Read Biatah Bidayuh PINYIRUAH 24 Bible Online

PINYIRUAH 24 - Biatah Bidayuh bible

PINYIRUAH 24

¹TUHAN nang di Moses, “Maad ka darŭd tudu Aku, kuu ngga Aaron, Nadab, Abihu, ngga ju puru naan pinguru daya Israel; ka mutu nyambah Aku, kan angān gi-mua juan ngan so Aku.

²Kuu sadi adŭ adi siŭn mandŭg nyindŭk Aku. Ngara adi bŭkŭn dŭh siŭn. Bara daya bagŭ dŭh sikari kari siŭn maad darŭd ati.”

³Moses di ka nyuse sopŭrŭg pesan ngga sopŭrŭg atur-adat TUHAN di sopŭrŭg daya, ka sopŭrŭg daya samah nam, “Kieh re ndai sopŭrŭg kayuh adi TUHAN mbŭh kidaan.”

⁴Moses nuris sopŭrŭg pesan TUHAN. Isan isan andu jawa ndi Moses ndai ndi mija-sambah di sigŭn darŭd ka pijog simŭng duwŭh batuh baga; batuh batuh anŭ sirati-i simŭng duwŭh tibaran-asar Israel.

⁵Komŭnŭ ayŭh pait bara dari adi mara bada badang sadis ka TUHAN, ka nyadis kudu kudu sapi ndu sadis bidingan.

⁶Moses tambit sitangah utung so deya dāng anŭ ka na-i darŭm kudu kudu makuk; ka tadŭh anŭ ayŭh ngga naui mija-sambah anŭ.

⁷Komŭnŭ ayŭh tambit surat simanya, di yŭn sopŭrŭg pesan TUHAN mbŭh dog nuris, ka basa-i ngga sirŭŭn bana di bara daya. Ka bara daya nang, “Kieh an tunda pinganang TUHAN ka ndai sopŭrŭg kayuh adi Ayŭh mbŭh pesan.”

⁸ Komŭnŭ Moses tambit deya adi darŭm makuk makuk anŭ ka masik-i di daya bagŭ. Ayŭh nang, “Ati inŭh deya adi natu simanya adi TUHAN mbŭh ndai ngga angān kan Ayŭh nggen sopŭrŭg pesan ati.”

⁹Moses, Aaron, Nadab, Abihu, ngga ju puru naan pinguru daya Israel maad darŭd,

¹⁰ka ngara kiris Tapa daya Israel. Di yŭn-I mijog agi kayuh mun aran batuh nilam, adi biru mun rangit.

¹¹Tapa dŭh bada bara pinguru Israel anŭ kinaman. Ngara kiris Tapa, ka komŭnŭ samah man nok.

¹²TUHAN nang di Moses, “Mandŭg tudu Aku di darŭd, ka sitadŭn kuu digiti, Aku re nggen di kuu duwŭh kiping batuh adi yŭn Aku muko nuris sopŭrŭg ukum-adat ngga ngajar bara daya.”

¹³Moses ngga pinurung-i Joshua sidia adŭp-i, ka Moses piguru[21] maad darŭd kudus anŭ.

¹⁴Moses nang di bara pinguru, “Kajŭn digiti ndŭg ka kieh pari. Aaron ngga Hur agi digiti ngga angān. Kambŭi agi daya biyŭn kaii ngga dingan-i, ngara siŭn turung di ngatur.”

¹⁵Moses maad Darŭd Sinai, ka abun nutu darŭd anŭ.

¹⁶Jawa bragah TUHAN mūn ka darŭd anŭ. Di piningga daya Israel, jawa anŭ mun jireb apui adi sakŭt di tibung darŭd anŭ. Abun anŭ nutu darŭd nŭm andu. Ka di andu adi ju TUHAN bagan Moses so abun.

¹⁸ Moses maad ka sambu darŭd ka mŭrŭt abun anŭ, ka rŭŭ diginŭ pat puru andu pat puru ngarŭm.