Read Biatah Bidayuh PINYIRUAH 31 Bible Online

PINYIRUAH 31 - Biatah Bidayuh bible

PINYIRUAH 31

¹TUHAN nang di Moses,

²“Aku mbŭh mien Bezalel, anak Uri, adi sukuh Hur, so tibaran-asar Judah,

³ka Aku mbŭh ngisi ayŭh ngga kuasa[28] Ku. Aku mbŭh nggen di ayŭh pinyimirati, pimandai ngga pinyibisa yŭn barang masam kraja pingandai bibutik

⁴ngga-i mutik ka mŭŭt masam masam butik ka bunga di mas, pirak, ngga timaga,

⁵ngga kapŭg batuh batuh brega adi re dog pirakat; ngga mŭŭt apŭg kayuh; ka ngga ndai barang masam kraja pingandai bibutik.

⁶Aku mbŭh mien gŭh Oholiab anak Ahisamach, so tibaran-asar Dan, da nyiraja samah ngga ayŭh. Aku muko gŭh nggen pinyibisa di sopŭrŭg ngara adi bŭkŭn adi re turung ngara di sopŭrŭg kayuh nimun adi Aku ko pesan di kuu:

⁷Bari TUHAN, Pati Simanya ngga tŭtŭp-i, sopŭrŭg pingakas adi dog pakai darŭm Bari TUHAN,

⁸mija ngga pingakas-i; rika prita adi dog ndai so tigŭrŭ mas samŭn sopŭrŭg pingakas-i, mija adi yŭn badang kimanyan,

⁹mija-sambah adi yŭn sadis badang, sambong-pinyingu ngga bangan-i,

¹⁰piraka simayang imam yŭn Aaron ngga bara anak dari-i, adi ngara nēn kan ngara ndai kraja imam;

¹¹inyo kudus, ngga kimanyan adi buuh ramak yŭn birit adi dog kadŭn Yŭn Kudus. Kan ngara ndai sopŭrŭg kayuh anŭ, ngara dŭh siŭn dŭh tunda gaya anŭ adi Aku muko pesan di kuu.”

¹²TUHAN pesan Moses,

¹³da kidaan di daya Israel, “Sita Andu Sabbath, andu Aku rŭŭ, amai andu anŭ jadi tandā yŭn Ku ngga angān ndŭg situi tui, ngga kiren Aku adi TUHAN mbŭh bada angān jadi daya Ku.

¹⁴ Angān dŭh siŭn dŭh sita andu rŭŭ anŭ amai-i kudus. Asi asi adi dŭh sita-i, ka nyiraja di andu anŭ, dŭh siŭn dŭh dog ukum kabŭs.

¹⁵Angān biyŭn nŭm andu adi ngga angān ndai kraja ngan, pak andu adi ju inŭh andu rŭŭ adi kudus, amai anŭ Andu adi mbŭh dog nitah ka Aku. Asi asi adi nyiraja di Andu anŭ dŭh siŭn dŭh dog ukum kabŭs.

¹⁶Daya Israel dŭh siŭn dŭh sita andu anŭ ndu tandā simanya Ku.

¹⁷ Anŭ inŭh tandā adi tatap yŭn daya Israel ngga Aku, amai Aku adi TUHAN, mbŭh napa rangit ngga ong darŭm nŭm andu, ka andu adi ju Aku rŭŭ so kraja Ku.”

¹⁸Kan Tapa muko minyu ngga Moses di Darŭd Sinai, Ayŭh nggen di Moses duwŭh kiping batuh adi yŭn-I mbŭh nuris Pinyipesan.