Read Biatah Bidayuh PINYIRUAH 28 Bible Online

PINYIRUAH 28 - Biatah Bidayuh bible

PINYIRUAH 28

¹“Bagan kaka mu Aaron ngga bara anak-i, Nadab, Abihu, Eleazar, ka Ithamar. Nyidŭrŭ ngara so bara daya Israel, isa ngara bisa jadi imam yŭn Ku.

²Ndai piraka imam yŭn jurud mu Aaron, ngga ngabuh ayŭh da tatŭng dog stabi.

³Bagan sopŭrŭg daya adi Aku ko nggen pimandai ngga ndai kraja, ka bada ngara ndai piraka Aaron, siŭn ayŭh dog garar jadi imam yŭn Ku.

⁴Kidaan di ngara da ndai tutu-sudo, efod, jipo-ambu, jipo adi biyŭn butik bunga jiit, bubok, ka bŭŭng kupong. Ngara an ndai piraka piraka imam anŭ yŭn jurud mu Aaron ngga bara anak dari-i, isa ngara bisa jadi imam yŭn Ku.

⁵Ngara adi ndai sopŭrŭg kayuh anŭ an pakai banang buruh biri adi biru, bēng, ka bireh, tiburi mas, ka banang linen adi duduh.

⁶“Ngara an ndai efod anŭ so banang buruh biri adi biru, bēng, ka bireh, tiburi mas, ka banang linen adi duduh, adi dog ngabuh ngga butik bunga jiit.

⁷Duwŭh song kawin yŭn efod anŭ an dog pirakat di so-duwŭh parad tura ka tigang.

⁸Abŭt kupong adi nakit dog nanun so kayuh adi samah mun anŭ an dog pirakat da sinyadi ngga efod anŭ.

⁹Tambit duwŭh sirah batuh akek bireh ka mŭŭt dieh dŭn bara anak Jacob adi simŭng-duwŭh naan,

¹⁰nanyam susud ngara bijurud. Nŭm di batuh ndi, ka nŭm di batuh anŭ ndi.

¹¹Bada ndi naan tukang batuh-brega da mŭŭt di duwŭh batuh anŭ dŭn bara anak Jacob, ka pirakat batuh batuh anŭ di sinangan mas.

¹²Na batuh batuh anŭ di song kawin efod ngga kiren simŭng duwŭh tibaran-asar daya Israel. Simŭnŭ Aaron re taban dŭn dŭn ngara di kawin-i, isa Aku, adi TUHAN re adu adu ingat ngara adi daya Ku.

¹³Ndai duwŭh sinangan mas,

¹⁴ka duwŭh parik adi dog ndai so tigŭrŭ mas, ka dog nyarat da mun taris, ka pirakat-i di sinangan mas anŭ.

¹⁵“Ndai ndi tutu-sudo yŭn Imam Bās, pakai-i ngga jiroh pinyiraan Tapa. Anŭ an dog ndai so kayuh kayuh anŭ adi dog pakai ngga ndai efod ka adi samah butik bunga jiit-i.

¹⁶Tutu-sudo anŭ an misagi kan dog ngupet nyinuwŭh, an 22 sentimita ambu, ka 22 sentimita ramba-i.

¹⁷Ndai pat baris batuh batuh brega di tunduh-i; di baris adi numbor ndi na ndi batuh delima, ndi batuh topaz, ka ndi batuh garnet;

¹⁸Di baris adi numbor duwŭh, na ndi batuh zamrud, ndi batuh nilam, ka ndi batuh itan;

¹⁹Di baris numbor taruh, na ndi batuh firus, ndi batuh akek ka ndi batuh kecubung.

²⁰Ka di baris numbor pat na ndi batuh beril, ndi batuh akek bireh ka ndi batuh jasper. Sopŭrŭg anŭ an dog pirakat di sinangan mas.

²¹Di barang sirah batuh adi simŭng duwŭh anŭ an dog mŭŭt dŭn barang ndi naan so bara anak Jacob, ngga ngarun tibaran-asar daya Israel.

²²Yŭn tutu-sudo, ndai parik so tigŭrŭ mas ka bada-i bikaring mun taris.

²³Ndai duwŭh sigarong mas ka pirakat-i di so-duwŭh sikuh tura ka sambu tutu-sudo anŭ,

²⁴ka mŭŭng so-duwŭh parik mas anŭ di duwŭh sigarong anŭ.

²⁵Mŭŭng so-duwŭh tŭbŭn parik anŭ di duwŭh sinangan mas anŭ, komŭnŭ pirakat-i di tura ka jawin di song kawin efod anŭ.

²⁶Komŭnŭ, ndai duwŭh sigarong mas ka pirakat-i di sikuh sigŭn tutu-sudo parad ka darŭm ngapid efod anŭ.

²⁷Ndai dinge duwŭh sigarong mas, ka pirakat-i di sigŭn song efod tura ka jawin sindŭk tigurang-i, ka di sambu abŭt kupong adi nakit dog nanun.

²⁸Mŭŭng sigarong tutu-sudo di sigarong efod ngga taris adi biru, isa tutu-sudo tagap di sambu abŭt kupong ka dŭh bisa rudos.

²⁹“Kan Aaron mŭrŭt ka Yŭn Kudus, ayŭh an pakai tutu-sudo anŭ adi yŭn dŭn dŭn tibaran-asar daya Israel dog mŭŭt, isa Aku adi TUHAN ari ingat daya Ku.

³⁰ Na Urim ngga Thummim[25] di tutu-sudo anŭ, isa Aaron taban-i kan ayŭh mandŭg ka yŭn kudus Ku. Di tika adi mun anŭ ayŭh dŭh siŭn dŭh an ari nēn tutu-sudo anŭ, isa ayŭh bisa kidaan pinyiraan Ku di daya Israel.

³¹“Jipo-ambu adi dog nēn tura ka darŭm efod, an dog ndai so tigŭrŭ banang buruh biri adi biru.

³²An agi rubang yŭn ubak, ka rubang tungo an dog nyigiren isa dŭh tatas.

³³Di sigŭn jipo-ambu anŭ na abuh tunda gayŭn buwa delima pakai banang buruh biri adi biru, adi bēng, ka adi bireh; bisarŭt ngga anak anak ruseng mas.

³⁵Aaron an pakai jipo-ambu anŭ darŭm-i nyiraja jadi imam. Kan ayŭh di ka yŭn Ku di Yŭn Kudus puan kah kan ayŭh ruah so nŭ, jawŭn ruseng anŭ re dog dingah daya, ka ayŭh dŭh re dog siŭ.

³⁶“Ndai ndi abuh so tigŭrŭ mas ka mŭŭt di tunduh-i, ‘Kudus yŭn TUHAN.’

³⁷Mŭŭng abuh anŭ tura ka jawin bubok pakai taris adi biru.

³⁸Aaron an pakai-i di arŭ-i, isa Aku, adi TUHAN, bisa trima sopŭrŭg pinganggen adi daya Israel nitah ka Aku, sunggu-i ngara bo agi adi ndai sarah darŭm jugan-i ka Aku.

³⁹“Nanun jipo Aaron ngga bubok-i so banang linen adi duduh, ka mŭnŭ gŭh bŭŭng kupong dog ngabuh ngga butik bunga jiit.

⁴⁰“Ndai jipo, bŭŭng kupong ka tupi yŭn bara anak dari Aaron, ngga ngabuh ngara da tatŭng dog stabi.

⁴¹Kasŭk piraka anŭ di jurud mu Aaron, samŭn bara anak dari-i. Ripas anŭ, garar ka nyikudus ngara ngga inyo kanā isa ngara bisa jadi imam yŭn Ku.

⁴²Ndai sinjang rajut yŭn ngara so banang linen; ambu-i an so kupong nutu pŭŭh, ngga nutu pinyidasa ngara.

⁴³Aaron ngga bara anak dari-i dŭh siŭn dŭh ari pakai sinjang rajut anŭ kan ngara di ka Bari-Ku, puan kah kan ngara tudu mija-sambah di ndai kraja imam di Yŭn Kudus, isa ngara dŭh tatŭng rapā ka dog siŭ. Ati inŭh atur adat adi tatap yŭn Aaron ngga bara sesang-i.