Read Biatah Bidayuh PINYIRUAH 27 Bible Online

PINYIRUAH 27 - Biatah Bidayuh bible

PINYIRUAH 27

¹“Ndai ndi mija-sambah so kayuh acacia. Bada-i misagi, 2.2 mita ambu ka 2.2 mita buka-i, ka 1.3 mita bigatung.

²Ndai junggir di tunduh so-pat sikuh-i. Junggir anŭ an sinyadi ngga mija-sambah anŭ ka dog marut ngga timaga.

³Ndai priok yŭn na apŭk adi pirinyo, ndai sanduk, makuk, sikait, ka tipaku apui. Sopŭrŭg pingakas ati an dog ndai so timaga.

⁴Ndai ndi radai timaga ka na pat sigarong pinawid timaga di sikuh sikuh-i.

⁵Na radai timaga anŭ di sagān triding mija-sambah, di sitangah ajog mija-sambah anŭ.

⁶Ndai pinawid so kayuh acacia ka marut-i ngga timaga,

⁷ka kasŭk-i di sigarong adi di sikuh mija-sambah kan-i dog tawid.

⁸Ndai mija-sambah anŭ so papan ka bada-i bigagong, nanyam suto adi mbŭh Aku kiren di kuu di darŭd.

⁹“Yŭn Bari-Ku, ndai buwang ngga tabir banang linen adi duduh. Buwang di tura ka siratan an 44 mita ambu-i,

¹⁰dog pijog ngga duwŭh puru tiang timaga di duwŭh puru bangan adi dog ndai so timaga, ngga sikait ka anak parang adi dog ndai so pirak.

¹¹Ndai simŭnŭ gŭh ngga buwang tabir di tura ka utara.

¹²Di parad tura ka barat banang tabir anŭ an 22 mita ambu-i, ngga simŭng tiang ka simŭng bangan.

¹³Parad tura ka timor adi so nŭŭh mŭrŭt ruah, buka buwang anŭ an 22 mita gŭh.

¹⁴Di barang parad tiban anŭ, banang tabir an 6.6 mita, pakai taruh tiang ngga taruh bangan.

¹⁶Jadi ndu tiban-i, tabir anŭ an 9 mita ambu-i, dog ndai so banang linen adi duduh ka adi dog nanun ngga buruh biri adi biru, bēng, ka adi bireh, ka dog ngabuh ngga butik bunga jiit. Anŭ an dog pijog ngga pat tiang di pat bangan.

¹⁷Sopŭrŭg tiang adi maning buwang anŭ an dog tubu ngga anak parang pirak, ka dudu sikait anŭ an dog ndai so pirak, ka bangan-i dog ndai so timaga.

¹⁸Jadi buwang anŭ an 44 mita ambu-i, 22 mita buka-i, ka 2.2 mita bigatung. Banang tabir anŭ an dog ndai so banang linen adi duduh, ka bangan-i an dog ndai so timaga.

¹⁹Sopŭrŭg pingakas adi dog pakai darŭm Bari TUHAN ka pagu pagu yŭn Bari TUHAN ka yŭn buwang an dog ndai so timaga.

²⁰“Bada daya Israel taban ka kuu inyo kanā adi siabo kana yŭn prita anŭ, isa-i bisa dog tung barang singumi andu.

²¹Aaron ngga anak anak dari-i an pijog prita anŭ di darŭm Bari-Ku, tura ka sapa tabir adi di jawin Pati Simanya. Diginŭ di yŭn Ku, prita anŭ an sakŭt so singumi andu ndŭg isan isan. Pesan ati an adu adu dog sita daya Israel ngga bara sesang ngara.