Read Biatah Bidayuh PINYIRUAH 30 Bible Online

PINYIRUAH 30 - Biatah Bidayuh bible

PINYIRUAH 30

¹“Ndai ndi kija so kayuh acacia yŭn badang kimanyan.

²Ndai-i bada misagi pat, anŭ inŭh 45 sentimita anjong-i ka 45 sentimita buka-i, ka 90 sentimita bigatung. Junggir-i di so-pat sikuh-i dŭh siŭn dŭh sinyadi ngga mija anŭ.

³Nurap tunduh-i, tigang-i, ka junggir-i ngga tigŭrŭ mas, ka ndai jiri bŭngŭn-i ngga mas.

⁴Ndai duwŭh sigarong pinawid so mas di punda jiri bŭngŭn anŭ yŭn kasŭk pinawid di so-duwŭh parad-i.

⁵Pinawid anŭ an dog ndai so kayuh acacia ka marut-i ngga mas.

⁶Na mija ati di sapa tabir adi dog kideng di jawin Pati Simanya. Anŭ inŭh tarun adi yŭn Aku re bidapŭd ngga kuu.

⁷Barang isan kan Aaron mandŭg di sidia prita, ayŭh dŭh siŭn dŭh badang kimanyan adi buuh ramak di tunduh-i.

⁸Ayŭh dŭh siŭn dŭh ndai simŭnŭ gŭh kan-i tung prita ngga siri ngumi. Kraja ati adi badang kimanyan an adu adu dog ndai so turap ndi ndŭg turap andi.

⁹Dŭhnyah badang di tunduh mija ati kimanyan adi dŭh siŭn dog pakai, tadŭ tadŭ sadis dāng, puan kah sadis ruwang kayuh, ka dŭhnyah gŭh ren sadis wain dieh.

¹⁰Ndi sidah ndi sawa, Aaron dŭh siŭn dŭh pimanu adat pibisig mija anŭ ka susen so-pat junggir anŭ ngga deya dāng adi dog nyadis ngga taran dosa. Kraja ati dŭh siŭn dŭh dog ndai barang sawa ndŭg situi tui. Mija ati an jadi adi siabo kudus, adi angān mbŭh nitah ka Aku, adi TUHAN.”

¹¹TUHAN nang di Moses,

¹²“Kan kuu mirang daya Israel, barang naan dŭh siŭn dŭh bayar takŭd yŭn adŭp-i, isa pinyirusag dŭh mandŭg nyatŭk ayŭh sitadŭn pimirang anŭ dog ndai.

¹³ Barang naan adi dog mirang dŭh siŭn dŭh bayar kiang adi mbŭh dog natu, nanyam ka kiang adi dog miratak di Bari-Ku. Barang naan dŭh siŭn dŭh bayar kiang anŭ ndu pinganggen ka Aku.

¹⁴Barang naan adi mbŭh dog mirang, anŭ inŭh sopŭrŭg dari adi mbŭh duwŭh puru sawa ngga adi rabis so anŭ umbur-i, dŭh siŭn dŭh bayar kiang anŭ ka Aku.

¹⁵Daya kaya dŭh siŭn bayar rabis ka daya sirata dŭh siŭn bayar kurang, kan ngara bayar kiang anŭ yŭn asŭng ngara.

¹⁶Nguruk duit anŭ so daya Israel, ka pakai-i ngga sita Bari-Ku. Suke anŭ inŭh dog pakai ngga bayar asŭng ngara, ka Aku re ingat ka grindung ngara.”

¹⁷TUHAN nang di Moses.

¹⁸ “Ndai ndi sambong so timaga. Piguru-i di asah Bari-Ku ngga mija-sambah, ka na piin di darŭm-i.

¹⁹Aaron ngga bara anak dari-i siŭn pakai piin anŭ ngga ngu kaja ngga tangan ngara

²⁰diŭ so ngara mŭrŭt Bari-Ku puan kah tudu mija-sambah re jugan sadis pinguman. Kambŭi ngara ndai simŭnŭ ngara dŭh re dog siŭ.

²¹Ngara dŭh siŭn dŭh ngu kaja ngga tangan ngara, isa ngara dŭh kabŭs. Ati inŭh atur adi ngara ngga sesang ngara dŭh siŭn dŭh tunda ndŭg situi tui.”

²² TUHAN nang di Moses,

²³“Tambit rapah rapah adi siabo kana: 6 kilogram ju myrrh, 3 kilogram kurit kayuh adi buuh ramak, 3 kilogram tabuh wangi,

²⁴6 kilogram kayuh cassia, (dog nimbang nanyam ka timbang adi dog miratak di Bari-Ku), nambah ngga 4 lita inyo kanā,

²⁵ka ndai inyo kudus, bigaur mun wangi.

²⁶Pakai inyo anŭ ngga nginyo Bari-Ku, Pati Simanya,

²⁷mija ngga sopŭrŭg pingakas-i, rika prita ngga sopŭrŭg pingakas-i, ka mija adi yŭn kimanyan dog badang,

²⁸mija adi yŭn badang sadis, ngga sopŭrŭg pingakas-i, ngga sambong-pinyingu samŭn bangan-i.

²⁹Simŭnŭ nitah sopŭrŭg kayuh anŭ isa-i jadi kayuh adi sukup kudus, ka tadŭ tadŭ daya puan kah tadŭ tadŭ kayuh adi tama kayuh kayuh kudus anŭ re binasa da kuasa pinyikudus-i.[27]

³⁰Komŭnŭ, nginyo Aaron ngga bara anak dari-i, ka garar ngara jadi bara imam yŭn Ku.

³¹Kidaan di daya Israel, ‘Inyo kudus anŭ dŭh siŭn dŭh adu adu dog pakai ngga ndai kraja Ku.

³²Inyo anŭ dŭh siŭn dog pakai ngga nginyo daya braŭn, ka angān dŭh siŭn nanya pinyigaur-i ngga ndai kayuh bŭkŭn. Inyo anŭ inyo kudus, ka angān dŭh siŭn dŭh sita-i nimun inyo kudus.

³³Asi asi adi ndai inyo bada mun inyo anŭ puan kah pakai-i di tunduh tadŭ tadŭ daya adi dŭh imam, daya anŭ dŭh re tia dog nyirundeng ndi naan so daya Ku.’ ”

³⁴TUHAN nang di Moses, “Tambit bada nyikiang rapah rapah adi buuh ramak: pŭtŭk myrrh, kabang rukan, pŭtŭk raksamala, ngga tigŭrŭ kimanyan.

³⁵Pakai rapah rapah anŭ ngga ndai kimanyan, bada bigaur mun wangi. Na garo ngga bada-i bisig ka kudus.

³⁶Pŭh kada-i bada anŭk mun tibaduk ka taban-i ka darŭm Bari-Ku ka ngabu-i di jawin Pati Simanya. Kimanyan anŭ dŭh siŭn dŭh jadi kayuh adi siabo kudus.

³⁷Dŭhnyah nanya pinyigaur anŭ ngga ndai kimanyan adi re adŭp ngan pakai. Bada-i jadi kayuh kudus adi muko angān nitah ka Aku.

³⁸Asi asi adi ndai kimanyan adi mun anŭ an-i pakai ndu wangi, daya anŭ dŭh re tia dog nyirundeng ndi naan so daya Ku.”