Read Biatah Bidayuh PINYIRUAH 23 Bible Online

PINYIRUAH 23 - Biatah Bidayuh bible

PINYIRUAH 23

¹ Dŭhnyah pigarau agah adi dŭh sawŭ, ka dŭhnyah gŭh nggen taksi kadong amai ramŭn an turung daya adi sarah.

²Dŭhnyah tunda parad daya bagŭ di pingandai adi sarah, puan kah kan ngara nggen taksi adi rawan pinyitŭnggŭn.

³ Dŭhnyah marad ka daya sirata sabab ayŭh daya sirata darŭm ayŭh dog bisara.

⁴ “Kambŭi tipia angān kiris sapi puan kah kaldi pinganyu ngan ruah, tambit ka tŭd dāng anŭ ka yŭn-i.

⁵Kambŭi kaldi-i rabu dog maret barang, turung ayŭh bada kaldi anŭ makat; dŭhnyah radus panu adŭ.

⁶ Kambŭi daya sirata dog bisara di yŭn daya bisara, dŭhnyah matŭn pinyitŭnggŭn so ayŭh.

⁷Dŭhnyah nyarah daya kambŭi ayŭh dŭh sawŭ sarah, ka dŭhnyah gŭh nggen ukum kabŭs di tunduh daya adi dŭh sarah, amai Aku re ngukum tadŭ daya adi ndai pingandai arap adi mun anŭ.

⁸Dŭhnyah trima suap, amai suap nutu batŭh daya so kayuh adi batur ka pirusak daya adi dŭh biyŭn sarah.

⁹ Dŭhnyah ida ida ngga daya pinami; angān mbŭh puan nyamki jadi daya pinami, amai adŭp ngan ko jadi daya pinami di Egypt.

¹⁰ “Sitŭkŭd nŭm sawa birŭmŭh biteya di tana ngan, ka ngatŭm buwa adi-i piruah.

¹¹Pak di sawa adi ju, dŭhnyah birŭmŭh di tana anŭ; dŭhnyah ndu tadŭ tadŭ kayuh adi timbu dieh. Daya sirata siŭn man tadŭ tadŭ kayuh adi timbu dieh, ka dāng dāng tarun siŭn gŭh tambit tadŭh-i. Ndai simŭnŭ gŭh ngga teya anggor ngan ka tŭngŭn kanā ngan.

¹² “Nyiraja nŭm andu darŭm ndi minggu, pak dŭhnyah nyiraja di andu adi ju, isa urun ngan ngga daya pinami adi nyiraja yŭn ngan samŭn dāng ngan bisa rŭŭ di andu anŭ.

¹³“Tunda meh sopŭrŭg kayuh adi Aku adi TUHAN ngan mbŭh nang di angān. Dŭhnyah bidua ka tapa bŭkŭn; nyabŭt dŭn ngara dŭhnyah gŭh.

¹⁴“Bigawai pitaruh saba darŭm ndi sawa ngga kibās Aku.

¹⁵ Darŭm buran Abib, anŭ inŭh buran adi ngga angān ruah so Egypt, sita Gawai Ruti dŭh-Biragi nanyam adi Aku muko pesan di angān. Dŭhnyah man ruti adi dog ndai ngga ragi sitadŭn ju andu adi ngga gawai anŭ dog sita. Dŭhnyah dŭh taban sadis kan angān mandŭg di nyambah Aku.

¹⁶ “Sita Gawai Pingatŭm kan angān piguru ngatŭm buwa pimuruh ngan. “Sita Gawai Bari-Dawŭn di tipuh jaya, kan angān sun buwa so teya anggor ngga risŭn kanā ngan.

¹⁷Barang sawa di tipuh taruh gawai anŭ, sopŭrŭg ngan adi dari dŭh siŭn dŭh mandŭg di nyambah Aku, adi TUHAN Tapa ngan.

¹⁸Dŭhnyah jugan ruti adi biragi kan angān nyadis dāng ka Aku. Ramak dāng dāng adi mbŭh dog nyadis yŭn Ku darŭm so-taruh gawai ati, dŭh siŭn dog nyikŭn ndŭg isan isan andu jawa ndi.

¹⁹ “Barang sawa taban ka darŭm ramin TUHAN adi Tapa ngan buwa bungas adi siabo kana adi angān ngatŭm. “Dŭhnyah tanŭk anak biri puan kah anak kambing darŭm sisuh sindŭ-i.

²⁰“Aku re pait ndi naan malaikat bada panu diŭ so angān da grindung angān di aran, ka nguru angān ka tarun anŭ adi Aku mbŭh sidia.

²¹Dingah ayŭh ka tunda pinganang-i. Dŭhnyah rawan ayŭh, amai Aku mbŭh pait ayŭh, ka ayŭh dŭh re apun daya adi birawan.

²²Pak Kambŭi angān tunda pinganang-i ka ndai sopŭrŭg kayuh adi Aku pesan, Aku re rawan sopŭrŭg pinganyu ngan.

²³Malaikat Ku re diŭ panu so angān ka re taban angān mŭrŭt tarun tana daya Amor, daya Hitti, daya Periz, daya Canaan, daya Hivi, ngga daya Jebus, ka Aku re pirabur ngara.

²⁴Dŭhnyah mutu ubak ngan ka tapa tapa ngara puan kah nyambah-i, ka dŭhnyah gŭh tunda adat pinyabah ngara. Pirabur sopŭrŭg tapa ngara, ka mata sopŭrŭg uros-batuh pirapu' ngara.

²⁵Kambŭi angān nyambah Aku adi TUHAN ngga Tapa ngan, Aku re nyiberkat angān ngga pinguman ngga piin ka kadi sopŭrŭg andam udar ngan.

²⁶Di tarun tana ngan mating dayung re bubu puan kah aboh. Aku re nggen umbur adi ambu di angān.

²⁷“Aku re bada daya daya adi rawan angān taru di Aku; Aku re bada riruk daya adi angān rawan, ka Aku re bada sopŭrŭg pinganyu ngan bu taru angān.

²⁸Aku re bada pinganyu ngan kandang-kandŭ taru.[20] Aku re pibu daya Hivi, daya Canaan, ka daya Hitti darŭm angān masang panu.

²⁹Aku dŭh re pibu ngara darŭm tipuh ndi sawa, amai kambŭi Aku ndai simŭnŭ tarun tana anŭ re engan, ka dāng dāng tarun re jadi paŭh bagŭ ka nyusah angān.

³⁰Pak Aku re mupok pibu ngara ndŭg ka angān mbŭh bitambah bagŭ, sadang kiang ngga dapu tarun tana anŭ.

³¹Aku re nambah buka baat tana ngan da bayah so Tanjung Aqaba ndŭg rawŭt Mediterranean, ka so tarun tana-pajam ndŭg Yang Euphrates. Aku re bada angān bikuasa di tunduh bara daya adi rŭŭ di tarun tana anŭ, ka angān re pibu ngara darŭm angān masang.

³²Dŭhnyah ndai tadŭ mun pekat-janji ngga ngara puan kah ngga tapa tapa ngara.

³³Dŭhnyah bada ngara anŭ rŭŭ di rais ngan, amai kambŭi ngara rŭŭ bigaur ngga angān, ngara bisa bada angān bidosa rawan Aku. Kambŭi angān nyambah tapa ngara, anŭ re jadi jarat adi bisa kudog adŭp angān.”