Read Biatah Bidayuh PINYIRUAH 29 Bible Online

PINYIRUAH 29 - Biatah Bidayuh bible

PINYIRUAH 29

¹“Ati inŭh kayuh adi kuu patut ndai di Aaron ngga bara anak dari-i ngga nyikudus ngara da jadi imam yŭn Ku. Tambit ndi pŭrŭng anak dari sapi ka duwŭh pŭrŭng dari biri adi pidanah.

²Pakai tibaduk gandom adi siabo kana, pak dŭh biragi, ka ndai ruti adi bigaur ngga inyo kanā, kada-i dŭh, ka kada-i mun biskit adi dog susen inyo dieh.

³Na sopŭrŭg anŭ di darŭm bakur ka jugan-i ka Aku kan kuu nyadis dari sapi ka duwŭh dari biri anŭ.

⁴“Taban Aaron ngga bara anak-i ka tiban Bari-Ku, ka bada ngara mamuh pakai adat mamuh.

⁵Komŭnŭ kibarui Aaron ngga piraka Imam: jipo, jipo-ambu adi dog nunduh ngga efod, ka tutu-sudo, ngga abŭt kupong.

⁶Bada ayŭh pakai bubok anŭ ka mŭŭng dieh tandā pinyikudus anŭ adi dog mŭŭt ‘Kudus yŭn TUHAN’ dieh.

⁷Komŭnŭ tambit inyo kudus, ka ren di ubak-i, ngga nginyo ayŭh.

⁸“Taban bara anak dari-i ka kasŭk jipo di ngara;

⁹Bada ngara pakai bŭŭng kupong anŭ ka mŭŭng tupi di ubak ngara. Simŭnŭ inŭh kuu garar Aaron ngga bara anak dari-i. Ngara ngga bara sesang ngara re adu adu jadi imam yŭn Ku.

¹⁰“Taban dari sapi anŭ ka rawa Bari-Ku ka bada Aaron ngga bara anak dari-i na tangan ngara di tunduh ubak-i.

¹¹Siŭ dari sapi anŭ di yŭn kudus Ku di tiban Bari Ku.

¹²Tambit kada deya dari sapi anŭ ka ngga trinju tangan mu nyatek ka na-i di junggir mija-sambah. Komŭnŭ ren tadŭh deya anŭ di sigŭn mija-sambah anŭ.

¹³Ko anŭ, kadi sopŭrŭg ramak adi marut isi pŭrŭng, parad atin adi siabo kana, ka so-duwŭh atin tipareng-i adi agi ramak dieh, ka badang sopŭrŭg anŭ di tunduh mija-sambah ndu sadis ka Aku.

¹⁴Pak badang sopŭrŭg isin dari sapi anŭ, kurit, ka kuboi di sapa tarun yŭn bibari. Anŭ inŭh sadis ngga taran dosa bara imam.

¹⁵“Tambit ndi dari biri so dupan dari biri anŭ ka bada Aaron ngga bara anak-i na tangan ngara di tunduh ubak-i.

¹⁶Siŭ biri anŭ, taŭ deya-i ngga nyijuh so-pat parad mija-sambah anŭ.

¹⁷Ndai bagŭ tatad so pŭrŭng dari biri anŭ; ngu isi isi pŭrŭng-i samŭn kaja kaja-i, ka nugung sopŭrŭg anŭ di tunduh ubak-i samŭn tatad adi bŭkŭn.

¹⁸ Badang pŭrŭng dari biri anŭ di tunduh mija-sambah ndu sadis pinguman. Dagŭn sadis anŭ pimunos asŭng Ku.

¹⁹“Tambit dari biri anŭ adi bŭkŭn, anŭ inŭh dari biri adi dog pakai ngga pimanu adat nitah. Bada Aaron ngga bara anak-i na tangan ngara di tunduh ubak-i.

²⁰Siŭ biri anŭ, ka tambit kada deya-i ka susen-i di dawŭn kajit tauh Aaron samŭn tung bara anak-i, ka susen gŭh di sindŭ trinju tangan tauh samŭn di sindŭ trinju kaja tauh ngara. Komŭnŭ nŭŭh nyijuh tadŭh deya anŭ di so-pat parad mija-sambah.

²¹Tambit kada deya anŭ adi agi di tunduh mija-sambah, kada inyo kudus, ka masik-i di tunduh Aaron ka di piraka-i ka ndai simŭnŭ gŭh di bara anak-i ka di piraka ngara. Aaron, ngga bara anak-i, ka piraka ngara re dog nitah yŭn Ku.

²²“Nading kadi sopŭrŭg ramak dari biri anŭ, koi-i adi piramak, ka ramak adi marut isi pŭrŭng, parad atin adi siabo kana, so-duwŭh atin tipareng adi agi ramak dieh, ka pŭŭh tauh-i.

²³Tambit so darŭm bakur ruti anŭ adi mbŭh dog jugan ka Aku, ndi baru ruti so barang masam ruti adi agi diginŭ: ndi baru ruti adi mbŭh dog ndai ngga inyo kanā ka ndi adi dŭh dog gaur ngga inyo kanā ka ndi biskit.

²⁴Na sopŭrŭg pinguman anŭ di tangan Aaron ngga bara anak-i ka bada ngara jugan-i ka Aku ndu pinganggen adi grua.

²⁵Komŭnŭ tambit pinguman anŭ so ngara ka badang-i di tunduh mija-sambah, nunduh sadis badang, ndu sadis pinguman ka Aku. Dagŭn sadis anŭ pimunos asŭng Ku.

²⁶“Tambit sudo dari biri anŭ ka jugan-i ka Aku ndu pinganggen adi grua. Sudo anŭ inŭh tung jangān.

²⁷“Kan imam dog garar, sinadan isin sudo ngga pŭŭh dari biri adi dog pakai di pinyigarar an dog jugan ka Aku ndu pinganggen adi grua ka dog nyidŭrŭ yŭn bara imam.

²⁸Pingatur Ku adi tatap inŭh kan daya ndai sadis bidingan, sudo ka pŭŭh dāng anŭ dog dapu bara imam. Anŭ inŭh pinganggen daya di Aku, adi TUHAN.

²⁹“Piraka imam adi Aaron dapu an dog nggen di bara anak dari-i ripas ayŭh kabŭs, siŭn ngara nen-i di andu ngara dog garar.

³⁰Anak Aaron adi gati ayŭh jadi imam adi mŭrŭt ka darŭm Bari-Ku ka adi ndai kraja di Yŭn Kudus siŭn nēn piraka anŭ sitŭkŭd ju andu.

³¹“Tambit isin dari biri anŭ adi ko dog pakai di pinyigarar Aaron ngga bara anak-i ka rabus-i di tarun yŭn adi kudus.

³²Ngara an man dagin anŭ di tiban Bari-Ku ngga ruti anŭ adi dŭm darŭm bakur.

³³Ngara siŭn man tadŭ tadŭ pinguman adi ko dog pakai di adat pingapun sarah di andu pinyigarar ngara. Kaŭs-i bara imam adŭ adi siŭn man pinguman anŭ, amai-i kudus.

³⁴Kambŭi agi dagin puan kah ruti dŭm dŭh abo dog man ngga isan isan, pinguman anŭ an dog badang bada rŭpŭg; dŭh siŭn dog man, amai-i kudus.

³⁵“Ndai adat pinyigarar yŭn Aaron ngga bara anak-i sitŭkŭd ju andu nanyam adi ko Aku kidaan di kuu.

³⁶Barang andu kuu dŭh siŭn dŭh jugan ndi dari sapi ndu sadis taran dosa. Anŭ re pibisig mija-sambah. Komŭnŭ nginyo mija-sambah ngga inyo kanā ngga bada-i kudus.

³⁷Ndai simŭnŭ barang andu sitŭkŭd ju andu. Simŭnŭ mija-sambah re jadi batur batur kudus, ka tadŭ tadŭ daya puan kah tadŭ tadŭ kayuh adi tama mija-sambah anŭ re binasa da kuasa pinyikudus-i.[26]

³⁸“Barang andu ka adu adu, nyadis di tunduh mija-sambah anŭ duwŭh pŭrŭng anak biri adi ndi sawa umbur-i.

³⁹Nyadis ndi pŭrŭng anak biri isan isan ka ndi ngga arong singumi andu.

⁴⁰Samah ngga anak biri adi sibungas-i jugan gŭh ndi kilogram tibaduk gandom adi siabo kana ngga ndi lita tigŭrŭ inyo kanā. Ren ndi lita wain ndu sadis.

⁴¹Nyadis anak biri anŭ adi numbor duwŭh ngga singumi andu, ka jugan samah ngga kiang adi tejah gŭh tibaduk gandom, inyo kanā, ka wain bada nyikiang sukad-i ngga anŭ adi mbŭh dog jugan ngga isan isan. Anŭ inŭh sadis pinguman adi dog jugan ka Aku, adi TUHAN, ka dagŭn-i pimunos asŭng Ku.

⁴²Kuu ngga bara sesang mu an ari jugan sadis badang anŭ ka Aku, di tiban Bari-Ku. Diginŭ Aku re bidapŭd ngga bara daya Ku ka minyu di kuu.

⁴³Diginŭ Aku re bidapŭd ngga bara daya Israel, ka sekar jawa bragah Ku re bada tarun anŭ kudus.

⁴⁴Aku re bada Bari anŭ ka mija-sambah anŭ kudus, ka Aku re nyidŭrŭ Aaron ka bara anak dari-i da jadi imam yŭn Ku.

⁴⁵Aku re rŭŭ bigaur ngga bara daya Israel, ka re jadi Tapa ngara.

⁴⁶Ngara re puan nang Aku ati TUHAN adi Tapa ngara adi ko taban ngara ngga ruah so Egypt isa Aku bisa rŭŭ di ruang ngara. Aku TUHAN adi Tapa ngara.