Read Biatah Bidayuh PINYIRUAH 3 Bible Online

PINYIRUAH 3 - Biatah Bidayuh bible

PINYIRUAH 3

¹Ndi andu kan Moses nguan biri ka kambing damŭh-i Jethro, imam di Midian, ayŭh taban kaban dāng anŭ ngga mutas tarun tana-pajam di ka Sinai, darŭd kudus.

²Diginŭ malaikat nandŭng di ayŭh mun jireb apui di anak tŭngŭn kayuh. Moses kiris apui bijagu di anak tŭngŭn kayuh anŭ, pak-i dŭh sau.

³“Saruh kayuh ati,” ayŭh nang darŭm asŭng-i. “Mani anak tŭngŭn kayuh anŭ dŭh sau? Aku re di nyindŭk tingga.”

⁴Kan TUHAN kiris Moses mandŭg nyindŭk, Ayŭh bagan Moses so ruang anak tŭngŭn kayuh anŭ, “Moses Moses.” Moses nam, “Ani, ta aku.”

⁵Tapa nang, “Dŭhnyah mandŭg nyindŭk. Kadi kasut mu, amai kuu mijog di tana kudus.

⁶Aku Tapa tayung-babuk mu, Tapa Abraham, Isaac ka Jacob,” Moses rasu nutu jawin-i, amai taru tingga Tapa.

⁷Jadi TUHAN nang, “Aku mbŭh kiris daya Ku dog pijera di Egypt. Aku mbŭh dingah sidaing ngara bagan mite pinyirupas so tangan bara pinguasa urun adi nguasa ngara. Aku puan sopŭrŭg pinyusah ngara.

⁸Ngapŭi Aku mandŭg re pirupas ngara so daya Egypt ka taban ngara ruah so Egypt ka tarun tana adi bayah, adi kaya ka damŭn, adi yŭn daya Canaan, daya Hitti, daya Amor, daya Periz, daya Hivi, ka daya Jebus rŭŭ madin.

⁹Aku sawŭ mbŭh dingah sidaing daya Ku, ka Aku mbŭh kiris munki masam ngara dog kinanyuh daya Egypt.

¹⁰ Ngapŭi madin Aku pait kuu ka raja Egypt isa kuu taban daya Ku ngga ruah so rais-i.”

¹¹Pak Moses nang di Tapa, “Aku ati daya saja adŭ. Simuki aku re bidapŭd ngga raja ka taban daya Israel ngga bu ruah so Egypt?”

¹²Tapa nam, “Aku re agi ngga kuu, ka kan kuu mbŭh taban daya Israel ngga ruah so Egypt, kuu re nyambah Aku di darŭd ati. Anŭ re jadi tandā adi kiren Aku mbŭh pait kuu.”

¹³ Pak Moses nam, “Kan aku di ka daya Israel ka kidaan di ngara, nang ‘Tapa tayung-babuk ngan adi pait aku ka angān,’ tatu ngara siken aku, ‘Asi dŭn-I?’ Jadi sakaki aku re nam ngara?”

¹⁴ Tapa nam, “Aku ati inŭh Aku. Kuu dŭh siŭn dŭh kidaan di ngara, ‘Sianŭ adi adŭn Aku ati inŭh Aku[5] mbŭh pait aku ka angān.’

¹⁵Kidaan di bara daya Israel nang Aku, adi TUHAN, adi Tapa tayung-babuk ngara, Tapa Abraham, Isaac ka Jacob inŭh adi pait kuu ka ngara. Anŭ inŭh dŭn Ku ndŭg situi tui; anŭ inŭh dŭn adi turap bauh re pakai ngga kadŭn Aku.

¹⁶Panu di nguruk sopŭrŭg pinguru daya Israel ka kidaan di ngara nang Aku, adi TUHAN, adi Tapa tayung-babuk ngara, Tapa Abraham, Isaac, ka Jacob, mbŭh nandŭng di kuu. Kidaan di ngara nang Aku mbŭh mandŭg ka ngara ka mbŭh kiris kayuh adi daya Egypt ndai di tunduh ngara.

¹⁷Aku mbŭh natu adŭp Ku re taban ngara ngga bu so Egypt di yŭn ngara dog kinanyuh; Aku re taban ngara ka tarun tana adi kaya ka damŭn, anŭ inŭh tarun tana daya Canaan, daya Hitti, daya Amor, daya Periz, daya Hivi ngga daya Jebus.

¹⁸“Daya Ku re dingah kayuh adi nang mu di ngara. Jadi kuu dŭh siŭn dŭh di ngga bara pinguru Israel ka yŭn raja Egypt ka nang di ayŭh, ‘TUHAN, adi Tapa daya Hebrew, mbŭh pinandŭng adŭp-I di kieh. Madin nyibandar kieh panu taruh andu ka tarun tana-pajam di jugan sadis ka TUHAN, adi Tapa ami.’

¹⁹Aku puan raja Egypt dŭh re bada angān di kambŭi ayŭh dŭh dog takan.

²⁰Pak Aku re pakai kuasa Ku ka re ngukum Egypt ngga pingandai adi bisā diginŭ. Ripas anŭ ayŭh re bada angān panu.

²¹ Aku re bada daya Egypt biradat di kuu isa kan daya Ku bu so nŭ, ngara dŭh re bada ngara bu bŭrŭh-beyang.

²²Barang naan dayung daya Israel re di ka rasū ngara samŭn ka tadŭ tadŭ dayung daya Egypt adi rŭŭ di ramin-i ka mite piraka, pimakai mas ngga pirak. Daya Israel re bada anak ngara dari bait dayung pakai kayuh kayuh anŭ ngga taban bu pinyikaya daya Egypt.”