ.

⁹“Di kaii jeja ka buat-rata, bait-i sapi, kaldi, biri, piraka, puan kah tadŭ tadŭ kayuh adi manyap, duwŭh naan ngara anŭ adi samah nang adŭp-i dapu patut dog taban ka yŭn bisambah. Sianŭ adi Tapa nang sarah patut bayar duwŭh rupet di sianŭ adi dŭh sarah.

¹⁰“Kambŭi daya situju an nyikŭn kaldi, sapi, biri, puan kah tadŭ tadŭ dāng yŭn daya, ka dāng anŭ kabŭs puan kah biragan puan kah dog sirapas pinganyu, ka kambŭi saksi mating,

¹¹daya anŭ dŭh siŭn dŭh di ka tarun yŭn bisambah ka bipayu adŭp-i mating naku dāng daya anŭ. Kambŭi dāng anŭ dŭh dog naku, daya adi dapu dāng anŭ patut trima adŭ pinyirugi-i, ka sianŭ adi nyikŭn dāng anŭ dŭhsah bayar gati rugi;

¹²pak kambŭi dāng anŭ sawŭ dog naku, daya anŭ dŭh siŭn dŭh an bayar gati rugi di daya adi dapu dāng anŭ.

¹³Kambŭi dāng anŭ dog siŭ dāng tarun, sianŭ adi tukang nyikŭn-i an taban isin puan kah turang-i ndu saksi; ayŭh dŭhsah bayar gati rugi yŭn kayuh adi dog siŭ dāng tarun.

¹⁴“Kambŭi daya nginjam dāng daya bŭkŭn ka dāng anŭ biragan puan kah kabŭs di tika daya adi dapu mating kiris, ayŭh dŭh siŭn dŭh an bayar gati rugi.

¹⁵Pak kambŭi kayuh anŭ jadi di tika daya adi dapu-i agi, ayŭh dŭhsah bayar. Kambŭi-i dāng adi dog nyewa, rugi anŭ mbŭh dog bayar ngga rega sewa.

¹⁶ “Kambŭi dari piripong dayung tibŭn adi gibayuh bitunang, dari anŭ dŭh siŭn dŭh an bayar ayŭh ngga duit sawan ka sawŭn ayŭh.

¹⁷Pak kambŭi sama dayung anŭ dŭh an bada ayŭh sawŭn anak-i, ayŭh dŭh siŭn dŭh bayar gati rugi di sama-i sikiang duit rega anak dayung tibŭn adi re banan.

¹⁸ “Nggen ukum kabŭs di tadŭ dayung adi ndai biruri karŭm.

¹⁹ “Nggen ukum kabŭs di dari adi birambang ngga dāng.

²⁰ “Nggen ukum kabŭs di daya adi jugan sadis di tadŭ tadŭ tapa adi bŭkŭn, ripas so Aku adi TUHAN.

²¹ “Dŭhnyah ida ida puan kah kinanyuh daya pinami; ingat adŭp ngan ko daya pinami gŭh di Egypt.

²²Dŭhnyah ida ida ngga dayung uban puan kah anak tumang.

²³Kambŭi angān ida ida ngga ngara, Aku, adi TUHAN, re nam ngara kan ngara bagan mite turung so Aku,

²⁴ka Aku re baji ka siŭ angān darŭm perang. Sawŭn ngan re uban, ka anak ngan re tumang.

²⁵ “Kambŭi angān nginjam duit di tadŭ tadŭ daya Ku adi sirata, dŭhnyah bada adŭp ngan mun daya adi tukang nginjam duit di daya yŭn an dapŭd anak duit.

²⁶ Kambŭi angān tambit jipo daya ndu tandā janji ayŭh re bayar angān, angān dŭh siŭn dŭh nggen-i pari ka ayŭh sibayuh batŭh andu simŭdŭp,

²⁷sabab kaŭs-i anŭ adŭ kayuh adi pakai-i ngga nyiparas adŭp-i. Ani dinge re-i pakai ngga bŭŭs? Kan ayŭh bagan mite turung so Aku, Aku re nam ayŭh sabab Aku ati raru masi.

²⁸ “Dŭhnyah nang pinganang arap rawan Tapa, ka dŭhnyah mangu tadŭ tadŭ pinguru ngan.

²⁹“Nggen di Aku pinganggen so gandom ngan, wain, ka inyo kanā ngan di tika adi mbŭh dog natu. “Nggen di Aku anak pinuai dari ngan.

³⁰Nggen di Aku anak bungas sapi ka anak bungas biri ngan. Bada sibungas anak dari-i rŭŭ ngga sindŭ-i sitŭkŭd ju andu, ka di andu adi mai jugan-i ka Aku.

³¹ “Angān inŭh daya Ku, jadi angān dŭh siŭn man dagin tadŭ tadŭ dāng adi dog siŭ dāng tarun; nggen dagin anŭ di kasong.