Read Biatah Bidayuh PINYIRUAH 25 Bible Online

PINYIRUAH 25 - Biatah Bidayuh bible

PINYIRUAH 25

¹TUHAN nang di Moses,

²“Kidaan di daya Israel da jugan pinganggen ka Aku. Kambat tadŭ mun pinganggen adi daya raan nggen.

³Pinganggen anŭ inŭh mas, pirak, ka timaga;

⁴banang linen; buruh biri adi biru, adi bēng, ka adi bireh; banang adi dog ndai so buruh kambing;

⁵kurit dari biri adi dog nyamŭk bireh; birurang adi duduh; kayuh acacia;

⁶inyo yŭn prita; rapah rapah adi ngga gaur inyo kudus ka yŭn kimanyan adi buuh ramak;

⁷batuh akek bireh ka batuh batuh brega adi bŭkŭn adi re dog pirakat di efod[22] Imam Bās ka di tutu sudo-i.

⁸Daya bagŭ dŭh siŭn dŭh ndai Bari yŭn Ku, isa Aku bisa rŭŭ bigaur ngga ngara.

⁹Ndai Bari anŭ ka sopŭrŭg pingakas-i nanyam suto adi Aku re kiren di kuu.

¹⁰“Ndai ndi pati so kayuh acacia, adi 110 sentimita ambu-i, 66 sentimita buka-i, ka 66 sentimita bigatung-i.

¹¹Marut darŭm ka sapa-i ngga tigŭrŭ mas ka ndai jiri-i so mas maning-i.

¹²Ndai pat sigarong pinawid so mas ka pirakat-i di so-pat kaja-i, samŭn duwŭh sigarong di so-duwŭh parad-i.

¹³Ndai pinawid pinawid so kayuh acacia ka marut-i ngga mas

¹⁴ka kasŭk pinawid pinawid anŭ di rubang sigarong sigarong anŭ di so-duwŭh parad pati anŭ.

¹⁵Pinawid anŭ an dog tandah di rubang sigarong ka dŭh siŭn dog kadi.

¹⁶Komŭnŭ misŭn di darŭm pati anŭ duwŭh kiping batuh adi Aku re nggen di kuu, adi yŭn Pinyipesan agi dog nuris.

¹⁷ “Ndai ndi sakŭb yŭn pati anŭ so tigŭrŭ mas, adi 110 sentimita anjong-i ka 66 sentimita buka-i.

¹⁸Ndai duwŭh cherubim[23] so mas adi dog maba,

¹⁹ndi yŭn barang parad tŭbŭn sakŭb pati anŭ. Ndai so-duwŭh cherubim anŭ bada sinyadi ngga adŭp sakŭb.

²⁰Ngatur cherubim cherubim anŭ da situra jawin ngga dingan-i di tunduh sakŭb, ka urad ngara adi tiburai an nutu sakŭb pati anŭ.

²¹Misŭn so-duwŭh kiping batuh anŭ di darŭm Pati ka nutu-i ngga sakŭb anŭ.

²²Aku re bidapŭd ngga kuu diginŭ, ka so sambu sakŭb di asah duwŭh cherubim anŭ Aku re nggen di kuu ukum ukum-adat Ku yŭn daya Israel.

²³“Ndai ndi mija so kayuh acacia, adi 88 sentimita anjong-i, 44 sentimita buka-i, ka 66 sentimita bigatung-i.

²⁴Marut mija anŭ ngga tigŭrŭ mas ka ndai jiri mas maning-i.

²⁵Ndai triding mija anŭ da 7.5 sentimita tabar-i ka ndai jiri-i so mas da maning triding-i.

²⁶Ndai pat sigarong so mas yŭn mija anŭ: ka pirakat-i di so-pat sikuh di yŭn kaja-i.

²⁷Sigarong adi yŭn kasŭk pinawid adi re ngga tawid mija anŭ an dog pirakat sindŭk triding-i.

²⁸Ndai pinawid so kayuh acacia ka marut-i ngga mas.

²⁹Ndai pinggen, saker, gabuk, ka makuk adi re dog pakai yŭn sadis wain. Sopŭrŭg pimakai anŭ an dog ndai so tigŭrŭ mas.

³⁰ Mija anŭ an dog na di tura ka jawin Pati Simanya, ka di tunduh-i an ari agi ruti kudus adi dog jugan ka Aku.

³¹“Ndai ndi rika prita so tigŭrŭ mas. Ndai bangan-i ka betang-i ngga mas adi dog maba; butik bunga pingabuh-i samŭn pusu pusu ngga rarak bunga, an da sinyadi ngga adŭp rika.

³²Nŭm daan-i siŭn dog nganjak di tigang-i, taruh di bait, taruh di tauh.

³³Barang daan anŭ inŭh an biyŭn taruh butik bunga dog ndai mun gaya rarak almond ka agi pusu ngga rarak-i.

³⁴Rawas rika prita anŭ an biyŭn pat butik bunga dog ndai mun rarak almond ngga pusu ka rarak-i.

³⁵Diginŭ an agi ndi pusu di ribo so-taruh anjak daan-i.

³⁶Sinadan pusu, daan rawas, ka rika prita an dog ndai so mas adi dog maba da sinyadi ngga abuh-i.

³⁷Ndai ju prita yŭn rika prita anŭ ka pijog isa-i nyekar tura ka jawin.

³⁸Ndai dudu satip ka par par-i so tigŭrŭ mas.

³⁹Pakai 35 kilogram tigŭrŭ mas ngga ndai rika prita anŭ samŭn sopŭrŭg pingakas-i.

⁴⁰ Nakit ndai sopŭrŭg-i nanyam suto anŭ adi Aku muko kiren di kuu di darŭd.